މާލީގެ އާއިލާއަކުން ހޯމަ ދުވަހު ވަނީ އެއްފަހަރާ އުފަންވި 9 ކުދިންގެ 5 ވަނަ އުފަންދުވަސް ފާހަގަކޮށްފައެވެ. މިއީ ޒަމާނީ މެޑިކަލް ސައިންސުގެ ރެކޯޑުތަކުގައި އެންމެ އާދަޔާޚިލާފު އެއް ހާދިސާގެ ގޮތުގައި ސިފަކުރެވޭ ހާދިސާއެކެވެ. ހުރިހާ ކުދިންވެސް ދިރިތިބުމާއެކު ގިނިސް ވޯލްޑް ރެކޯޑްސްއިން ޖާގަ ހޯދާފައިވާ މި އާއިލާއަށް އަނެއްކާވެސް މުޅި ދުނިޔޭގެ ސަމާލުކަން ވަނީ ހުއްޓިފައެވެ.
މި ތާރީޚީ ހާދިސާ ހިނގާފައިވަނީ 4 މެއި 2021 ގައެވެ. ހަލީމާ ސިސޭ އޭނާގެ 9 ކުދިން ވިހެއީ ވަރަށް ނާޒުކު ސިޒޭރިއަން އޮޕަރޭޝަނަކުންނެވެ. މި ބައިނަލްއަގުވާމީ މެޑިކަލް ހާދިސާ ހިނގާފައިވަނީ މޮރޮކޯގެ ކަސަބްލާންކާގެ އައިން ބޯރްޖާ ކްލިނިކްގައެވެ. މައިމީހާއާއި ކުދިންގެ ސަލާމަތްތެރިކަން ކަށަވަރުކުރުމަށްޓަކައި ވަރަށް ބޮޑު މެޑިކަލް ޓީމެއް ވަނީ ހަރަކާތްތެރިވެފައެވެ.
ގިނިސް ވޯލްޑް ރެކޯޑްސްއިން ކަށަވަރުކޮށްދޭ ގޮތުގައި، ހަލީމާ ސިސޭގެ ކުދިންގެ މި އުފަންވުމަކީ ދުނިޔޭގެ އެއްވެސް ތާކު މީގެ ކުރިން ހިނގާފައިނުވާ ފަދަ ތާރީޚީ ކަމެކެވެ. އެއްފަހަރާ 9 ކުދިން އުފަންވެ، ވިހެއުމަށްފަހު އަންނަ އެންމެ ނުރައްކާތެރި ފުރަތަމަ ގަޑިއިރުތަކާއި ދުވަސްތައް ފަހަނައަޅައި، ހުރިހާ ކުދިންވެސް ދިރިތިބުމަކީ މީގެ ކުރިން ރެކޯޑުކުރެވިފައިވާ ކަމެއް ނޫނެވެ.
މި ކާމިޔާބީއާއެކު، މާލީގެ މި އާއިލާއިން ވަނީ އެމެރިކާގެ ނާދިޔާ ސުލެއިމާން ހަދާފައިވާ ރެކޯޑު މުގުރާލާފައެވެ. ސުލެއިމާން ވަނީ 2009 ވަނަ އަހަރު 8 ކުދިން ވިހާފައެވެ. މޮރޮކޯގައި 9 ކުދިން އުފަންވަންދެން، ދިހަވަރަކަށް އަހަރު ވަންދެން މި ރެކޯޑު އޮތީ އޭނާގެ އަތުގައެވެ.
މެޑިކަލް ނަޒަރަކުން ބަލާއިރު، މި ކުދިން އުފަންވެފައިވަނީ ބަނޑަށް އެންމެ 30 ހަފްތާގައެވެ. އެހެންކަމުން އުފަންވިއިރު އެކުދިންގެ ބަރުދަން ވަރަށް ލުޔެވެ. އެވަގުތު ކުދިންގެ ބަރުދަނުގައި ހުރީ ބައި ކިލޯއާއި އެއް ކިލޯއާ ދެމެދުގެ މިންވަރެކެވެ. މީގެ ސަބަބުން ދިގު މުއްދަތަކަށް އިންޓެންސިވް ކެއާގައި އެކުދިން ބައިތިއްބަން ޖެހުނެވެ.
މިއަދު، 5 އަހަރު ފަހުން، މި 9 ކުދިންގެ ސިއްހަތުވެސް ވަރަށް ރަނގަޅެވެ. މިއީ ދެވުނު މެޑިކަލް ފަރުވާއާއި އާއިލާއިން ކުރި ބުރަ މަސައްކަތް ދައްކުވައިދޭ ކަމެކެވެ. މައިންބަފައިން ކަމަށްވާ އަބްދުލްގާދިރު އަރްބީ އާއި ހަލީމާ ސިސޭ މި އުފާވެރި މުނާސަބަތު ފާހަގަކުރަމުންދަނީ ނުހަނު އުފަލާއި ޝުކުރުވެރިކަމާއެކުގައެވެ. އަދި އެކުދިން ދިރިތިބުމަކީ ހަގީގީ މުއުޖިޒާތެއް ކަމަށާއި، މިއީ ކާމިޔާބުކަމާއެކު ކަޑައްތުކުރެވުނު ވަރަށް ބޮޑު ގޮންޖެހުމެއް ކަމަށް އެމީހުން ދެކެއެވެ.
ގިނިސް ވޯލްޑް ރެކޯޑްސްއިން ވަނީ އެމީހުންގެ ރަސްމީ ޕްލެޓްފޯމްތަކުގައި މި 9 ކުދިންގެ ގޭތެރޭގެ އާންމު ދިރިއުޅުމުގެ ވީޑިއޯތަކެއް ދާދިފަހުން ހިއްސާކޮށްފައެވެ. މި ވީޑިއޯތަކުން، މީޑިއާގައި "ސުޕަރމޮމް" ގެ ނަމުން މަޝްހޫރުވެފައިވާ އެކުދިންގެ މަންމައާއެކު ކުދިން ކުޅެ، ކައިބޮއި ހަދާތަން ފެނެއެވެ.
އަދި އެކުދިން ސްކޫލަށް ގޮސް، އެހެން ކުދިންނެކޭ އެއްފަދައިން ކްލާސްތަކުގައި ބައިވެރިވާ މަންޒަރުތައްވެސް ފެނެއެވެ. މި މަންޒަރުތަކުން ޔަގީންކޮށްދެނީ، ޑޮކްޓަރުން ކަންބޮޑުވި ނާޒުކު ހާލަތަކުން ފެށިގެން، އާދައިގެ ކުދިން ފަދައިން ހެދިބޮޑުވަމުން އަންނަ ކުދިންތަކަކަށް އެކުދިން ބަދަލުވެފައިވާކަމެވެ.
