އެމެރިކާގެ މިނިވަންކަމަށް 250 އަހަރު ފުރުމުގެ މުނާސަބަތުގައި، މުސްތަގުބަލުގެ ޖީލުތަކަށްޓަކައި ޚާއްސަ "ޓައިމް ކެޕްސޫލެއް" ފިލަޑެލްފިއާގައި ވަޅުލުމަށް އެމެރިކާގެ ކަމާބެހޭ ފަރާތްތަކުން ތައްޔާރުވެއްޖެއެވެ. ޖުލައި 4 ވަނަ ދުވަހު ވަޅުލާ މި ކެޕްސޫލަކީ 2276 ވަނަ އަހަރާ ޖެހެންދެން ބިމުގެ އަޑީގައި ރައްކާކޮށްފައި ބަހައްޓާނެ އެއްޗެކެވެ.
މި ކެޕްސޫލް ފަރުމާކޮށްފައިވަނީ ސްޓެއިންލެސް ސްޓީލް ބޭނުންކޮށްގެންނެވެ. މިއީ ދަބަރު ނުޖަހާ އަދި ގިނަ ދުވަހަށް ދެމިހުންނާނެ ވަރުގަދަ މައުދަނެކެވެ. މީގެ އެތެރޭގައި 56 ސްޓޭޓަކާއި ސަރަހައްދުތަކުން ހޮވާލާފައިވާ ތާރީޚީ ލިޔެކިޔުންތަކާއި، ފޮތްތަކާއި، އަދި އެކި ވައްތަރުގެ ތަކެތި ހިމެނޭ ފޮށިތައް ވަނީ ބަހައްޓާފައެވެ.
މި މަޝްރޫއާ ގުޅޭގޮތުން "އެމެރިކާ 250″ ސެލެބްރޭޝަންގެ ރައީސާ ރޯޒީ ރިއޯސް ވިދާޅުވީ، މި ކެޕްސޫލްގެ ބޭނުމަކީ އެމެރިކާގެ ތަފާތު ސަގާފަތްތަކާއި ވާހަކަތައް އޭގެ ޒާތުގައި މުސްތަގުބަލަށް ފޯރުކޮށްދިނުން ކަމަށެވެ. އަދި މިއީ ކޮންގްރެސްގެ 2016 ވަނަ އަހަރުގެ ގާނޫނެއްގެ ދަށުން އެކުލަވާލެވުނު ޚާއްސަ ކޮމިޓީއަކުން ކުރިއަށްގެންދާ ކަމެކެވެ.
މިފަދަ ކެޕްސޫލްތައް ވަޅުލުމުގެ އާދަ އެމެރިކާގައި ފެށިފައިވަނީ 1876 ވަނަ އަހަރު، މިނިވަންކަމުގެ 100 އަހަރު ފުރުނު މުނާސަބަތުގައެވެ. އޭރު ވަޅުލި "ސެންޗަރީ ސޭފް" ކިޔާ ކެޕްސޫލެއް 1976 ވަނަ އަހަރު އޭރުގެ ރައީސް ޖެރާލްޑް ފޯޑް ވަނީ ހުޅުވާފައެވެ.
މި ކެޕްސޫލް ތަރައްގީކުރި އިންޖިނިއަރު ޖޭކަބް ރީކާ ވިދާޅުވި ގޮތުގައި، 250 އަހަރު ވަންދެން ބިމުގެ އަޑީގައި ތަކެތި ރައްކާތެރިކަމާއެކު ބެހެއްޓުމަކީ ވަރަށް އުނދަގޫ މަސައްކަތެކެވެ. މި ކެޕްސޫލް ވަޅުލާނީ ފިލަޑެލްފިއާގެ 'އިންޑިޕެންޑެންސް ހޯލް' ކައިރީގައި، ބެންޖަމިން ފްރޭންކްލިންގެ މަޝްހޫރު ލިޔުމެއްގެ ކައިރީގައެވެ.
