އދ ގެ މިއަހަރުގެ "މިލިޓަރީ ޖެންޑަރ އެޑްވޮކޭޓް އޮފް ދަ އިޔަރ" އެވޯޑް ހާސިލްކުރި އިންޑިއާ ސުލްހަ ބަލަހައްޓާ ލަޝްކަރުގެ މޭޖަރ އަބީލާޝާ ބަރަކްއަށް އިންޑިއާގެ ބޮޑުވަޒީރު ނަރެންދުރަ މޯދީ ވަރަށް ހޫނު މަރުޙަބާއެއް ވިދާޅުވެއްޖެއެވެ. މިއީ ބައިނަލްއަޤްވާމީ ފެންވަރުގައި އިންޑިއާގެ އަންހެން ސިފައިން ހޯދި ފަޚުރުވެރި އަދި ތާރީޚީ ކާމިޔާބީއެކެވެ.
އދ ގެ ސުލްޙަ ބަލަހައްޓާ ފައުޖުތަކުގައި ކުރި ހިތްވަރުގަދަ މަސައްކަތްތަކާއި، އަސްކަރިއްޔާގެ ތެރޭގައި އަންހެނުންގެ ދައުރު ފުޅާކުރުމަށް ކުރި ޚިދުމަތްތަކުގެ އަގުވަޒަންކޮށް ދިން މި އެވޯޑާ ގުޅިގެން ބޮޑުވަޒީރު މޯދީ ވިދާޅުވީ، މޭޖަރ އަބީލާޝާގެ މި ކާމިޔާބީއަކީ މުޅި ޤައުމަށް ލިބުނު ފަޚުރެއް ކަމަށެވެ. އަދި އޭނާގެ ސާބިތުކަމާއި ހިތްވަރަކީ އިންޑިއާގެ އެތައް މިލިއަން އަންހެން ކުދިންނަކަށް ލިބިގެންދާނެ ބޮޑު ހިތްވަރެއް ކަމަށްވެސް ބޮޑުވަޒީރު ވިދާޅުވިއެވެ.
މޭޖަރ އަބީލާޝާ ބަރަކް އަކީ މީގެ ކުރިން އިންޑިއާގެ ވައިގެ ސިފައިންގެ ފްލައިންގް އޮފިސަރެއްގެ ގޮތުގައި ފުރަތަމަ ފަހަރަށް ގުޅުނު އަންހެން ކޮމްބެޓް އޭވިއޭޓަރުވެސް މެއެވެ. އޭނާ އދ ގެ މިޝަންތަކުގައި މަސައްކަތްކުރިއިރު، ހަނގުރާމަވެރި ސަރަޙައްދުތަކުގައި ތިބި އަންހެނުންނާއި ކުޑަކުދިންގެ ހައްޤުތައް ހިމާޔަތްކުރުމަށާއި، ސުލްޙައިގެ މަޝްވަރާތަކުގައި އަންހެނުންގެ ބައިވެރިވުން އިތުރުކުރުމަށް ގިނަގުނަ މަސައްކަތްތަކެއް ކޮށްފައިވެއެވެ.
އދ އިން ހާމަކުރިގޮތުގައި، މި އެވޯޑަކީ ސިފައންގެ ތެރޭގައި ޖިންސީ ހަމަހަމަކަން ޤާއިމުކުރުމަށާއި، ބައިނަލްއަޤްވާމީ ސުލްޙަ ބެލެހެއްޓުމުގެ ދާއިރާއިން އާދަޔާޚިލާފު ނަމޫނާއެއް ދައްކާ ފަރާތްތަކަށްދޭ އެންމެ މަތީ އެވޯޑެވެ. މޭޖަރ އަބީލާޝާގެ މި ކާމިޔާބީއަށް އިންޑިއާގެ ދިފާޢީ ވުޒާރާއިންނާއި އަސްކަރިއްޔާގެ އިސްވެރިންވެސް ދަނީ ތައުރީފްކުރަމުންނެވެ.
