މާލޭގެ ހިތް، މަޖީދިއްޔާ ސްކޫލުގެ ތާރީޚީ ގޯތިތެރޭގައި ޤަރުނަކާ ގާތްކުރާ ދިގު މާޒީއެއް ފޮރުވިފައިވާ ދެ ބިނާއެއް އެބަހުއްޓެވެ. އެއީ "ދާރުލްޢުލޫމް" އާއި "ކުރިބޯށި" އިމާރާތެވެ. ދިވެހި ތަޢުލީމީ ތާރީޚުގެ އެންމެ ފުރަތަމަ ފިޔަވަޅުތަކާއި، ޤައުމީ ބޮޑެތި ނިންމުންތަކުގެ ހެކިވެރިންގެ ގޮތުގައި ފާއިތުވި ދިހަވަރަކަށް އަހަރު މި އިމާރާތްތައް ހަނު ހުރި ނަމަވެސް، މިހާރު މިއޮތީ މި އާސާރީ ބިނާތަކަށް އާ ދިރުމެއް ގެނައުމުގެ ވަގުތު ޖެހިފައެވެ.
ތަޢުލީމާއި މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާގެ ސްޓޭޓް މިނިސްޓަރ ޑރ. އަހުމަދު މުހައްމަދު ވިދާޅުވި ގޮތުގައި، މި އިމާރާތްތައް އަލުން ތަރައްޤީކުރުމުގެ މަސައްކަތް މިހާރު މިވަނީ ރަސްމީކޮށް ފެށިފައެވެ. މަޖީދިއްޔާ ސްކޫލަށް 100 އަހަރު ފުރުން ފާހަގަކުރުމުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ވަނީ މި ދެ އިމާރާތަކީ ރާއްޖޭގެ "ނެޝަނަލް އެޑިޔުކޭޝަން މިއުޒިއަމް" ގެ ގޮތުގައި ތަރައްޤީކުރެވޭނެ ތަންތަން ކަމުގައި އިޢުލާނުކުރައްވާފައެވެ.
"ދާރުލްޢުލޫމް" މިއީ ހަމައެކަނި ޢިމާރާތެއް ނޫނެވެ. 1952 ވަނަ އަހަރު މުޙައްމަދު އަމީން ދޮށިމޭނާކިލެގެފާނުގެ ވެރިކަމުގައި ބިނާކުރި މި އިމާރާތަކީ، ރާއްޖޭގެ ރަސްކަމުގެ ނިޒާމު ނިމުމަކަށް އައިސް، ފުރަތަމަ ޖުމްހޫރިއްޔާގެ ރައީސް މުޙައްމަދު އަމީން ވެރިކަމާ ހަވާލުވެވަޑައިގެންނެވި ތާރީޚީ ރަސްމިއްޔާތުގެ ހެކިވެރިޔާއެވެ. އެތައް އަހަރެއްވަންދެން ދަޢުލަތުގެ އެންމެ މަތީ ރަސްމީ ބައްދަލުވުންތައް ބާއްވަމުން އައި މި ހޯލަށް، ފަހުގެ ބަދަލުތަކުގެ ސަބަބުން އޭގެ އަސްލު ފުރިހަމަކަން ވަނީ ގެއްލިފައެވެ.
ޑރ. އަހުމަދު މުހައްމަދު ވިދާޅުވި ގޮތުގައި، މި މަޝްރޫޢުގެ މައިގަނޑު އަމާޒަކީ މި ބިނާތަކުގެ ޤަދީމީ ރީތިކަން އަލުން ގެނައުމެވެ.
"މި ހޯލަކީ ރާއްޖޭގައި މިހެން ބޭއްވޭ ވަރަށް މުހިންމު ބައެއްކަހަލަ ކުދި ކުދި ހަފްލާތައްވިއަސް ކަންތައް ކުރެވޭނެ ކަހަލަ ގޮތަކަށް ތަރައްޤީކުރެވިގެންދާ ރީތި ހޯލެއްގެ ގޮތުގައި، ތާރީޚީ އާސާރީ ތަނެއްގެ ގޮތުގައި އަދި ޢާއްމުނަށްވެސް ބޭނުން ކުރެވޭނެ ގޮތަށް އެތަން ތަރައްޤީކުރުން،" ސްޓޭޓް މިނިސްޓަރ ވިދާޅުވިއެވެ.
ދާރުލްޢުލޫމް ނުވަތަ "ތަޢުލީމުގެ ގެ" އަލުން ފުރިހަމަކުރުމަށްޓަކައި، އެ ވުޒާރާއާއި، މަޖީދިއްޔާގެ މުސްކުޅި ދަރިވަރުންގެ ޖަމިއްޔާ އަދި ކަމާގުޅުންހުރި އެހެނިހެން ފަރާތްތަކުގެ އެހީތެރިކަން ވަނީ ހޯދާފައެވެ. ދާރުލްޢުލޫމް މަރާމާތުކުރުމުގެ އަމަލީ މަސައްކަތް މިއަހަރުގެ ތެރޭގައި ފެށުމަށް ނިންމާފައިވާއިރު، މިއީ ރާއްޖޭގެ ތަޢުލީމީ ތާރީޚުގެ ރަން ޞަފްޙާތައް އަންނަން އޮތް ޖީލުތަކަށް ފެންނާނެހެން ރައްކާކުރުމަށް އެޅޭ ވަރަށް މުހިންމު ފިޔަވަޅެކެވެ.
މި މަސައްކަތް ނިމުމުން، ދާރުލްޢުލޫމް ވެގެންދާނީ ހަމައެކަނި މާޒީގެ ހަނދާންތައް އާކޮށްދޭ ތަނަކަށް ނޫނެވެ؛ އެއީ އަލުން ދިރުމެއް ލިބި، ދިވެހި މުޖުތަމަޢަށް ޚިދުމަތްކުރާނެ ޝަރަފުވެރި ބިނާއަކަށް ވެގެންދާނެއެވެ.
