އީރާނުގެ ތެޔޮ އިންފްރާސްޓްރަކްޗަރަށް އަމާޒުކޮށް އެމެރިކާއިން ދެމުންދާ އިންޒާރުތަކަށް، އީރާނުގެ "ޚާތަމުލް އަންބިޔާ" މަރުކަޒުގެ ކޮމާންޑަރު، މޭޖަރ ޖެނެރަލް ޢަލީ ޢަބްދުالله ވަރަށް ހަރުކަށި ރައްދެއް ދެއްވައިފިއެވެ. އޭނާ ވިދާޅުވީ، ސަރަހައްދުން ތެލާއި ގޭސް ބޭރުކުރުމުގެ ފުރުޞަތު އޮންނަންވާނީ އެންމެންނަށް ކަމަށާއި، އީރާނަށް އެ ފުރުޞަތު ނެތް ނަމަ، އެހެން އެއްވެސް ބަޔަކަށްވެސް އެކަން ނުކުރެވޭނެ ކަމަށެވެ.
އީރާނުގެ ރަސްމީ ނޫސް އެޖެންސީން ރިޕޯޓްކޮށްފައިވާ ގޮތުގައި، ޖެނެރަލް ޢަބްދުاللهީގެ ބަޔާނުގައި ހިމެނޭ މުހިންމު ނުކުތާތަކަކީ:
1. އެމެރިކާގެ ދެފުށް ދެގޮތް ސިޔާސަތު
އެމެރިކާއިން އެއްކޮޅުން އެއްބަސްވުންތަކާއި މަޝްވަރާތަކުގެ ވާހަކަ ދައްކާއިރު، އަނެއްކޮޅުން ދަނީ އީރާނާ ދެކޮޅަށް ޢަދާވާތްތެރި އަމަލުތައް ހިންގަމުންނެވެ. އޭނާ ވިދާޅުވި ގޮތުގައި އެމެރިކާގެ ބަހާއި އަމަލާ ދެމެދު ހުރި މި ފުށުއެރުންތަކަކީ މުޅި ސަރަހައްދުގެ ސަލާމަތް ގެއްލި، ބައިނަލްއަޤްވާމީ ވިޔަފާރިއާއި އިޤްޠިޞާދަށް، ޚާއްޞަކޮށް ހުރްމުޒް ކަނޑުއޮޅީގެ ސަލާމަތަށް އޮތް އެންމެ ބޮޑު ނުރައްކަލެވެ.
2. މީޑިއާގެ ހަނގުރާމައާއި ބަލިގަބޫލުކުރުން
އެމެރިކާގެ މަސްއޫލުވެރިންނަށް އީރާނުގެ ރައްޔިތުންގެ ހިތްވަރާއި ސިފައިންގެ ކުޅަދާނަކަން ރަނގަޅަށް ވަޒަންކުރަން ނޭނގޭ ކަމަށް ޢަބްދުالله ވިދާޅުވިއެވެ. އަދި އެމެރިކާއިން ހިންގާ ޕްރޮޕަގަންޑާއާއި މީޑިއާ ހަނގުރާމައިގެ ބޭނުމަކީ، އީރާނުގެ ކުރިމަތީގައި އެމެރިކާއަށް ލިބެމުންދާ ނާކާމިޔާބީތަކާއި ލަދުވެތިކަން ފޮރުވުން ކަމަށް އޭނާ ސިފަކުރެއްވިއެވެ.
3. "ކުރިއަށްވުރެ ވަރުގަދަ ރައްދެއް"
އީރާނުގެ އަސްކަރީ ކޮމާންޑަރު ވަނީ، އެމެރިކާއިން އީރާނަށް ދެވަނަ ފަހަރަށް ހަމަލާއެއް ދީފިނަމަ، މީގެ ކުރިން ދިން ރައްދަށްވުރެ މާ ހަރުކަށި އަދި ބާރުގަދަ ރައްދެއް ދޭނެކަމުގެ އިންޒާރު ދެއްވާފައެވެ. އަދި އެފަދަ ކަމެއްގެ ސަބަބުން ހަނގުރާމައިގެ އަލިފާންގަނޑު މުޅި ސަރަހައްދަށް ފެތުރި، ހަމަޖެހުން މުޅިން ގެއްލިގެންދާނެ ކަމަށްވެސް ވިދާޅުވިއެވެ.
