ޚުލްޢު ވަރިއާއި އާއިލީ މައްސަލަތަކާ ގުޅޭގޮތުން މުހިންމު ނިންމުމެއް ޕާކިސްތާނުގެ ސުޕްރީމް ކޯޓުން ނިންމައިފިއެވެ. އެ ކޯޓުން ކަނޑައަޅާފައިވަނީ އަންހެންމީހާގެ ސާފު، މައުލޫމާތު ފުރިހަމަ އަދި އޮޅުމެއްނެތް އިޢުތިރާފެއް ނުވަތަ ރުހުމެއް ނެތި ޚުލްޢު ވަރި ނުކުރެވޭނެ ކަމަށެވެ.
އުއްތަމަ ފަނޑިޔާރު ޔަހްޔާ އަފްރީދީ އިސްކޮށް ހުންނެވި ތިން ފަނޑިޔާރުންގެ ބެންޗަކުން ނެރުނު 12 ސަފުހާގެ މި ހުކުމުގައި ބަޔާންކޮށްފައިވަނީ، އަނިޔާގެ ތުހުމަތުތަކެއްގެ މައްޗަށް ބިނާކޮށް ހުށަހަޅާފައިވާ މައްސަލައެއް، އަންހެންމީހާގެ ރުހުމާ ނުލައި ޚުލްޢު މައްސަލައަކަށް ބަދަލުކުރުމަކީ އޭނާގެ މާލީ ހައްގުތަކަށް އުނިކަން އަތުވެދާނެ ކަމެއް ކަމަށެވެ. އެހެންކަމުން، އަނިޔާގެ މައްސަލަ ކުރިއަށް ގެންދާނީތޯ ނުވަތަ ޚުލްޢު ވަރިއަކަށް ދާނީތޯ ނިންމުމުގެ އިޚްތިޔާރު އަންހެންމީހާއަށް ދޭންޖެހޭނެ ކަމަށް ކޯޓުން ވަނީ ކަނޑައަޅާފައެވެ.
ގެވެށި އަނިޔާގެ މާނަ ފުޅާކުރުން
މި ހުކުމުގައި ސުޕްރީމް ކޯޓުން ވަނީ ގެވެށި އަނިޔާގެ މާނަ އިތުރަށް ފުޅާކޮށްފައެވެ. އެގޮތުން ހަމައެކަނި ޖިސްމާނީ އަނިޔާގެ އިތުރުން، ނަފްސާނީ ގޮތުން ދޭ އަނިޔާއާއި، އަގުވައްޓާލައި މަލާމާތް ކުރުމާއި، ކަންކަމަށް މަޖުބޫރުކުރުމާއި، އަޅާނުލާ ދޫކޮށްލުމުގެ އިތުރުން އިހުސާސްތަކަށް ދޭ އަނިޔާއަކީވެސް ގެވެށި އަނިޔާގެ ތެރޭގައި ހިމެނޭ ކަންކަން ކަމަށް ކޯޓުން ވަނީ ބަޔާންކޮށްފައެވެ. މީގެ އިތުރުން ނަފްސާނީ އަނިޔާގެ ތެރޭގައި ދިގު މުއްދަތަކަށް އަޅާނުލާ ދޫކޮށްލުންވެސް ހިމެނެއެވެ.
ހެކިބަސް ހޯދުމުގެ މިންގަނޑު
އާއިލީ މައްސަލަތަކުގައި ހެކިބަސް ހޯދުމުގައި ޖިނާއީ މައްސަލަތަކުގައި ގެންގުޅޭ ފަދަ ހަރުކަށި މިންގަނޑުތައް ނުގެންގުޅުމަށް ފެމިލީ ކޯޓުތަކަށް ސުޕްރީމް ކޯޓުން ވަނީ އިރުޝާދު ދީފައެވެ. ކޯޓުން ފާހަގަކުރި ގޮތުގައި އާއިލީ މައްސަލަތަކުގައި މަންޒަރު ދުށް ހެކިން ނުވަތަ ފުލުހަށް ހުށަހެޅި ރިޕޯޓު ފަދަ ހެކިތަކަށް ބަލައިގެން ނުވާނެއެވެ. އޭގެ ބަދަލުގައި މައްސަލައިގެ ހަގީގަތްތަކާއި، ކަން ހިނގާފައިވާ ގޮތުގެ މައްޗަށް ބަލައިގެން ގޮތް ނިންމަންޖެހޭނެއެވެ.
މި މައްސަލައަކީ 2016 ވަނަ އަހަރު ކައިވެނިކޮށް، ކައިވެންޏަށް ކުޑަ ދުވަސްކޮޅެއްގެ ތެރޭގައި ވަކިވި ދެމަފިރިއެއްގެ މައްސަލައެކެވެ. ސުޕްރީމް ކޯޓުން ވަނީ ކުރިން ނިންމާފައިވާ ޚުލްޢު ވަރީގެ ނިންމުން ބާތިލުކޮށް، އަލުން މައްސަލަ ބެލުމަށް ފެމިލީ ކޯޓަށް ފޮނުވާފައެވެ. އަދި އަންހެންމީހާ ބޭނުންވަނީ އަނިޔާގެ މައްސަލަ ކުރިއަށް ގެންދަންތޯ ނުވަތަ ޚުލްޢު ވަރިވާންތޯ ބެލުމަށްފަހު، 30 ދުވަހުގެ ތެރޭގައި މައްސަލަ ނިންމުމަށް ވަނީ އަމުރުކޮށްފައެވެ.
