ވޭތުވެދިޔަ ފަސް އަހަރު ދުވަހުގެ ތެރޭގައި ގަލްފުގެ އެކި ގައުމުތަކުން 164,000 އަށްވުރެ ގިނަ ޕާކިސްތާނު ރައްޔިތުން ޑީޕޯޓްކޮށްލާފައިވާ ކަމަށް ޕާކިސްތާނުގެ ނޭޝަނަލް އެސެމްބްލީއަށް ހުށަހެޅި ރަސްމީ ތަފާސްހިސާބުތަކުން ދައްކައިފިއެވެ.
ޕާކިސްތާނުގެ ދާޚިލީ ވުޒާރާއިން މަޖިލީހަށް ހުށަހެޅި މަޢުލޫމާތުތަކަށް ބަލާއިރު، އެންމެ ގިނަ މީހުން ޑީޕޯޓްކޮށްލާފައިވަނީ ސައުދީ އަރަބިއްޔާ އިންނެވެ. އެ ގައުމުން 108,029 މީހުން ފޮނުވާލާފައިވާއިރު، ޔުނައިޓެޑް އެރަބް އެމިރޭޓްސް (ޔޫއޭއީ) އިން 40,497 މީހުން، އޮމާނުން 9,814 މީހުން، ގަތަރުން 2,971 މީހުން އަދި ބަހްރޭނުން 2,779 މީހުން ވަނީ ޑީޕޯޓްކޮށްލާފައެވެ.
މި ތަފާސްހިސާބުތައް މަޖިލީހަށް ހުށަހަޅާފައިވަނީ އިދިކޮޅު މެންބަރުންގެ ވަރުގަދަ އިހުތިޖާޖުތަކަކާއެކު ކުރިއަށްދިޔަ ދަންފަޅިއެއްގައެވެ. ޕީޓީއައިގެ ބާނީ އިމްރާން ޚާނާ ބައްދަލުކުރުމުގެ ފުރުސަތު ނުދިނުމާއި، އޭނާއަށް ބޭނުންވާ ސިއްހީ ފަރުވާ ހޯދުމުގައި ހުރަސްތަކެއް ހުރި ކަމަށް ބުނެ އިދިކޮޅު މެންބަރުން ވަނީ މަޖިލީހުގެ ތަޅުމުގައި އަޑުގަދަކޮށް އިހުތިޖާޖުކޮށްފައެވެ.
އިދިކޮޅު ލީޑަރު މަހްމޫދު ޚާން އަޗަކްޒާއީ ވިދާޅުވީ، އިމްރާން ޚާންގެ ސިއްހީ ހާލަތާއި ބައްދަލުކުރުމުގެ ފުރުސަތާ ގުޅޭގޮތުން އިދިކޮޅުން ހުށަހެޅި ކަންބޮޑުވުންތަކަށް ސަރުކާރުން ޖަވާބުދާރީވެފައި ނުވާ ކަމަށެވެ. އަދި މިކަންކަމަށް ހައްލެއް ނުލިބޭނީސް ބަޖެޓުގެ މަސައްކަތުގައި ބައިވެރިނުވާނެ ކަމުގެ އިންޒާރު ދެއްވުމަށްފަހު، އިދިކޮޅު މެންބަރުން ވަނީ މަޖިލީހުން ބޭރަށް ނުކުމެވަޑައިގެންފައެވެ.
މީގެ އިތުރުން، ނޭޝަނަލް ސައިބަރ ކްރައިމް އިންވެސްޓިގޭޝަން އެޖެންސީން ވަނީ 2023 ވަނަ އަހަރުން ފެށިގެން މިހާތަނަށް 531,000 އަށްވުރެ ގިނަ ޝަކުވާ ލިބިފައިވާ ކަމަށް ރިޕޯޓްކޮށްފައެވެ. މި މުއްދަތުގެ ތެރޭގައި 5,700 އަށްވުރެ ގިނަ މައްސަލަ ރަޖިސްޓްރީކޮށް، ސައިބަރ ކުށްތަކާ ގުޅިގެން ވޭތުވެދިޔަ ހަތަރު އަހަރު ތެރޭގައި 7,600 މީހުން ހައްޔަރުކޮށްފައިވާ ކަމަށްވެސް އެ ރިޕޯޓުގައިވެއެވެ.
މަޖިލީހުގެ މި ބައްދަލުވުމުގައި އިސްލާމްއާބާދުގެ އަމިއްލަ ހޮސްޕިޓަލްތަކުން ދޭ ސިއްހީ ފަރުވާގެ އަގުތައް އިންތިހާއަށް ބޮޑުވަމުންދާ މައްސަލައާ ގުޅޭގޮތުންވެސް މެންބަރުން ވަނީ މަޝްވަރާކުރައްވާފައެވެ.
