"އެޗް.ކިއު-16އެފް": ޗައިނާއިން ތައިވާން ކަނޑުއޮޅި ކައިރީގައި ފުޅާ ދާއިރާއެއްގެ ވައިގެ ދިފާޢީ ނިޒާމެއް ގާއިމުކޮށްފި
ޗައިނާގެ ސިފައިންގެ އިރުމަތީ ތިއޭޓަރު ކޮމާންޑުން ވަނީ، އެގައުމުގެ ދިފާޢީ ގާބިލުކަން ވަރުގަދަކުރުމުގެ ގޮތުން ދުރު ރާސްތާގެ ވައިގެ ދިފާޢީ ނިޒާމެއް ކަމަށްވާ "އެޗް.ކިއު-16″ ގެ އެންމެ ފަހުގެ މޮޑެލް "އެޗް.ކިއު-16އެފް" ރުކުރުވާލާފައެވެ. މި ނިޒާމު ފުރަތަމަ ފަހަރަށް ދައްކާލާފައިވަނީ 2022 ވަނަ އަހަރުއެވެ.
މި ނިޒާމު ޗައިނާގެ ފޫޖިއާން ޕްރޮވިންސްގައި ގާއިމުކުރުމަކީ ސްޓްރެޓީޖިކްގޮތުން ވަރަށް މުހިންމު ނިންމުމެކެވެ. ސަބަބަކީ އެ ސަރަހައްދަކީ ކުރިމަތިލުމެއް ހިނގުމުގެ ފުރުސަތު ބޮޑު ތައިވާން ކަނޑުއޮޅިއާ ކުރިމަތީގައި އޮންނަ ސަރަހައްދަކަށް ވުމުގެ އިތުރުން، މި އައު ނިޒާމުގެ ސަބަބުން ޗައިނާއަށް ލިބިގެންދާ ދިފާޢީ ބާރުވެސް ބޮޑުވުމެވެ.
ޗައިނާއިން މި ފިޔަވަޅު އަޅާފައިވަނީ، އެމެރިކާއިން ތައިވާނަށް "ހައިމާސް" ރޮކެޓް އާޓިލަރީ އާއި "އެޓަކަމްސް" ބެލިސްޓިކް މިސައިލް ވިއްކުމާ ގުޅިގެންނެވެ. ޗައިނާއިން ބެހެއްޓި ދިފާއީ ނިޒާމަކީ އެމެރިކާގެ ނިޒާމަށް ވުރެން މާކުރިއަރާފައިވާ ނިޒާމެކެވެ. ޗައިނާގެ މައި ބިމާއި ތައިވާނާ ދެމެދު އަދިވެސް ދާޚިލީ ހަނގުރާމައިގެ ނުތަނަވަސްކަން ދެމިއޮވެއެވެ.
މިދިޔަ ޖެނުއަރީ މަހުގެ ފަހުކޮޅު، ތައިވާނުގެ ދިފާޢީ ވުޒާރާގެ ޖޮއިންޓް ފަޔަރޕަވަރ ކޯޑިނޭޝަން ސެންޓަރުގައި އެމެރިކާގެ އަސްކަރީ މުވައްޒަފުން ދާއިމީގޮތެއްގައި ތައިޕޭގައި ބައިތިއްބަން ވަނީ ފަށާފައެވެ. އެއީ ޗައިނާއަށް ނުރައްކާވެދާނެ ފަދަ މިސައިލް ބޭނުންކުރުމުގެ ޕްލޭންތައް ބެލެހެއްޓުމަށެވެ. އަދި ފެބްރުއަރީ މަހުގެ ކުރީކޮޅު، ޗައިނާގެ އައްސޭރިފަށާ އެންމެ 16 ކިލޯމީޓަރު ކައިރީގައި "އެޓަކަމްސް" ބެލިސްޓިކް މިސައިލްތައް ގާއިމުކުރުމާ މެދު ގޮތްތަކެއް ނިންމަމުންދާކަން ވަނީ ކަށަވަރުވެފައެވެ.
"އެޗް.ކިއު-16އެފް" ނޒާމުގައި ބޭނުންކުރަނީ ކުރީގެ މޮޑެލްތަކަށްވުރެ ތުނި، ލުއި އަދި ފަހަތު ފިޔަގަނޑު ނުހުންނަ ކަހަލަ ޒަމާނީ މިސައިލްތަކެކެވެ. މީގެ އެންމެ ދުރަށް ދަތުރުކުރުމުގެ ގާބިލުކަން ވަނީ 160 ކިލޯމީޓަރަށް އިތުރުކޮށްފައެވެ. މިއީ "އެޗް.ކިއު-16″ ގެ އާއިލާއިން "ދުރު ރޭންޖުގެ" ދިފާޢީ ނިޒާމެއްގެ ގޮތުގައި ކަނޑައެޅުނު ފުރަތަމަ މޮޑެލްއެވެ. މީގެ ކުރީގެ މޮޑެލްތައް ހިމެނެނީ މެދު ރޭންޖުގެ ނިޒާމުތަކުގެ ތެރޭގައެވެ.
