ޗައިނާގެ ސިފައިން ޓައިވާން ވަށައިގެންވާ ސަރަޙައްދުގައި ހިންގަމުންދާ ހަރަކާތްތައް އިތުރުކޮށްފައިވާ ދަނޑިވަޅެއްގައި، ޓައިވާނުގެ ވަށައިގެންވާ ކަނޑާއި ވައިގެ ސަރަޙައްދުން ޗައިނާގެ 7 އަސްކަރީ ބޯޓާއި ޖުމްލަ 16 އުޅަނދެއް ފެނިފައިވާ ކަމަށް ޓައިވާނުގެ ދިފާޢީ ވުޒާރާއިން ހާމަކޮށްފިއެވެ. ޓައިވާނުން ބުނި ގޮތުގައި ފާއިތުވި 24 ގަޑިއިރުގެ ތެރޭގައި ފެނުނު މި އުޅަނދުތަކުގެ ތެރޭގައި ޗައިނާގެ ކަނޑުގެ ސިފައިންގެ 10 މަނަވަރާއި، ކޯސްޓްގާޑުގެ 6 ބޯޓު ހިމެނެއެވެ.
ޓައިވާނުގެ ދިފާޢީ ވުޒާރާއިން ނެރުނު ބަޔާނެއްގައި ބުނެފައިވަނީ، ޗައިނާގެ ބައެއް އަސްކަރީ މަތިންދާބޯޓުތައް ވަނީ ޓައިވާން ކަނޑުއޮޅީގެ ރަސްމީ މީޑިއަން ލައިން (ދެފަރާތް ވަކިކުރާ ރޮނގު) ހުރަސްކޮށް، ޓައިވާނުގެ ވައިގެ ދިފާޢީ ސަރަޙައްދަށް ވަދެފައެވެ. ޗައިނާއިން މިފަދަ ހަރަކާތްތައް މެދުނުކެނޑި ހިންގަމުންދަނީ ޓައިވާނަށް ނުފޫޒު ފޯރުވުމަށާއި، އެ ޤައުމުގެ އަސްކަރީ ތައްޔާރީތައް ވަޒަންކުރުމުގެ ގޮތުން ކަމަށް ޓައިވާނުން ތުހުމަތުކުރެއެވެ.
މި ހަރަކާތްތަކާ ގުޅިގެން ޓައިވާނުގެ ސިފައިން ވަނީ ތައްޔާރީ ހާލަތަކަށް އައިސްފައެވެ. އެގޮތުން ޗައިނާގެ އުޅަނދުތަކުގެ ހަރަކާތްތައް ވަރަށް ގާތުން ބެލުމަށްޓަކައި ޓައިވާނުގެ އަސްކަރީ މަތިންދާބޯޓުތަކާއި، ކަނޑުގެ ސިފައިންގެ މަނަވަރުތަކުގެ އިތުރުން ބިމުން ވައިގެ ތެރެއަށް ފޮނުވާލާ މިސައިލް ސިސްޓަމްތައް ވަނީ އެ ސަރަޙައްދުތަކަށް ތައްޔާރުކޮށްފައެވެ. ޗައިނާއިން އަބަދުވެސް ދަނީ ޓައިވާނަކީ އެ ޤައުމުގެ އަމިއްލަ ބައެއްގެ ގޮތުގައި ވަކާލާތުކުރަމުންނެވެ.
