އެމެރިކާގެ ރައީސް ޑޮނަލްޑް ޓްރަމްޕްގެ ޚާއްސަ އެހީތެރިޔާ އަދި ކޮމިއުނިކޭޝަން އެޑްވައިޒަރު މާގޯ މާޓިން، އާންމުކުރެއްވި ވީޑިއޯއިން ފެންނަނީ، ގަތަރުން ހަދިޔާކުރި އެމެރިކާގެ އާ ރިޔާސީ މަތިންދާ ބޯޓު ރައީސް ޓްރަމްޕް އިފްތިތާހުކޮށްދެއްވައި، އެ ބޯޓުގައި ސޮއިކުރައްވާ މަންޒަރެވެ.
މާގޯ މާޓިން އެ ވީޑިއޯ އެކްސްގައި ހިއްސާކުރައްވަމުން ވިދާޅުވީ، "އެމެރިކާގެ ރައީސް 'އެއާ ފޯސް ވަން' އެމެރިކާގެ ރިޔާސީ މަތިންދާ ބޯޓުގެ އާ މެކޭނިކަލް ޕްލޭޓްގައި ސޮއިކުރައްވަނީ" ކަމަށެވެ.
މީގެ އިތުރުން، އެހެން ވީޑިއޯއެއްގައި، ބޯޓުގައި ހިމަނާފައިވާ އާ ކުލަތައް މާޓިން ވަނީ ދައްކާލައްވާފައެވެ. މިއީ ކުރިން ރިޔާސީ މަތިންދާ ބޯޓުތަކުގައި ބޭނުންކުރަމުން އައި ފަނޑު ނޫ ކުލައިގެ ބަދަލުގައި ގެނައި ކުލަތަކެކެވެ.
މިއާއެކު ރިޔާސީ ދަތުރުފަތުރުގެ އާ ޒަމާނެއް ފެށުނީއެވެ. މި މަތީ ފެންވަރުގެ ޖެޓު ބޯޓުގެ މަގްސަދަކީ، 1990 ވަނަ އަހަރުން ފެށިގެން ރިޔާސީ ބޯޓުގެ ގޮތުގައި ބޭނުންކުރަމުން އައި ބޯއިން 747-200 މަރުކާގެ ބޯޓުތަކާއި، ބޯއިން ކުންފުނިން މިހާރު ތައްޔާރުކުރަމުންދާ އާ ބޯޓުތައް ލިބުމާ ދެމެދު އޮތް ހުސްކަން ފޫބެއްދުމެވެ. އެ އާ ބޯޓުތައް ނިމުމަށް އަދި ގާތްގަނޑަކަށް ދެ އަހަރު ނަގާނެއެވެ.
އާ ބޯޓުތައް އުފެއްދުމުގައި ލަސްތަކެއް އުޅޭތީ ރައީސް ޓްރަމްޕް ހިތްހަމަނުޖެހުން ފާޅުކުރެއްވިއެވެ. ހާއްސަކޮށް، 2029 ވަނަ އަހަރު އޭނާގެ ރިޔާސީ ދައުރު ހަމަވުމުގެ ކުރިން އެ ބޯޓުތައް ނުނިމޭނެކަން އެނގިވަޑައިގަތުމުން ނުރުހުން ފާޅުކުރެއްވިއެވެ.
ގަތަރުން ވަނީ ޓްރަމްޕް ރުއްސުމަށްޓަކައި އިސްނަގައިގެން، އުދުހޭ ގަނޑުވަރެއް ޓްރަމްޕަށް ހަދިޔާކޮށްފައެވެ.
ގަތަރުގެ 400 މިލިއަން ޑޮލަރުގެ އަގުހުރި ހަދިޔާއެއް ގަބޫލުކުރުމާ ގުޅޭގޮތުން އުފެދުނު އަހްލާގީ، ގާނޫނީ އަދި ސަލާމަތީ ސުވާލުތަކަށް ވައިޓް ހައުސްއިން ވަނީ އަޅާނުލާ ދޫކޮށްލާފައެވެ. އެއަށްފަހު، އެ ބޯޓު ރައީސް ޓްރަމްޕް ބޭނުންކުރެއްވުމަށްޓަކައި ތައްޔާރުކުރުމުގެ މަސައްކަތް އެމެރިކާގެ އެއާ ފޯސްއިން ދަނީ ކުރަމުންނެވެ.