އަޅާކިޔާލާއިރު:
- އެޗް.ކިއު-16 އަދި އެޗް.ކިއު-16އޭ: ރޭންޖަކީ ގާތްގަނޑަކަށް 40 ކިލޯމީޓަރެވެ.
- އެޗް.ކިއު-16ބީ އަދި އެޗް.ކިއު-16ސީ: ރޭންޖަކީ ގާތްގަނޑަކަށް 70 ކިލޯމީޓަރެވެ. (މިއީ އައު މޮޑެލްގެ ދެބައިކުޅަ އެއްބަޔަށްވުރެ ކުޑަ ރޭންޖެކެވެ).
މި އައު ނިޒާމުގައި ދުޝްމަނުންގެ ރާޑަރު ޖޭމްކުރުންތަކުން ސަލާމަތްވުމުގެ ގާބިލުކަން އިތުރުވެ، އެއްފަހަރާ ގިނަ މިސައިލް ހަމަލާތަކަކާ ކުރިމަތިލުމުގެ ބާރު ލިބެއެވެ. އަދި ކުރީގެ ނިޒާމުތަކުގައި "ޕެސިވް" އިލެކްޓްރޯނިކް ރާޑަރު ބޭނުންކުރި ނަމަވެސް، އައު "އެޗް.ކިއު-16އެފް" ގައި ބޭނުންކުރަނީ "އެކްޓިވް އިލެކްޓްރޯނިކަލީ ސްކޭންޑް އެރޭ" ރާޑަރެކެވެ.
މިސައިލްތަކާ ދެކޮޅަށް ދުނިޔޭގައިވާ އެންމެ ފުރިހަމަ ދِފާޢީ ނިޒާމު
ބެލިސްޓިކް މިސައިލް ހަމަލާތަކުން ސަލާމަތްވުމަށްޓަކައި ޗައިނާގެ ސިފައިން އިން ވަނީ ތަފާތު އެކި ފަށަލަތަކުން އެކުލެވޭ ދިފާޢީ ނިޒާމެއް ގާއިމުކޮށްފައެވެ. މިއީ ދުނިޔޭގައިވާ އެންމެ ވަރުގަދަ އަދِ އެންމެ ނަތީޖާ ނެރެދޭ ނިޒާމު ކަމަށް ގިނަ ބަޔަކު ގަބޫލުކުރެއެވެ. މި ނިޒާމު ބިނާވެފައިވަނީ އެއްގަމާއި ކަނޑުގައި ގާއިމުކޮށްފައިވާ އެއްބަޔަކު އަނެއްބަޔަކާ ގުޅިފައިވާ ޒަމާނީ ވަސީލަތްތަކެއްގެ މައްޗަށެވެ.
- އެޗް.ކިއު-29: ސެޕްޓެމްބަރު 2025 ގައި މި ނިޒާމު ބޭނުންކުރަން ފަށާފައިވާކަން ކަށަވަރުވެފައިވާއިރު، މިއީ ރަޝިޔާގެ S-500 އަދި A-235 ނިޒާމު ފިޔަވައި، ބައްރުން ބައްރަށް ފޮނުވާލާ ބެލިސްޓިކް މިސައިލްތައް ޝިކާރަ ކުރުމުގެ ގާބިލުކަން ލިބިގެންވާ ދުނިޔޭގައިވާ ހަމައެކަނި މޮބައިލް ނިޒާމެވެ.
- އެޗް.ކިއު-19: މިއީ އެޗް.ކިއު-29 އަށްވުރެ ތިރީ ފަށަލައެއްގައި މަސައްކަތްކުރާ، އެމެރިކާގެ "ތާޑް" ނިޒާމާ ދާދި އެއްފަދަ ގާބިލުކަމެއް ލިބިގެންވާ ނިޒާމެކެވެ. މިއީ މެދުރާސްތާގެ ބެލިސްޓިކް މިސައިލްތައް ހުއްޓުވުމަށް އެންމެ އެކަށީގެންވާ ނިޒާމެވެ.
- އެޗް.ކިއު-16: މިއީ މި ދިފާޢީ ވިއުގަައިގެ އެންމެ ތިރީ ފަށަލައިގައި ހިމެނޭ ނިޒާމެކެވެ. އަދި މީގެ ދައުރަކީ ދުރު ރޭންޖުގެ "އެޗް.ކިއު-9″ ނިޒާމާ ގުޅިގެން މަސައްކަތް ކުރުމެވެ.
