އޮސްޓްރޭލިއާގައި ކުރިއަށްދާ ފެޑެރަލް އިންތިޚާބަށް ނުފޫޒު ފޯރުވުމަށް، ޗައިނާއާ ގުޅުން އޮންނަ ގްރޫޕަކުން މަސައްކަތްކުރަމުންދާ ކަމަށް ތުހުމަތުކުރެވޭ ވީޑިއޯއެއް އާންމުވުމާ އެކު، އެ ޤައުމުގެ ސިޔާސީ މަސްރަޙު ހޫނުވެއްޖެއެވެ.
އިންޓަނެޓުގައި އާންމުވެފައިވާ މި ވީޑިއޯއިން ފެންނަ ގޮތުގައި، އޮސްޓްރޭލިއާގެ މިނިވަން ކެންޑިޑޭޓަކަށް ތާއީދު ހޯދުމަށްޓަކައި ޗައިނާގެ ނުފޫޒު އޮތް ގްރޫޕަކުން ދަނީ ވޮލަންޓިއަރުންގެ ބޮޑު ވިއުގައެއް ބޭނުންކޮށްގެން މަސައްކަތްކުރަމުންނެވެ. މިކަމާ ގުޅިގެން އޮސްޓްރޭލިއާގެ ސިޔާސީ ފަރާތްތަކުން ވަނީ ބޭރު ޤައުމަކުން އިންތިޚާބުގެ ތެރެއަށް ވަދެގަންނަ ކަމަށް ބުނެ ނުރުހުން ފާޅުކޮށްފައެވެ.
އޮސްޓްރޭލިއާގެ އިންތިޚާބާ ބެހޭ އިދާރާތަކުން ވަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލައި، ވަގުތުން ތަހުގީގެއް ފަށާނެ ކަމަށް ވައުދުވެފައެވެ. ސަލާމަތީ ތަޖުރިބާކާރުން ސިފަކުރާ ގޮތުގައި، މިއީ ޤައުމުގެ ޑިމޮކްރެސީގެ ތެރެއަށް ބޭރުގެ ފަރާތްތަކުން ނުފޫޒު ފޯރުވަން މަސައްކަތް ކުރާކަމުގެ އެންމެ ފަހުގެ ހެއްކެވެ.
މިކަމާ ގުޅިގެން އޮސްޓްރޭލިއާގެ ސަރުކާރުން ބުނެފައިވަނީ، ޤައުމުގެ އެތެރޭގެ ކަންކަމުގެ ތެރެއަށް ބޭރުގެ ޤައުމުތަކުން ނުފޫޒު ފޯރުވުމަކީ އެއްވެސް ޙާލެއްގައި ބަލައިގަނެވޭނެ ކަމެއް ނޫން ކަމަށެވެ. އަދި އިންތިޚާބުގެ މިނިވަންކަން ކަށަވަރުކުރުމަށްޓަކައި ފިޔަވަޅުތައް އިތުރަށް ވަރުގަދަކުރާނެ ކަމަށް ވަނީ ބުނެފައެވެ.
މި މައްސަލައަކީ ޗައިނާއާއި އޮސްޓްރޭލިއާއާ ދެމެދު އޮތް ގުޅުން މިހާރުވެސް ނާޒުކު ފައްތަރެއްގައި އޮތް ދަނޑިވަޅެއްގައި ފެންމަތިވި ކަމަކަށް ވުމުން، މިއީ ގުޅަމަށް އިތުރު ހަލަބޮލިކަމެއް ގެނެސްދޭނެ ކަމެއް ކަމަށް ބެލެވެއެވެ.
