އެމެރިކާ އާއި އީރާނާ ދެމެދު މިހާރު މަޝްވަރާކުރެވެމުންދާ އެއްބަސްވުމަކީ، 2015 ވަނަ އަހަރު އޭރުގެ ރައީސް ބަރަކް އޮބާމާގެ އިސްނެންގެވުމާއެކު އީރާނާއެކު ގާއިމުކުރި ނިއުކްލިއާ އެއްބަސްވުމަށްވުރެ މާ ހަރުދަނާ ނުވަތަ އަސާސީ ގޮތުން ތަފާތު އެއްބަސްވުމަކަށް ވުމަކީ ނާދިރު ކަމެއް ކަމަށް ކުރީގެ ރައީސް ބަރަކް އޮބާމާ ވިދާޅުވެއްޖެއެވެ.
އޭބީސީ ނިއުސް އަށް ދެއްވި ހާއްސަ އިންޓަވިއުއެއްގައި، އޮބާމާ ވިދާޅުވީ 2015 ވަނަ އަހަރު އެކުލަވާލި "ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން" އަކީ ގިނަ ދުވަސްތަކެއްގެ މަސައްކަތުން ހޯދުނު ނަތީޖާއެއް ކަމަށެވެ. އެމެރިކާ އެ އެއްބަސްވުމުން ވަކިވި ނަމަވެސް، މިހާރު ހޯދަން މަސައްކަތްކުރާ ހައްލަކީ އޭގެ އަސްލާ މާ ބޮޑަށް ފުށުއަރާނެ ކަމެއް ކަމަށް އެމަނިކުފާނު ގަބޫލުކުރައްވައެވެ.
ބައިނަލްއަގުވާމީ ފެންވަރުގައި ބޮޑު ތާއީދެއް ލިބުނު ނަމަވެސް، އެމެރިކާގެ އެތެރޭގައި ބޮޑު ޚިޔާލުފާތުވުމެއް އުފެއްދި 2015ގެ އެއްބަސްވުމުގެ ދަށުން، އީރާނުގެ ނިއުކްލިއާ ހަރަކާތްތަކަށް ހިފަހައްޓައި، ޔުރޭނިއަމް ފައްކާކުރުން ވަކި މިންވަރަކަށް ކޮންޓްރޯލްކޮށް، ބައިނަލްއަގުވާމީ އިންސްޕެކްޓަރުންނަށް އެ ގައުމުގެ ނިއުކްލިއާ މަރުކަޒުތައް ބެލުމުގެ ފުރުސަތު ދިނުމަށް އެއްބަސްވިއެވެ. އޭގެ ބަދަލުގައި، އީރާނަށް އަޅާފައިވާ ދަތިކުރުމުގެ ބައެއް ފިޔަވަޅުތައް އުވާލައި، ގަނޑުކޮށްފައިވާ އެތައް ބިލިއަން ޑޮލަރެއްގެ ފައިސާ ދޫކޮށްދިނެވެ.
މި އިންޓަވިއުގައި އޮބާމާ ވަނީ ހަނގުރާމައިގެ ސަބަބުން އާންމު ރައްޔިތުންނަށް ލިބޭ ގެއްލުންތަކާމެދު ކަންބޮޑުވުން ފާޅުކުރައްވައި، ހަނގުރާމައިގެ ބަދަލުގައި ޑިޕްލޮމަސީ އިސްކުރުމަށް ގޮވާލައްވާފައެވެ.
"ބާރުގެ ބޭނުންކޮށްގެން ނުވަތަ ބޮން އަޅައިގެން މައްސަލަތަކަށް ހައްލު ހޯދޭނެ ކަމަށް ގަބޫލުކުރުމަކީ ހިތާމަހުރި ކަމެއް،" އޮބާމާ ވިދާޅުވިއެވެ. އެނާ އިތުރަށް ވިދާޅުވީ، މައްސަލަތައް 100 ޕަސެންޓް ހައްލު ނުވި ނަމަވެސް، 80 ނުވަތަ 90 ޕަސެންޓް ހައްލު ހޯދޭނެ މަގުތައް ޑިޕްލޮމެޓިކް މަޝްވަރާތަކުން ހޯދަން ޖެހޭނެ ކަމަށެވެ.
"މި ފިލާވަޅު އަޅުގަނޑުމެންނަށް މިހާރު ދަސްވެފައިވާނެ ކަމަށް ހީކުރެވުނަސް، ބައެއް ފަހަރު އަލުން އެ ފިލާވަޅު ދަސްކުރަން ޖެހިފައި މިވަނީ،" އޮބާމާ އިތުރަށް ވިދާޅުވިއެވެ.
