އިޓަލީގެ ޑޮލޮމައިޓްސްގައި ހުންނަ ފަސް ތަރީގެ ހޮޓަލަކުން ކެއުމުގެ ވަގުތުގައި ހިލޭ ބޯން އިސްކުރުން ފެން ދިނުމަށް އިންކާރު ކުރި މައްސަލަ އެގައުމުގެ އެންމެ މަތީ ކޯޓުން ބޭރުކޮށްލައިފިއެވެ. މި މައްސަލަ ކޯޓަށް ހުށަހެޅީ އެ ހޮޓަލުގައި މަޑުކުރި އިނގިރޭސި ފަތުރުވެރިއެކެވެ.
މި ހާދިސާ ހިނގާފައިވަނީ 2019 ވަނަ އަހަރުގެ ކްރިސްމަސް އަދި އާ އަހަރުގެ ބަންދާ ދިމާކޮށް، ކޯވާރާ ރިސޯޓުގެ ހޮޓަލެއްގައެވެ. އެ އަންހެން މީހާ ހޮޓަލުގައި ހުރީ ރޭގަނޑުގެ ކެއުން ހިމެނޭ ގޮތަށް ހާފް-ބޯޑް ހޯދައިގެންނެވެ. ނަމަވެސް، ބޯފެނަށް ވަކިން ފައިސާ ދައްކަން ޖެހޭ ގޮތަށެވެ. އޭނާ ކޮންމެ ރެއަކު ކެއުމުގެ ވަގުތުގައި ހިލޭ ފެން ބޯންވެގެން އިސްކުރުން ފެން ދިނުމަށް އެދުނު ނަމަވެސް، ހޮޓަލުން ވަނީ އެކަމަށް އިންކާރުކޮށްފައެވެ. އޭގެ ބަދަލުގައި ކޮންމެ ރެއަކު އޭނާގެ މޭޒުމަތީގައި ބަހައްޓާފައި ހުންނަނީ 7 ޔޫރޯގެ އަގުބޮޑު މިނަރަލް ވޯޓާ ފުޅިއެކެވެ.
ފަތުރުވެރިޔާ ކޯޓުގައި ބުނެފައި ވަނީ ފެނަކީ އިންސާނީ އަސާސީ ހައްގެއް ކަމަށާއި، ކޮންމެ މީހަކަށްވެސް ބޭނުންވާ މިންވަރަށް ފެން ލިބުމުގެ ފުރުސަތު އޮންނަންވާނެ ކަމަށެވެ. އޭނާ ފާހަގަކުރި ގޮތުގައި، ހޮޓަލަކުން ކޮޓަރި ކުއްޔަށް ހިފުމުން ސާފު ބެޑްޝީޓާއި ސައިބޯނި ލިބެންޖެހޭ ފަދައިން، ކެއުމުގެ ވަގުތުގައި އިސްކުރު ފެން ހިލޭ ލިބުމަކީވެސް ކަސްޓަމަރުންގެ ހައްގެކެވެ. މިކަމުގެ ސަބަބުން ލިބުނު މާލީ ގެއްލުމާއި ނަފްސާނީ ތަކުލީފުގެ ބަދަލެއްގެ ގޮތުގައި އޭނާ ވަނީ 2،700 ޔޫރޯ ހޯދުމަށް އެދިފައެވެ.
އިޓަލީގެ ދަށު ކޯޓުތަކުން މި މައްސަލަ ބޭރުކޮށްލުމުން، އެ އަންހެން މީހާ ވަނީ ސުޕްރީމް ކޯޓުގައި އިސްތިއުނާފު ކޮށްފައެވެ. ނަމަވެސް، ސުޕްރީމް ކޯޓުން ވެސް ނިންމީ އިޓަލީގެ އެއްވެސް ގާނޫނެއްގައި ރެސްޓޯރަންޓް ނުވަތަ ހޮޓާ ހިންގާ ފަރާތްތަކުން ކަސްޓަމަރުންނަށް އިސްކުރު ފެން ހިލޭ ދިނުން ލާޒިމްކޮށްފައި ނުވާ ކަމަށެވެ. އެހެންކަމުން، އެއީ ކަސްޓަމަރުންގެ ގާނޫނީ ހައްގެއް ނޫން ކަމަށް ކޯޓުން ވަނީ ކަނޑައަޅާފައެވެ.
އިޓަލީގެ ސަގާފަތުގައި ރެސްޓޯރަންޓްތަކުން ހިލޭ އިސްކުރު ފެން ހޯދުމަކީ އަދަބާ ޚިލާފު ކަމެއްގެ ގޮތުގައި ބެލެވުނު ނަމަވެސް، ތިމާވެއްޓަށް ލޯބިކުރާ ފަރާތްތަކުން ޕްލާސްޓިކް ފުޅި މަދުކުރުމުގެ ގޮތުން މިހާރު މިފަދަ ފެނަށް އެދޭ މިންވަރު ދަނީ އިތުރުވަމުންނެވެ.
