ދުނިޔޭގެ ބޮޑު ދެ ބާރު ކަމަށްވާ އެމެރިކާ އާއި ޗައިނާއިން އދ. އަށް ދައްކަންޖެހޭ އެތައް ބިލިއަން ޑޮލަރެއް ނުދީ ހިފެހެއްޓުމުގެ ސަބަބުން، އެ ޖަމިއްޔާއަށް ވަނީ މާލީ ބޮޑު ކާރިސާއަކާ ކުރިމަތިވެފައެވެ. މިއީ އދ. ގެ ތެރޭގައި ނުފޫޒު ފޯރުވުމަށް މި ދެ ގައުމުގެ މެދުގައި އުފެދިފައިވާ ވާދަވެރިކަމުގެ ތެރެއިން އައިސްފައިވާ ހާލަތެކެވެ.
އެމެރިކާއިން ވަނީ އދ. އަށް ދައްކަންޖެހޭ 4 ބިލިއަން ޑޮލަރަށްވުރެ ގިނަ ފައިސާ ނުދީ ހިފަހައްޓާފައެވެ. އަދި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާއި އދ. ގެ އެތައް ޕްރޮގްރާމްތަކަކާއި އެޖެންސީތަކަކުން އެ ގައުމު ވަނީ ވަކިވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވާ ގޮތުގައި މިއީ "އިސްރާފުކުރުމާއި ގޯސްކޮށް ކަންކަން ހިންގުމާ ދެކޮޅަށް" އެޅި ފިޔަވަޅެކެވެ. އެމެރިކާއިން ބުނެފައިވަނީ އިތުރު ފައިސާ ދޭނީ އދ. ގެ ނިޒާމަށް ބޮޑެތި ބަދަލުތަކެއް ގެނެސް، ޚަރަދުތައް ކުޑަކުރުމުން ކަމަށެވެ. އޭގެ ތެރޭގައި ހިމެނެނީ:
- ވަޒީފާތައް މަދުކުރުން.
- ފަސްޓް ކްލާސްގައި ދަތުރުކުރުން މަދުކުރުން.
- އޮޓޮމެޓިކުން ތަރުޖަމާކުރާ ނިޒާމުތައް (މެޝިން ޓްރާންސްލޭޝަން) އިތުރަށް ބޭނުންކުރުން.
ޗައިނާގެ ފައިސާ ދެއްކުން ލަސްވުން
އދ. ގެ ދިފާއުގައި މަސައްކަތް ކުރާ އަދި މާލީ ގޮތުން އެންމެ ބޮޑު އެހީތެރިޔާ ކަމަށް ޗައިނާއިން އަމިއްލައަށް ދައުވާކުރި ނަމަވެސް، އެ ގައުމުން ފައިސާ ދެއްކުން ލަސްކުރުމުގެ ސަބަބުން އދ. ގެ މާލީ ދަތިކަން ވަނީ އިތުރަށް ގޯސްވެފައެވެ. ޗައިނާގެ ޚާރިޖީ ވަޒީރު ވަންގް ޔީ ދާދިފަހުން ކުރެއްވި ދަތުރުފުޅެއްގައި 850 މިލިއަން ޑޮލަރު ދެއްކި ނަމަވެސް، އަދިވެސް ޗައިނާއިން އދ. އަށް 455 މިލިއަން ޑޮލަރު ދައްކަން އެބައޮތެވެ. ޗައިނާއިން ބުނެފައިވަނީ އެ ގައުމުން ދައްކަންޖެހޭ ފައިސާ ދައްކާނެ ކަމަށެވެ.
އދ. ގެ އަސާސީ ބަޖެޓުގެ 42 އިންސައްތަ ބަރޯސާވެފައިވަނީ އެމެރިކާ އާއި ޗައިނާގެ ފައިސާއަށެވެ. އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ވަނީ، އެ ޖަމިއްޔާ މިހާރު ދަތުރުކުރަމުންދަނީ "ބަނގުރޫޓުވުމާ ދިމާއަށް" ކަމަށް ވިދާޅުވެ، މާލީ ގޮތުން އެއްކޮށް އިނދަޖެހުމުގެ ބިރު އެބައޮތް ކަމަށް އިންޒާރުދެއްވާފައެވެ.
އދ. އިން ލަފާކުރާ ގޮތުގައި މިހާރު ކަންކަން ހުރި ގޮތުން އޮގަސްޓް މަހުގެ މެދުތެރެއާ ހަމައަށް ދާއިރު އެ ޖަމިއްޔާގެ އަތުން ނަގުދު ފައިސާ ހުސްވާނެއެވެ. މި މާލީ އަނދަވަޅުގެ ތެރޭގައި، ގުޓަރޭސްގެ މަގާމަށް ދެން ވަޑައިގަންނަވާނެ ބޭފުޅަކު ހޮވުމުގެ މަސައްކަތްތައްވެސް މިހާރު ދަނީ ބާރަށް ކުރިއަށެވެ.
