ސްޓެންފޯޑް ޔުނިވަރސިޓީގެ ދަސްވެނިވުމުގެ ރަސްމިއްޔާތަކީ އާންމުކޮށް ކާމިޔާބީ ފާހަގަކުރުމާއި އުފާފާޅުކުރުމުގެ މާހައުލެއް އޮންނަ ހަފްލާއެކެވެ. ނަމަވެސް، އާދިއްތަ ދުވަހު ބޭއްވި މި ރަސްމިއްޔާތު ކުއްލިއަކަށް ހަލަބޮލިވެގެން ދިޔައީ، ގޫގުލްގެ ސީއީއޯ ސުންދަރު ޕިޗާއީ ޚާއްޞަ ތަޤުރީރު ދެއްވަން ފެށްޓެވުމާއެކު، ބައެއް ދަރިވަރުން ރުޅިވެރިކަމާއެކު ހޯލުން ނުކުމެގެން ދިއުމުންނެވެ.
މި އިހުތިޖާޖުގެ މައިގަނޑު ސަބަބަކީ ގޫގުލް ކުންފުނިން އެކި ޤައުމުތަކުގެ ސަރުކާރުތަކަށާއި ދިފާޢީ އިދާރާތަކަށް އިންސާނީ ހައްގަށް އަރައި ގަތުމަށް ފަހިވާ ގޮތަށް ފޯރުކޮށްދޭ ޓެކްނޮލޮޖީގެ ޚިދުމަތްތަކާ ދެކޮޅަށް އުފުލި އަޑުތަކެވެ.
ރިޕޯޓުތައް ބުނާ ގޮތުގައި މި ހަރަކާތް ރާވާފައިވަނީ 'ސްޓޫޑެންޓްސް ފޯ ޖަސްޓިސް އިން ފަލަސްތީން' އަދި 'ނޯ ޓެކް ފޯ އެޕާޓްހައިޑް' ފަދަ އެކްޓިވިސްޓް ގްރޫޕްތަކުންނެވެ. މި ދަރިވަރުންގެ މައިގަނޑު ކަންބޮޑުވުމަކީ، ޔަހޫދީންގެ ރެޖީމުގެ ދިފާޢީ ބާރުތަކާއި، އެމެރިކާގެ ޑިޕާޓްމަންޓް އޮފް ހޯމްލޭންޑް ސެކިއުރިޓީ އަދި އިމިގްރޭޝަން އެންޑް ކަސްޓަމްސް އެންފޯސްމަންޓްއާ ގޫގުލްއިން ވެފައިވާ ކަމަށް ބުނާ އެއްބަސްވުންތަކެވެ.
ޕިޗާއީގެ ތަޤުރީރު ކުރިއަށްދަނިކޮށް، ގްރެޖުއޭޓުންގެ ތެރެއިން ބަޔަކު ކުއްލިއަކަށް ތެދުވެ، އަޑުގަދަ ނުކޮށް ހޯލުން ނުކުމެގެން ދިޔައެވެ. މިއީ އެ ރަސްމިއްޔާތުގެ ބޮޑު ސަމާލުކަމެއް އެ ވަގުތު ހުއްޓުނު ކަމަކަށްވިއެވެ.
ދަރިވަރުންގެ މި ހަރަކާތާ ގުޅޭގޮތުން ޕިޗާއީ އެއްވެސް ވާހަކައެއް ދައްކަވާފައެއް ނުވެއެވެ. އޭގެ ބަދަލުގައި، ދަސްވެނިވާ ދަރިވަރުންނަށް ދެއްވި ތަގްރީރުގެ ތެރޭގައި އޭނާ ބޮޑަށް ބުރަވީ ޢާންމު ދިރިއުޅުމާއި ކެރިއަރާ ގުޅޭ ނަސޭހަތްތަކަށެވެ. ޓެކްނޮލޮޖީގެ ދާއިރާގައި ހިނގަމުންދާ ބޮޑެތި ބަހުސްތަކާއި ޚިލާފުތަކާ ބެހޭގޮތުން ވާހަކަ ދެއްކުމުގެ ބަދަލުގައި، އޭނާ ހުންނެވީ އެކަންކަމުން ދުރުހެލިވެ، ތަޤުރީރުގެ މިސްރާބު ޢާންމު ނަސޭހަތް ތެރިވުމަށް ބަދަލުކޮށްލައްވައިގެންނެވެ.
މި ހާދިސާއަކީ މަތީ ތަޢުލީމުގެ މުއައްސަސާތަކުގައި ދަރިވަރުންގެ ސިޔާސީ ހޭލުންތެރިކަމާއި، ޓެކް ކުންފުނިތަކުގެ ނުފޫޒާ ދެކޮޅަށް ހިންގާ ހަރަކާތްތައް އިތުރުވަމުންދާކަމުގެ އަލިގަދަ ހެއްކެކެވެ.
