އެޕަލް އާއި ގޫގުލް ފަދަ ދުނިޔޭގެ އެންމެ ބޮޑެތި ޓެކްނޮލޮޖީ ކުންފުނިތަކުން، އުމުރުން 18 އަހަރުން ދަށުގެ ކުދިން ބޭނުންކުރާ ސްމާޓްފޯނުތަކާއި އެހެނިހެން ވަސީލަތްތަކުން ބަރަހަނާ މަންޒަރުތައް ނުފެންނާނެހެން ބްލޮކްކުރަން އިނގިރޭސިވިލާތުގެ ސަރުކާރުން އަންގައިފިއެވެ.
ލަންޑަން ޓެކް ވީކްގައި ވާހަކަދައްކަވަމުން އިނގިރޭސި ބޮޑުވަޒީރު ސަރ ކިއަރ ސްޓާމަރ ވިދާޅުވީ، ކުޑަކުދިން އަމިއްލައަށް ބަރަހަނާ ފޮޓޯ ނެގުމާއި، އެހެން މީހުންނަށް ފޮނުވުމާއި، އަދި ބެލުން ހުއްޓުވުމަށްޓަކައި ފޯނުތަކުގައި ކުރިންސުރެ ހުންނަ ސޭފްޓީ ފީޗާތައް އެކްޓިވްކުރަންޖެހޭ ކަމަށެވެ. ނުވަތަ އެކަމަށް ޚާއްޞަކޮށް ފޯނުގެ އޮޕަރޭޓިންގ ސިސްޓަމްތައް އަޕްޑޭޓްކުރަން ޖެހޭނެ ކަމަށެވެ.
"މިއީ ނުކުރެވޭނެ ވަރުގެ ކަމެއް ނޫން. މިއީ ދުނިޔޭގައި ހުރި އެންމެ އީޖާދީ ކުންފުނިތައް. އަހަރެން ގަބޫލުކުރަން މި މައްސަލަ އެމީހުންނަށް ޙައްލުކުރެވޭނެ ކަމަށް،" ބޮޑުވަޒީރު ވިދާޅުވިއެވެ.
އިނގިރޭސި ސަރުކާރުން ވަނީ މި ބަދަލުތައް ގެނައުމަށް ޓެކް ކުންފުނިތަކަށް 3 މަސްދުވަހުގެ މުހުލަތެއް ދީފައެވެ. އަމިއްލައަށް އެދިގެން މިކަން ނުކޮށްފިނަމަ، މަޖުބޫރުކޮށްގެން މިކަން ކުރުވުމަށް އާ ޤާނޫނެއް ނެރޭނެ ކަމުގެ އިންޒާރު ސަރުކާރުން ވަނީ ދީފައެވެ. އެ ޤާނޫނާ ޚިލާފުވާ ކުންފުނިތައް ބޮޑު އަދަދަކުން ޖޫރިމަނާކުރުމާއި، އެންމެ ފަހުގެ ފިޔަވަޅެއްގެ ގޮތުން ކުންފުނިތަކުގެ ވެރިންގެ މައްޗަށް ޖިނާއީ ދަޢުވާ އުފުލުންވެސް ހިމެނެއެވެ.
މި ބަދަލުތައް ހިނގާނީ އިނގިރޭސިވިލާތުގައި މިހާރު ބޭނުންކުރަމުންދާ ފޯނުތަކަށާއި އަލަށް ވިއްކާ ސްމާޓްފޯނުތަކާއި ޓެބްލެޓްތަކަށެވެ. ނަމަވެސް، އުމުރު ކަށަވަރުކޮށްގެން ފޯނު ބޭނުންކުރާ ބޮޑެތި މީހުންނަށް މީގެ ސަބަބުން އެއްވެސް ހުރަހެއް ކުރިމަތެއް ނުވާނެއެވެ.
މިކަމާ ގުޅިގެން ގޫގުލްގެ ތަރުޖަމާނަކު ބުނީ، އޮންލައިންކޮށް ކުޑަކުދިން ހިމާޔަތްކުރެވޭނެ ފަދަ ނިޒާމެއްގެ ތެރެއިން މިކަމަށް ޙައްލެއް ހޯދުމަށް އިނގިރޭސި ސަރުކާރާއެކު މަސައްކަތްކުރަމުންދާ ކަމަށް ބުންޏެވެ. އެޕަލް ކުންފުނިން މިހާރުވެސް އިނގިރޭސިވިލާތުގެ ޔޫޒަރުންގެ އުމުރު ކަށަވަރުކުރުމާއި، ބައެއް އެޕްތަކުގައި ބަރަހަނާ މަންޒަރުތައް ބްލޮކްކުރާނެ ޚިދުމަތްތައް ޤާއިމުކޮށްފައިވެއެވެ.
އިނގިރޭސިވިލާތުގެ ހޯމް ސެކްރެޓަރީ ޝަބާނާ މަޙްމޫދު ވިދާޅުވީ، ކުޑަކުދިން ބަރަހަނާ ފޮޓޯ ނެގުމާއި ބެލުން ހުއްޓުވުމަކީ ޓެކް ކުންފުނިތަކުގެ މާލީ ވާޖިބެއްގެ އިތުރުން "އަޚްލާޤީ ވާޖިބެއް" ކަމަށެވެ.
ސަރުކާރުގެ ތަފާސްހިސާބުތައް ދައްކާގޮތުން، 2024 ވަނަ އަހަރު ރިޕޯޓްކޮށްފައިވާ ކުޑަކުދިންނަށް ކުރާ ޖިންސީ ގޯނާގެ މައްސަލަތަކުގެ 91% އަކީ ކުދިން އަމިއްލައަށް ނަގާފައިވާ ބަރަހަނާ ފޮޓޯއާއި ވީޑިއޯއެވެ. އަދި މިހާރު އެވްރެޖްކޮށް ކުދިންނަށް އުމުރުން އެންމެ 13 އަހަރުގައި ބަރަހަނާ މަންޒަރުތައް ފެންނަ ކަމަށް ރިޕޯޓްތައް ބުނެއެވެ.
ކުޑަކުދިންގެ ޙައްޤުތަކަށް މަސައްކަތްކުރާ ޖަމްޢިއްޔާއެއްގެ މެނޭޖިންގ ޑިރެކްޓަރު ކްރިސް ޝެރްވުޑް މި ނިންމުމަށް ވަރަށް ބޮޑަށް ތާއީދުކުރައްވައި ވިދާޅުވީ، "ބޮޑެތި ޓެކް ކުންފުނިތަކަށް ދީފައިވާ ވަގުތު މިހާރު ހަމަވެއްޖެ" ކަމަށެވެ. ނަމަވެސް ބައެއް ރިޕޯޓްތައް ބުނާގޮތުން، މިއީ އިންޓަނެޓް ބޭނުންކުރުމަށްޓަކައި ޕާސްޕޯޓް ނުވަތަ އައިޑީ ކާޑު ދައްކަން މަޖުބޫރުކުރުން ފަދަ ކަމަކަށް ވެދާނެތީ، އާންމުންގެ ޕްރައިވެސީއަށް ލޯބިކުރާ ބައެއް ޖަމްޢިއްޔާތަކުން ދަނީ މިކަމާ މެދު ކަންބޮޑުވުން ފާޅުކުރަމުންނެވެ.
