އިންޑިއާގައި އުފައްދާ ހަކަތައިގެ ތެރެއިން އިއާދަކުރަނިވި ހަކަތައިގެ ހިއްސާ އިތުރުވެ، އެ ގައުމުގެ އަމިއްލަ އުފެއްދުންތައް އިތުރުވުމުގެ ސަބަބުން، ކޯލާ ދެލި އެތެރެކުރާ މިންވަރު ފާއިތުވި ހަތަރު އަހަރުގެ ތެރޭގައި އެންމެ ދަށު މިންވަރަށް ވެއްޓިއްޖެއެވެ. ބިގް މިލްޓް ކޮމޮޑިޓީސް ކޮންސަލްޓެންސީން ނެރުނު ތަފާސްހިސާބުތައް ދައްކާ ގޮތުން، މި އަހަރުގެ ފުރަތަމަ ފަސް މަސް ދުވަހުގެ ތެރޭގައި އިންޑިއާއިން އެތެރެކޮށްފައިވަނީ 65 މިލިއަން ޓަނުގެ ކޯލާ ދެއްޔެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 12 އިންސައްތައިގެ ދަށްވުމެކެވެ.
ދުނިޔޭގެ ދެވަނައަށް އެންމެ ގިނައިން ކޯލާ ދެލި އެތެރެކުރާ އިންޑިއާއިން އަންނަނީ އެ ގައުމުގެ ހަކަތައިގެ ބޭނުންތަކަށް ކޯލާ ދެއްޔަށް ބަރޯސާވާ މިންވަރު ކުޑަކުރުމަށް މަސައްކަތް ކުރަމުންނެވެ. މިގޮތުން، މި އަހަރުގެ ތެރޭގައި ހަކަތަ އުފެއްދުމަށް ކޯލާ ދެލި ބޭނުންކުރާ މިންވަރު މަދު 30 އިންސައްތައަށް ދަށްކުރުމަށް އެ ގައުމުން ވަނީ އަމާޒު ހިފާފައެވެ.
އިންޑިއާގެ އެންމެ ބޮޑު އުފެއްދުންތެރިޔާ ކޯލް އިންޑިއާއިން ވަނީ އެ ގައުމުގެ ހަކަތައިގެ ބޭނުންތައް ފުއްދުމަށް އުފެއްދުންތައް އިތުރުކުރުމަށް އަންގާފައެވެ. ޚާއްސަކޮށް، އެލް ނީނޯގެ މޫސުމީ އަސަރުތަކާ ގުޅިގެން ހޫނުގަދަވުމުގެ ސަބަބުން ކަރަންޓުގެ ބޭނުން އިންތިހާއަށް އިތުރުވެފައިވާއިރު، އެ ގައުމުގެ ގްރިޑް ރެގިއުލޭޓަރުގެ މައުލޫމާތުތަކުން ދައްކާ ގޮތުގައި މޭ މަހުގެ ތެރޭގައި ކަރަންޓަށް އޮތް ޑިމާންޑް ވަނީ ދެ އަހަރުގެ ތެރޭގައި އެންމެ މަތީ ދަރަޖައަކަށް ގޮސްފައެވެ.
މި މުއްދަތުގެ ތެރޭގައި ޖުމްލަ ކަރަންޓު އުފެއްދުން ފަސް އިންސައްތަ އިތުރުވި ނަމަވެސް، އިއާދަކުރަނިވި ހަކަތަ އުފެއްދުމުގެ ދުވެލި ވަނީ 22 އިންސައްތައިން ކުރިއަރާފައެވެ. މޭ މަހުގެ ތެރޭގައި އެކަނި ވެސް އިންޑިއާގެ އިއާދަކުރަނިވި ހަކަތައިގެ އުފެއްދުން ވަނީ 29 އިންސައްތައަށް އިތުރުވެފައެވެ. މިއީ އެ ގައުމުގެ ހަކަތައިގެ މިކްސްގެ 17.9 އިންސައްތަ ހިއްސާކުރާ ރެކޯޑު އަދަދެކެވެ. މީގެ އިތުރުން މެދުއިރުމަތީގައި އުފެދިފައިވާ ނުތަނަވަސްކަމުގެ ސަބަބުން ބޭރުން އެތެރެކުރާ ކޯލާ ދެލީގެ އަގު ބޮޑުވުމާއި މުދާ އުފުލުމުގެ ހަރަދުތައް އިތުރުވުމަކީ ވެސް އިންޑިއާގެ އެތެރެކުރުމުގެ މިންވަރު ދަށްވި ސަބަބެއް ކަމަށް ތަހުލީލުތަކުން ދައްކައެވެ.
