އެމެރިކާއިން އީރާނުގެ އައްސޭރިފަށުގެ ސަރަޙައްދުތަކަށް ދިން ހަމަލާތަކަށް ރައްދުދިނުމުގެ ގޮތުން، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ހޮނިހިރުދުވަހު ގަލްފް ސަރަޙައްދުގައި ހުރި "ދުޝްމަނުންގެ އަސްކަރީ މަޒރުކަޒުތަކަށް" އަމާޒުކޮށް ވައިގެ މަގުން މިސައިލް ހަމަލާތަކެއް ދީފިއެވެ.
އީރާނުގެ ސިފައިން މިސައިލްތައް ފޮނުވާލާފައިވަނީ، ހުރުމުޒު ކަނޑުއޮޅިއާ ދިމާއަށް އީރާނުން ފޮނުވާލި 4 ޑްރޯން ވައްޓާލުމަށްފަހު އެމެރިކާއިން އީރާނުގެ ސިރީކް އަދި ޤެޝްމް ޖަޒީރާގައި ހުރި ރާޑަރު މަރުކަޒުތަކަށް ހަމަލާދިންތާ މަދު ގަޑިއިރުތަކެއްގެ ތެރޭގައެވެ. އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ކުރިން ބުނެފައިވަނީ އެމީހުންގެ ހަމަލާތަކަކީ ކަނޑުގެ ދަތުރުފަތުރަށް ކުރިމަތިވި ނުރައްކަލަކުން ސަލާމަތްވުމަށް ދިފާޢީގޮތުން ދިން ހަމަލާތަކެއް ކަމަށެވެ.
މި އަސްކަރީ ކުރިމަތިލުންތައް ކުއްލިގޮތަކަށް ފުޅާވެ، އަވަށްޓެރި ގަލްފުގެ ޤައުމުތަކަށްވެސް މިހާރު ވަނީ އޭގެ އަސަރުކޮށްފައެވެ.
- ކުވެއިތުގެ ސިފައިން ބުނިގޮތުގައި އެ ޤައުމަށް ކުރިމަތިވަމުންދާ ޑްރޯން އަދި މިސައިލްގެ ނުރައްކާތަކުން ދިފާޢުވުމަށް ސިފައިން ދަނީ ހަރަކާތްތެރިވަމުންނެވެ.
- ބަޙްރައިނުން ވަނީ ވައިގެ ހަމަލާތަކުން ރައްކާތެރިވުމުގެ ސައިރަންތައް އަޅުވައި، އާންމު ރައްޔިތުން ރައްކާތެރި ހިސާބުތަކަށް ވަނުމަށް އަމުރުކޮށްފައެވެ.
މީގެ އިތުރުން، އައި.އާރް.ޖީ.ސީ އިން ވަނީ ވޮޝިންގްޓަނަށް ވަރުގަދަ އިންޒާރެއް ދީފައެވެ. އީރާނުން ބުނީ އެމެރިކާގެ "ނޭދެވޭ" ހަރަކާތްތަކާއި ދޭތެރެއަކުންދޭ ހަމަލާތައް ހުއްޓާނުލައިފިނަމަ، ހުރުމުޒު ކަނޑއޮޅި އެއްކޮށް ބަންދުކުރާނެ ކަމަށެވެ. އަދި އެކަމުގެ ސަބަބުން ދުނިޔެއަށް ތެލާއި ގޭސް އެކްސްޕޯޓްކުރުން ހުއްޓި، ނިކުންނާނެ ހުރިހާ ނަތީޖާއެއްގެ ފުރިހަމަ މަސްއޫލިއްޔަތު އުފުލަންޖެހޭނީ އެމެރިކާއިން ކަމަށްވެސް އީރާނުގެ އަސްކަރީ ކޮމާންޑުން ބުނެފައިވެއެވެ.
