ޔޫރަޕިއަން ޔޫނިއަނުން އިންޑިއާގައި އަލަށް ތައާރަފުކުރި "އީޔޫ-އިންޑިއާ ސްޓޫޑަންޓް އެމްބެސެޑާސް ނެޓްވޯކް" އަކީ ޔޫރަޕާއި އިންޑިއާގެ ގުޅުން އިތުރަށް ބަދަހިކުރުމަށްޓަކައި ޒުވާނުންގެ ބައިވެރިވުން އިތުރުކުރުމަށް ފެށި މުހިންމު އިސްނެގުމެކެވެ. މި ޕްރޮގްރާމުގެ ދަށުން އިންޑިއާގެ 20 ޔުނިވަރސިޓީއަކުން 40 ދަރިވަރުންގެ މަންދޫބުން ވަނީ ކަނޑައަޅާފައެވެ. މި ދަރިވަރުންގެ މައިގަނޑު މަސްއޫލިއްޔަތަކީ ޔޫރަޕްގެ ތައުލީމީ އަދި ދިރާސާގެ ފުރުސަތުތަކާ ބެހޭގޮތުން އިންޑިއާގެ ޒުވާނުން ހޭލުންތެރިކުރުވުމާއި، ދެ ސަރަހައްދުގެ ދެމެދުގައި އޮތް ގުޅުންތައް ދެމެހެއްޓެނިވި ގޮތެއްގައި ކުރިއެރުވުމެވެ.
އިންޑިއާގައި ހުންނަވާ ޔޫރަޕިއަން ޔޫނިއަންގެ އެމްބެސެޑަރު ހަރވޭ ޑެލްފިން ވިދާޅުވި ގޮތުގައި، މި ދަރިވަރުންނަކީ ޔޫރަޕާއި އިންޑިއާގެ ގުޅުން އިތުރަށް ބަދަހިކުރުމަށް އެންމެ އެކަށީގެންވާ ފަރާތްތަކެވެ. ވިޔަފާރިއާއި، އިޤްތިސާދާއި، ސަގާފީ ގުޅުންތައް ކުރިއެރުވުމުގައި މިފަދަ ޒުވާން ހުނަރުވެރިންގެ ދައުރު ވަރަށް މުހިންމު ކަމަށާއި، މި ނެޓްވޯކަކީ ޔޫރަޕްގެ ހަޤީޤަތްތައް އިންޑިއާގެ ދަރިވަރުންނަށް އޮޅުންފިލުވައިދިނުމަށް އެޅޭ މުހިންމު ފިޔަވަޅެއް ކަމަށް އޭނާ ފާހަގަކުރެއްވިއެވެ.
މި ނެޓްވޯކް އިފްތިތާހުކުރުމުގެ އިތުރުން، 2026-2028 ވަނަ އަހަރުގެ "އެރަސްމަސް މަންޑަސް ޖޮއިންޓް މާސްޓާރސް ޑިގްރީ" ސްކޮލަރޝިޕް އިންޑިއާގެ 75 ދަރިވަރަކަށް ވަނީ ދީފައެވެ. 2004 ވަނަ އަހަރުން ފެށިގެން މި ސްކޮލަރޝިޕް އެންމެ ގިނައިން ހާސިލުކުރާ ޤައުމަކީ އިންޑިއާ ކަމަށްވާއިރު، މި އަހަރުގެ އިންޓޭކްގައި ވެސް ދުނިޔޭގެ އެންމެ ގިނައިން ސްކޮލަރޝިޕް ލިބުނު ފުރަތަމަ ތިން ޤައުމުގެ ތެރޭގައި އިންޑިއާ ހިމެނެއެވެ.
މި ސްކޮލަރޝިޕް ލިބުނު ދަރިވަރުން ފްރާންސް، ޖަރުމަނު، ބެލްޖިއަމް، އަދި އިޓަލީ ފަދަ 15 ޤައުމެއްގެ ޔުނިވަރސިޓީތަކުގައި އާޓިފިޝަލް އިންޓެލިޖެންސް، ސައިބަރ ސެކިއުރިޓީ، އިއާދަކުރަނިވި ހަކަތަ، އަދި ފާމަސޫޓިކަލް ސައިންސް ފަދަ ދާއިރާތަކުން މަތީ ތައުލީމު ހާސިލުކުރާނެއެވެ. މިހާރު ވެސް ގާތްގަނޑަކަށް 100،000 އިންޑިއާ ދަރިވަރުން ޔޫރަޕްގެ ޔުނިވަރސިޓީތަކުގައި ކިޔަވަމުންދާއިރު، އެރަސްމަސް ޕްރޮގްރާމަކީ 1987 ވަނަ އަހަރުން ފެށިގެން ދަރިވަރުން ބަދަލުކުރުމުގެ ޔޫރަޕްގެ އެންމެ މައިގަނޑު ޕްރޮގްރާމެވެ.
