އެމެރިކާއާއި އީރާނާ ދެމެދު އެކުލަވާލާފައިވާ ތާރީޚީ ސުލްހައިގެ ފަހުމުނާމާ ތަންފީޒުކުރަން ފަށައިފިއެވެ. އެމެރިކާގެ ރައީސް ޑޮނަލްޑް ޓްރަމްޕާއި އީރާނުގެ ރައީސް މަސްއޫދު ޕެޒެޝްކިއާން މި އެއްބަސްވުމުގައި އިލެކްޓްރޯނިކް ވަސީލަތްތައް މެދުވެރިކޮށް ސޮއިކުރެއްވުމާއެކު، ދެ ގައުމުގެ ދެމެދުގައި އޮތް ނުތަނަވަސްކަމަށް ލުޔެއް ލިބިގެންދާނެ ކަމުގެ އުންމީދު ވަނީ އާވެފައެވެ.
މި އެއްބަސްވުމަކީ 60 ދުވަހުގެ މުއްދަތަކަށް ދެ ގައުމުގެ ދެމެދުގައި ހަނގުރާމަ ހުއްޓާލައި، މަޝްވަރާތައް ފެށުމަށް އެކުލަވާލާފައިވާ އޮނިގަނޑެކެވެ.
އެއްބަސްވުމުގެ މުހިންމު ބައިތައް:
-
އަސްކަރީ ހަމަލާތައް ހުއްޓުން: މި އެއްބަސްވުމުގެ ދަށުން ދެ ފަރާތުން ވެސް މިހާރު ކުރިއަށްދާ ހަނގުރާމައިގެ ހަރަކާތްތައް ވަގުތުން ހުއްޓާލުމަށް ވަނީ ލާޒިމްކޮށްފައެވެ.
-
ހޮރްމޫޒް ކަނޑުއޮޅި ހުޅުވުން: އެމެރިކާއިން އީރާނާ ދެކޮޅަށް އަޅާފައިވާ ކަނޑުމަތީގެ ހިސާރު އުވާލައި، ދުނިޔޭގެ ތެލުގެ ވިޔަފާރިއަށް މުހިންމު ހުރްމޫޒް ކަނޑުއޮޅި މިނިވަންކަމާއެކު ބޭނުންކުރެވޭނެ ގޮތް ހެދުން.
-
އިގުތިސާދީ ލުއިތައް: އީރާނުން ތެޔޮ އެކްސްޕޯޓް ކުރުމަށް އޮތް ހުރަސްތައް 60 ދުވަހަށް ނައްތާލައި، އިގުތިސާދީ ގޮތުން އެގައުމަށް ލުއިތަކެއް ދިނުން.
ހުކުރު ދުވަހު ސްވިޒަލޭންޑުގައި އެމެރިކާގެ ނައިބު ރައީސް ޖޭ.ޑީ. ފާންސް އާއި އީރާނުގެ ޕާލަމެންޓުގެ ރައީސް މުހައްމަދު ބާގިރު ގާލިބާފް ބައްދަލުކުރައްވައި، ނިއުކްލިއާ ޕްރޮގްރާމާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރައްވާނެއެވެ.
ނަމަވެސް، މި އެއްބަސްވުމާ ގުޅޭގޮތުން ދެ ގައުމުން ވެސް ހަރުކަށި ސިޔާސަތުތަކެއް ދަމަހައްޓައެވެ. އީރާނުން ބުނާ ގޮތުގައި އެގައުމުގެ މިސައިލް ޕްރޮގްރާމަކީ މަޝްވަރާކުރެވޭނެ ކަމެއް ނޫނެވެ. އަދި 60 ދުވަހުގެ މި މުއްދަތުގެ ތެރޭގައި ދާއިމީ އެއްބަސްވުމަކަށް ނާދެވިއްޖެނަމަ، ކޮންމެ ވަގުތަކު ވެސް އެއްބަސްވުމުން ވަކިވުމުގެ އިޚުތިޔާރު ދެ ގައުމަށް ވެސް އޮންނާނެ ކަމަށް އެމެރިކާގެ އޮފިޝަލުން މައުލޫމާތު ދެއެވެ.
މިއީ ސަރަހައްދީ ހަމަނުޖެހުންތަކަށް ލިބުނު ވަގުތީ ހަމަޖެހުމެއް ކަމުގައި ވިޔަސް، ދެމެހެއްޓެނިވި ސުލްހައަކަށް ދިއުމަށް އަދިވެސް ގިނަ ގޮންޖެހުންތަކެއް ހުރިކަން ސިޔާސީ މަސްރަހު ދިރާސާކުރާ ފަރާތްތަކުން ފާހަގަކުރެއެވެ.
