ދުނިޔޭގައި ދެވަނައަށް އެންމެ ގިނައިން ހަކުރު އުފައްދާ ގައުމު ކަމަށްވާ އިންޑިއާއިން، އެ ގައުމުގެ އެތެރޭގެ ބާޒާރަށް ބޭނުންވާ މިންވަރު ކަށަވަރުކުރުމަށްޓަކައި ހަކުރު ބޭރުކުރުން 2026 ވަނަ އަހަރުގެ ސެޕްޓެމްބަރު މަހުގެ ނިޔަލަށް ކުއްލި ގޮތަކަށް މަނާކޮށްފިއެވެ. މި ނިންމުމާ ގުޅިގެން ދުނިޔޭގެ ބާޒާރުގައި ހަކުރުގެ އަގު އުފުލި، ކާބޯތަކެތީގެ ރައްކާތެރިކަމާ މެދު ވަނީ ކަންބޮޑުވުން އުފެދިފައެވެ.
އެމެރިކާގެ އެގްރިކަލްޗަރ ޑިޕާޓްމަންޓުގެ ތަފާސްހިސާބުތައް ދައްކާގޮތުން، މި ނިންމުމުގެ ސަބަބުން އެންމެ ބޮޑު އަސަރެއް ކުރާނެ ކަމަށް ބެލެވެނީ ޔޫއޭއީ، އަލްޖީރިއާ އަދި ސައުދީ އަރަބިއްޔާއަށެވެ.
2024/25 ވަނަ އަހަރު ޔޫއޭއީއިން 2.27 މިލިއަން ޓަނުގެ ހަކުރު އިމްޕޯޓްކޮށްފައިވާއިރު، ސައުދީ އަރަބިއްޔާއިން 2.24 މިލިއަން ޓަނުގެ ހަކުރު ވަނީ އެތެރެކޮށްފައެވެ. މީގެ އިތުރުން މިސްރާއި އީރާނަކީވެސް ސަރަހައްދީ ފެންވަރުގައި ގިނަ އަދަދަކަށް ހަކުރު އެތެރެކުރާ ގައުމުތަކެވެ.
އިންޑިއާގެ މި ނިންމުމާއެކު ނިއުޔޯކް ބާޒާރުގައި ހަކުރުގެ އަގު 2 އިންސައްތަ އުފުލިފައިވާއިރު، ލަންޑަން ބާޒާރުގައި ހަކުރުގެ އަގު ވަނީ 3 އިންސައްތަ މައްޗަށް ގޮސްފައެވެ.
މިއީ ދުނިޔޭގެ ބާޒާރުގައި ހަކުރުގެ އަގު ފާއިތުވި 6 މަސްދުވަހުގެ ތެރޭގައި އެންމެ މައްޗަށް ދިޔަ ފަހަރެވެ. މި ބަދަލު އައިސްފައިވަނީ ތެލާއި ފާޓިލައިޒަރުގެ އަގު އުފުލުމުގެ އިތުރުން، އީރާނުގެ ހަނގުރާމައާ ގުޅިގެން މުދާ އުފުލުމުގެ އަގުތައްވެސް ބޮޑުވެފައިވާ ދަނޑިވަޅެއްގައެވެ.
އެހެން ގައުމުތަކުން އަޅާފައިވާ ފިޔަވަޅުތައް
ހަކުރު ބޭރުކުރުން މަނާކޮށްފައިވަނީ ހަމައެކަނި އިންޑިއާއަކުން ނޫނެވެ.
މިސްރުން ވަނީ 2026 ވަނަ އަހަރުގެ ޖެނުއަރީއާ ހަމައަށް ހަކުރު ބޭރުކުރުން މަނާކޮށްފައެވެ.
އަދި ރަޝިއާއިން 2024 ވަނަ އަހަރުގެ އޮގަސްޓް މަހުގެ ނިޔަލަށް ހަކުރު ބޭރުކުރުން މަނާކުރިއިރު،
އަލްޖީރިއާއިންވެސް ވަނީ ކާބޯތަކެތީގެ ރައްކާތެރިކަން ކަށަވަރުކުރުމަށް މިފަދަ ފިޔަވަޅުތަކެއް އަޅާފައެވެ.
ބްރެޒިލް އަދި ތައިލެންޑުގެ ދައުރު
އިންޑިއާގެ ހަކުރު ބާޒާރަށް ނުލިބޭ މިންވަރު ފޫބެއްދުމަށް އޮތް އެންމެ ބޮޑު އުންމީދަކީ ބްރެޒިލްއެވެ.
ދުނިޔޭގެ ހަކުރުގެ އެކްސްޕޯޓުގެ 54 އިންސައްތަ ހިއްސާކުރަނީ ބްރެޒިލްއިންނެވެ.
ނަމަވެސް، ބްރެޒިލްގައި ހަކުރުގެ ބަދަލުގައި އީތަނޯލް އުފެއްދުމަށް އިސްކަންދިނުމަކީ ބާޒާރަށް ނުކުންނަ ހަކުރުގެ މިންވަރު މަދުވެދާނެ ސަބަބެކެވެ.
ދެން އޮތް ބަދަލަކީ ތައިލެންޑެވެ. ތައިލެންޑުން 2025/26 ވަނަ އަހަރު 10.25 މިލިއަން ޓަނުގެ ހަކުރު އުފައްދާނެ ކަމަށް ލަފާކުރެވެއެވެ.
އިންޑިއާގެ މި ނިންމުމުގެ ސަބަބުން ދުނިޔޭގެ ހަކުރުގެ ބާޒާރަށް ބޮޑު ލޮޅުމެއް އަރާފައިވާއިރު، ކުރިއަށް އޮތް ތަނުގައި ހަކުރުގެ އަގުތައް ހުންނާނެ ގޮތެއް ބިނާވެފައިވަނީ ބްރެޒިލްގެ އުފެއްދުންތެރިކަމާއި ދުނިޔޭގެ ސިޔާސީ މަސްރަހަށް އަންނަ ބަދަލުތަކުގެ މައްޗަށެވެ. ޔޫއޭއީ ފަދަ ގައުމުތަކުން ހަކުރު ރިފައިންކޮށް އަލުން އެކްސްޕޯޓްކުރުމުގައި އަދާކުރާ ދައުރު މި ދަނޑިވަޅުގައި ވަރަށް މުހިންމުވާނެއެވެ.
