އެމެރިކާގެ ރައީސް ޑޮނަލްޑް ޓްރަމްޕް އީރާނާ އެކު ވެވަޑައިގަންނަވަން އުޅުއްވާ ކަމަށް ބުނާ އެއްބަސްވުމަކާ ގުޅިގެން، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް ބޮޑު ސިހުމެއް ލިބިއްޖެއެވެ. "އެކްސިއޯސް" އިން ރިޕޯޓުކުރާ ގޮތުގައި، އީރާނަށް ދޭން ރާވާފައި ހުރި ހަމަލާތައް ކުއްލި ގޮތަކަށް ޓްރަމްޕް ކެންސަލް ކުރައްވައި، ތެހެރާނާއެކު އެއްބަސްވުމަކަށް އާދެވޭނެކަމުގެ އިޝާރާތް ދެއްވީ ނަތަންޔާހޫއަށް ކުރިއާލައި އެއްވެސް ކަހަލަ އެންގެވުމެއް އަންގަވައި މަޝްވަރާކުރެއްވުމެއް ނެތިއެވެ.
އެމެރިކާ އާއި އީރާނާ ދެމެދު ކުރިއަށްދާ މަޝްވަރާތަކުގައި އިޒްރޭލު ބައިވެރިނުވާނެ ކަމަށް ނަތަންޔާހޫ ވަނީ ބުނެފައެވެ. ނަމަވެސް، އީރާނާ އެކު ކުރާ އެންމެ ފަހުގެ އެއްބަސްވުމުގައި ހިމަނަން ޖެހޭނެ މުހިންމު ކަންތައްތަކެއް ނަތަންޔާހޫ ފާހަގަކުރައެވެ. އޭގެ ތެރޭގައި:
- އީރާނުގެ ޔުރޭނިއަމް ފައްކާކުރާ މާއްދާތައް ނައްތާލުން.
- ޔުރޭނިއަމް ފައްކާކުރުމަށް ބޭނުންކުރާ ބިނާރުތައް ރޫޅާލުން.
- މިސައިލް އުފެއްދުމަށް ހުރަސްތައް އެޅުން.
- ސަރަހައްދުގައި ތިބި އީރާނުގެ ހަނގުރާމަވެރިންނަށް ދޭ އެހީތެރިކަން ހުއްޓާލުން.
މި ކަންތައްތައް ޓްރަމްޕް ޔަގީންކޮށްދެއްވާނެ ކަމަށް އުންމީދު ކުރައްވާ ކަމަށް ނަތަންޔާހޫ ބުނެއެވެ.
ޓްރަމްޕް އިއުލާން ކުރެއްވި ގޮތުގައި، އީރާނުގެ ލީޑާޝިޕުން ވަނީ ވަގުތީ އެއްބަސްވުމަކަށް އެއްބަސްވެފައެވެ. އޭގެ ތެރޭގައި:
- ހަނގުރާމަ ހުއްޓާލުން ދިގުދަންމާލުން.
- ހުރުމުޒު ކަނޑުއޮޅި އަލުން ހުޅުވުން.
- ނިއުކްލިއަރ ޕްރޮގްރާމާ ގުޅޭގޮތުން 60 ދުވަހުގެ މަޝްވަރާތަކެއް ފެށުން.
ނަމަވެސް، މި ވާހަކަތަކާ ގުޅިގެން އިޒްރޭލުގެ ރަސްމީ ފަރާތްތަކުން ބުނެފައިވަނީ، މިފަދަ އެއްބަސްވުމެއް އޮތްކަން ޔަހޫދީންނަށް އެނގިފައި ނުވާ ކަމަށެވެ. އަދި އީރާނުގެ ޚަބަރު ފަތުރާ ވަސީލަތްތަކުން ވަނީ އެފަދަ އެއްބަސްވުމެއް ގާއިމުކުރެވިފައި ނުވާ ކަމަށް ބުނެފައެވެ. ނަމަވެސް، ފަހުން ލިބުނު މައުލޫމާތުތަކަށް ބަލާއިރު، އީރާނުން މިކަމާމެދު އަލުން ވިސްނުމުގެ ފުރުސަތު އޮތް ކަމަށް ވެއެވެ.
