އީރާނުގެ ދެކުނުގެ ސަރަޙައްދުތަކަށް އެމެރިކާއިން ދިން ޢުދާވާނީ ޙަމަލާތަކަށް ރައްދުދިނުމުގެ ގޮތުން، ބަޙްރައިންގައި ހުންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓުގެ މަރުކަޒަށް އީރާނުގެ ރިވޮލިއުޝަނަރީ ގާޑްސްއިން ކާމިޔާބު ކަމާއެކު ޑްރޯން ޙަމަލާތަކެއް ދީފިއެވެ. އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ވަނީ އެމެރިކާއިން ހިންގި މި އަނިޔާވެރި ޢަމަލުތަކަށް އީރާނުން ހިމޭނުން ނޯންނާނެ ކަމަށާއި، ސަރަޙައްދީ ސަލާމަތްތެރިކަން ބޭނުންނަމަ އެމެރިކާގެ ސިފައިން ވަގުތުން މި ސަރަޙައްދު ދޫކޮށް ދިއުމަށް ގޮވާލައްވާފައެވެ.
އީރާނުން ބުނި ގޮތުގައި އެޤައުމުގެ ދެކުނުގެ ރަށްތަކަށް އެމެރިކާއިން ދިން ވިއްސަކަށް ޙަމަލާގެ ރައްދުގައި ދިން މި ޑްރޯން ޙަމަލާތަކާއެކު ދެފަރާތުގެ ދެމެދުގައި ވަރުގަދަ ކުރިމަތިލުންތަކެއް ވަނީ ހިނގާފައެވެ. އީރާނުގެ މި ވަރުގަދަ ރައްދާއެކު، އެމެރިކާގެ ސެންޓްރަލް ކޮމާންޑަށް ވަނީ އީރާނާ ދެކޮޅަށް ދެމުންދިޔަ ޙަމަލާތައް ނިންމާލާފައިވާ ކަމަށް ބުދަ ދުވަހުގެ ފަތިހު އަވަސްއަވަހަށް އިޢުލާންކުރަން މަޖުބޫރުވެފައެވެ. އީރާނުން ވަނީ އެމެރިކާއިން މިފަދަ ނުރައްކާތެރި ޢަމަލުތައް ތަކުރާރުކުރާނަމަ، މިއަށްވުރެ މާ ހަރުކަށި އަދި ވޭންދެނިވި ރައްދެއް ދޭނެ ކަމަށް އިންޒާރުދީފައެވެ.
އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ބުދަ ދުވަހުގެ ހެނދުނު ވިދާޅުވީ، ހަނގުރާމައިގެ މައިދާނުގައި އެމެރިކާއަށް ބޮޑެތި ބަލިވުންތަކެއް ކުރިމަތިވެފައިވީ ނަމަވެސް، އެމެރިކާއިން މަސައްކަތް ކުރީ އީރާނުގެ ވަރުގަދަ އަޒުމް އިމްތިޙާންކުރުމަށެވެ. ނަމަވެސް އީރާނުގެ ހިތްވަރުގަދަ ސިފައިން އެއްވެސް ޙަމަލާއެއް ނުވަތަ ބިރުދެއްކުމެއް ރައްދެއް ނުދީ ދޫލެއް ކުރާނެއެވެ. ފާރިސީ ކަނޑުއޮޅީގެ ތާރީޚަކީ މި ސަރަޙައްދުތަކަށް ގަދަކަމުން ވަންނަން އުޅުނު ބޭރުގެ އިސްތިއުމާރީ ބާރުތަކަށް ކުރިމަތވި ހިތްދަތި ނިމުންތަކުން ފުރިގެންވާ ތާރީޚެއް ކަމަށްވެސް އޭނާ ހަނދާންކޮށްދެއްވިއެވެ.
އެމެރިކާގެ ބާތިލު ބަހަނާތަކާއި އާންމު ޚިދުމަތްތަކަށް ދިން ޙަމަލާތައް
އެމެރިކާގެ ރައީސް ޑޮނަލްޑް ޓްރަމްޕް، އޮމާން ކަނޑުގެ ސަރަޙައްދަށް އެމެރިކާގެ އަޕާޗޭ ހެލިކޮޕްޓަރެއް ވެއްޓުނު ހާދިސާގެ އިލްޒާމް ބާތިލު ގޮތެއްގައި އީރާނުގެ ބޮލުގައި އަޅުވައި، ޙަމަލާދޭން ޖެހޭނެ ކަމަށް ބުނެފައިވެއެވެ. އީރާނުގެ އޮފިޝަލުންނާއި ސިފައިން މިކަމުގައި އެއްވެސް އަތެއް ނުވާނެ ކަމަށް ސާފުކޮށް ބުނެފައިވަނިކޮށް، އެމެރިކާއިން ވަނީ ބަހަނާއެއް ދައްކައިގެން އީރާނުގެ ދެކުނުގެ ހުރުމުޒްގާން ޕްރޮވިންސްގެ ސީރިކް، ޖާސްކް އަދި ޤިޝްމް ޖަޒީރާއަށް ތިން މަރުޙަލާއެއްގެ މަތިން ރޮކެޓް ޙަމަލާތަކެއް ދީފައެވެ.
މި ޢުދާވާނީ ޙަމަލާތަކުގައި އެމެރިކާއިން އީރާނުގެ ވައިގެ ދިފާޢީ ނިޒާމުތަކަށާއި ރާޑަރުތަކަށް އަމާޒުކުރި ކަމަށް ބުނި ނަމަވެސް، އީރާނުގެ ރަސްމީ މީޑިއާ ރިޕޯޓުކުރި ގޮތުގައި އެމެރިކާގެ ޙަމަލާތަކުގެ ސަބަބުން ބޮޑެތި ގެއްލުންތަކެއް ލިބުނީ ސީރިކް ސަރަޙައްދުގައި ހުރި މުވާޞަލާތީ ބުރުޖަކަށާއި އާންމުން ބޭނުންކުރާ ފެން ރައްކާކުރާ ދެ ތާންގީއަކަށެވެ.
ޙަމަލާތައް ފެށުމުގެ ކުރިންވެސް ވަޒީރު ޢަރާޤްޗީ ވަނީ އީރާނުގެ ބާރުގަދަ އަސްކަރީ ފައުޖުތައް އޮތީ ޤައުމުގެ ވައިގެ ސަރަޙައްދާއި، ކަނޑާއި، ބިމުގެ ދިފާޢުގައި ދާއިމީ ތައްޔާރީ ހާލަތެއްގައި ކަމަށް ވިދާޅުވެފައެވެ. މި ސަރަޙައްދަށް ޖަމާވެގެން އުޅޭ ބޭރުގެ ނޭދެވޭ ބާރުތަކަށް އަމިއްލަ ނުރައްކާ އޮތީ އެމީހުންގެ އަމިއްލަ އިހުމާލުންނާއި، ހާދިސާތަކުގެ ސަބަބުން ކަމަށާއި، މި ނުރައްކާތަކުން ސަލާމަތްވުމަށް އޮތް ހަމައެކަނި ޙައްލަކީ ބޭރުގެ ހަތުރުވެރި ސިފައިން ވީ އެންމެ އަވަހަކަށް މި ސަރަޙައްދު ދޫކޮށް ދިއުން ކަމަށް އޭނާ ވިދާޅުވިއެވެ.
