ޗައިނާގެ ރައްޔިތުން ތަމްސީލު ކުރާ ހަމައެކަނި ގާނޫނީ ސަރުކާރަކީ ޕީޕަލްސް ރިޕަބްލިކް އޮފް ޗައިނާ ކަމަށް ބަލައިގަނެ، "ވަން ޗައިނާ ޕްރިންސިޕަލް" އަށް ދިވެހި ސަރުކާރުގެ ތާއީދުއޮތްކަން ޔަގީންކޮށް ދެމުން ފޮރިން މިނިސްޓްރީން ރަސްމީ ބަޔާނެއް މެދުވެރިކޮށް ބުރާސްފަތި ދުވަހު އަލުން އެކަން ކަށަވަރުކޮށްދީފިއެވެ.
މިނިސްޓްރީ އޮފް ފޮރިން އެފެއާޒުން ނެރުނު ބަޔާނުގައި ބުނެފައިވަނީ، ޓައިވާނަކީ ޗައިނާގެ ސަރަހައްދުގެ ވަކިނުކުރެވޭނެ ބައެއް ކަމަށެވެ. މި ނިންމުމަކީ އދ. ގެ އާންމު މަޖިލީހުގެ ގަރާރު 2758 އާއި ބައިނަލްއަގުވާމީ ގާނޫނުތަކުގެ މައްޗަށް ބިނާވެފައިވާ ނިންމުމެއް ކަމަށާއި، ޗައިނާއާއެކު ސިޔާސީ ގުޅުން ގާއިމުކުރީއްސުރެ ރާއްޖެއިން މި ސިޔާސަތު ދަމަހައްޓަމުން އަންނަކަން ފޮރިން މިނިސްޓްރީން ފާހަގަކުރެއެވެ.
ޓައިވާނަކީ ޗައިނާއިން ދެކޭ ގޮތުގައި އެ ގައުމުގެ ބާޣީ ސަރަހައްދެކެވެ،
ސަރުކާރުން އިތުރަށް ބުނެފައިވަނީ ޗައިނާއާއެކު އޮތް ގުޅުން އިތުރަށް ބަދަހިކުރުމަށް މަސައްކަތް ކުރާނެ ކަމަށާއި، ރާއްޖޭގެ އިޖުތިމާއީ އަދި އިގްތިސާދީ ތަރައްގީއަށް ބެއިޖިންގްއިން ދެމުންދާ އެހީތެރިކަން ބަލައިގަންނަ ކަމަށެވެ.
މި ބަޔާން ނެރުނު ވަކި ސަބަބެއް ސަރުކާރުން ހާމަކޮށްފައި ނުވި ނަމަވެސް، މިއީ އެމެރިކާގެ ސްޓޭޓް ޑިޕާޓްމަންޓްގެ އިސް އޮފިޝަލަކު ތިލަފުއްޓަށް ޒިޔާރަތް ކުރެއްވިތާ މަދު ދުވަސްކޮޅެއްގެ ތެރޭގައި ނެރުނު ބަޔާނެކެވެ. ތިލަފުށީގެ ވިޔަފާރި ބަނދަރު ބަދަލުކުރުމުގެ މަޝްރޫއު ހަވާލުކޮށްފައިވަނީ ޗައިނާގެ ކުންފުންޏެއް ކަމަށްވާ ޗައިނާ ހާބަރ އިންޖިނިއަރިންގް ކޮމްޕެނީއާއެވެ.
އިންޑިއާ ކަނޑުގެ ސަރަހައްދުގައި އުމްރާނީ ތަރައްގީއާއި އިސްތިރާތީޖީ ގުޅުންތަކުގެ ތެރެއިން އެމެރިކާގެ ހަރަކާތްތައް އިތުރުވަމުންދާ ދަނޑިވަޅެއްގައި، ރާއްޖެއިން މިފަދަ ބަޔާނެއް ނެރުމަކީ ސަރަހައްދީ ސިޔާސީ މަސްރަހުގައި ވަކި ފަރާތަކަށް ނުޖެހޭ ކަމުގެ މުހިންމު ކަމެއްގެ ގޮތުގައި ބެލެވެއެވެ. ވަން ޗައިނާ ސިޔާސަތަށް ތާއީދުކުރުމަކީ ރާއްޖޭގެ ޚާރިޖީ ސިޔާސަތުގައި ބިންވަޅު ނެގިފައިވާ ސާބިތު ކަމެއް ނަމަވެސް، މި ހަފުތާގައި ރަސްމީކޮށް މިކަން ހާމަކުރުމުން މީގެ މުހިންމުކަން ބޮޑުވެގެންދެއެވެ.
