ފަލަސްތީނުގެ ހައްގުތަކަށް ވަކާލާތު ކުރެއްވުމުގެ ސަބަބުން އެމެރިކާގެ އިމިގްރޭޝަން އޮފިޝަލުން އޭނާ ހައްޔަރުކުރުމުން ކޯތަށް މައްސަލަ ވެއްދުމުން ވިސްކޮންސިންގެ އެންމެ ބޮޑު މިސްކިތުގެ ރައީސް ޞަލާހު ސަރްސޫރު މިނިވަންކުރުމަށް ފަނޑިޔާރަކު އަމުރުކުރައްވައިފިއެވެ.
ފަލަސްތީނަށް އުފަން، އެމެރިކާގައި ދިގު މުއްދަތަކަށް ދިރިއުޅެމުން އަންނަ ޞަލާހު ސަރްސޫރު މާރިޗު 30 ގައި ހައްޔަރުކުރީ އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް އައިސް އިންނެވެ. ސަރުކާރުން ބުނަނީ އޭނާއަކީ "ޚާރިޖީ ސިޔާސަތަށް އޮތް ނުރައްކަލެއް" ކަމަށެވެ. ނަމަވެސް ސަރސޫރުގެ ވަކީލުން ވިދާޅުވަނީ އޭނާ ހައްޔަރުކުރީ އިޒްރޭލާ ދެކޮޅަށް ވާހަކަ ދެއްކުމުގެ ސަބަބުން ކަމަށެވެ.
އެމެރިކާގެ ޑިސްޓްރިކްޓް ޖަޖް ޖޭމްސް ޕެޓްރިކް ހެންލަން ބުރާސްފަތި ދުވަހު ނެރުއްވި އަމުރުގައި ވިދާޅުވީ، ސަރްސޫރު މިނިވަންކުރުމަށްފަހު އޭނާގެ ގެއަށް ދިއުމުގެ ފުރުސަތު ދިނުމަށެވެ. ފަނޑިޔާރު ފާހަގަކުރެއްވި ގޮތުގައި، އެމެރިކާގައި 30 އަހަރަށްވުރެ ގިނަ ދުވަހު ގާނޫނީ ހައިސިއްޔަތުން ދިރިއުޅެމުން އަންނަ މީހަކު، ކުއްލިއަކޮށް ނުރައްކަލަކަށް ވެގެން އުޅޭ ސަބަބު ސަރުކާރަށް ސާފުކޮށްދެވިފައެއް ނުވެއެވެ.
"ޚާރިޖީ ގުޅުންތަކުގެ ވާހަކަ ދެއްކުމަކީ، އެމެރިކާގެ ގާނޫނުއަސާސީން ކަށަވަރުކޮށްދޭ ފުރަތަމަ އިސްލާހުގެ ހައްގުތަކަށްވުރެ މަތިކަމެއް ނޫން،" ޓްރަމްޕް ނޮމިނޭޓްކުރެއްވި ފަނޑިޔާރު ހެންލަން ލިޔުއްވާފައިވެއެވެ.
މިނިވަންވުމަށްފަހު ދެއްވި ބަޔާނެއްގައި ސަރްސޫރު ވިދާޅުވީ، "އާއިލާއާ އެކު މި ވަގުތު އުޅެވޭތީ ވަރަށް ހިތްހަމަޖެހޭ. 80 ދުވަސް ވަންދެން ބޭރަށް ނުކުމެ ތާޒާ ވައި ހޯދުމުގެ ފުރުސަތު ނުލިބުނު. އަޑުއިވުމެއް ނެތް މީހުންނަށް އަޑު އުފުލައިދިނުމަށްޓަކައި އަހަރެމެން އެންމެން ގުޅިގެން މަސައްކަތް ކުރަންޖެހޭ. ފަލަސްތީނާއި އިންސާނިއްޔަތަށްޓަކައި އަހަރެން އަބަދުވެސް ވާހަކަ ދައްކާނަން،" ކަމަށެވެ.
ސަރްސޫރުގެ ވަކީލުން ބުނާ ގޮތުން، ޖަލުގައި ހުންނެވި ދުވަސްވަރު އޭނާގެ ބަރުދަނުން 30 ޕައުންޑް (14 ކިލޯ) ލުއިވެ، އޭނާގެ ޓައިޕް-2 ޑައިބެޓީސް ބައްޔަށް ފަރުވާ ދިނުމުގައި ބޮޑެތި އިހުމާލުތަކެއް ވެފައިވެއެވެ.
ޑިޕާޓްމަންޓް އޮފް ހޯމްލޭންޑް ސެކިއުރިޓީން ނެރުނު ބަޔާނެއްގައި ވަނީ، ސަރްސޫރަކީ "މޮލޮޓޯވް ކޮކްޓެއިލް އުކި ކަމަށް ކުށް ސާބިތުވެފައިވާ ޓެރަރިސްޓެއް" ކަމަށް ބުނެ، އިމިގްރޭޝަން އޮފިޝަލުންނަށް ކުރެވޭ ތުހުމަތުތައް ދޮގުކޮށްފައެވެ. ނަމަވެސް ސަރްސޫރުގެ ގާނޫނީ ޓީމުން ބުނަނީ އޭނާއަކީ އެމެރިކާގައި އެއްވެސް ޖިނާއީ ކުށެއްގެ ރެކޯޑެއް ނެތް މީހެއް ކަމަށާއި، އިޒްރޭލުގެ އަސްކަރީ ކޯޓުތަކުން ކުރި ހުކުމްތަކަކީ ޢަދުލުވެރިކަމެއް ނެތް ހުކުމްތަކެއް ކަމަށެވެ.
ސަރްސޫރުގެ ދަރިފުޅު ކަރީމް ސަރްސޫރު ބުނީ، "މިއީ އަހަރެމެންގެ ބައްޕަ އަނބުރާ ލިބުން، މިއީ ހުވަފެނަކުން ހޭލެވުނު ފަދަ އުފާވެރިކަމެއް" ކަމަށެވެ.
