ޕާކިސްތާނުގައި މައްސަރު ކަންކަމަށް ބޭނުންކުރާ ސާފުތާހިރުކަމުގެ އުފެއްދުންތަކުން ނަގަމުން އައި ޕެޑް ޓެކްސް އުވާލުމަށް އެ ޤައުމުގެ ސަރުކާރުން ނިންމައިފިއެވެ. މިއީ އެ ޤައުމުގައި ޖީލުތަކެއް ވަންދެން ވާހަކަ ދެއްކުން މަނާ، އަދި ބަލައިނުގަންނަ މައުޟޫއެއް ކަމުގައިވާ މައްސަރު ކަންކަމާ ގުޅޭގޮތުން ހޯދުނު ވަރަށް ބޮޑު ކާމިޔާބީއެއް ކަމަށް އަންހެނުންގެ ހައްޤުތަކަށް މަސައްކަތްކުރާ ފަރާތްތަކުން ސިފަކުރެއެވެ.
މިކަމާ ގުޅޭގޮތުން ޕާކިސްތާނުގެ ފިނޭންސް މިނިސްޓަރު މުހައްމަދު އައުރަންގްޒޭބް ވިދާޅުވީ، 2026-27 ވަނަ އަހަރުގެ ބަޖެޓުގެ ދަށުން، މި އުފެއްދުންތަކުން ނަގަމުން އައި 18 އިންސައްތައިގެ ޓެކްސް އުވާލާނެ ކަމަށެވެ. މީގެ ކުރިން މިފަދަ ތަކެތި ގިންތިކޮށްފައި އޮތީ ޒަރޫރީ ތަކެތީގެ ގޮތުގައި ނޫން ކަމަށާއި، މި ބަދަލާ އެކު އަންހެނުންގެ ޞިއްޙީ ދުޅަހެޔޮކަމާއި، ޤަދަރާއި އަދި މުޖުތަމައުގައި އެމީހުންގެ ބައިވެރިވުން އިތުރުވެގެންދާނެ ކަމަށް އޭނާ ފާހަގަކުރެއްވިއެވެ.
މި ބަދަލަކީ މިދިޔަ އަހަރު ދެ ވަކީލަކު ހުށަހެޅި ޤާނޫނީ ޕެޓިޝަނަކާ ގުޅިގެން ސަރުކާރުން އަޅަން ނިންމި ފިޔަވަޅެކެވެ. މަންހަރު އުމަރު (25) އަދި އަހުސަން ޖާޚާން (29) ހުށަހެޅި މި ޕެޓިޝަނުގައި ބުނެފައިވަނީ، ޓެކްސްގެ ސަބަބުން މިފަދަ އުފެއްދުންތަކަކީ މިލިއަނުން ގުނާލެވޭ އަންހެނުންނަށް ނުގަނެވޭހާ އަގުބޮޑު ކަމަށެވެ.
މި ޓެކްސް އުވާލި ނަމަވެސް، ޤާނޫނީ މި ދެ ވަކީލުން ބުނާ ގޮތުގައި މިއީ ހަމައެކަނި ފެށުމެކެވެ. އެމީހުންގެ އަމާޒަކީ އެތެރެކުރާ މުދަލުން ނަގާ ޑިއުޓީއާއި ރޯ މެޓީރިއަލްސްއިން ނަގާ ޓެކްސްތައް ވެސް އުވާލައި، މައްސަރު ކަންކަމާ ގުޅޭ ފަގީރުކަމުގެ މައްސަލައަށް ދާއިމީ ހައްލެއް ހޯދުމެވެ.
ޕާކިސްތާނުގެ އާބާދީގެ 48 އިންސައްތައަކީ އަންހެނުންނަށް ވީއިރު، ޔުނިސެފްގެ 2024 ވަނަ އަހަރުގެ ރިޕޯޓަކުން ދައްކާ ގޮތުގައި އެ ޤައުމުގެ އާބާދީގެ އެންމެ 12 އިންސައްތަ މީހުންނަށް މިފަދަ އުފެއްދުންތައް ބޭނުންކުރުމުގެ ފުރުސަތު ލިބެއެވެ. ބާކީ ތިބި އަންހެނުން މަޖުބޫރުވެފައިވަނީ ސާފުތާހިރު ނޫން ފޮތިކޮޅުތައް އަދި އެހެނިހެން ނުރައްކާތެރި ބަދަލުތައް ބޭނުންކުރުމަށެވެ. މި ބަދަލުތަކަކީ ޕާކިސްތާނު ފަދަ ޚިޔާލުތަފާތު މުޖުތަމައެއްގައި އަންހެނުންގެ ޞިއްޙީ ދުޅަހެޔޮކަމާ ބެހޭގޮތުން ވާހަކަ ދެއްކުމުގެ ފުރުސަތު ހުޅުވިގެންދިޔަ، ތާރީޚީ ކަމެއް ކަމަށް ހައްޤުތަކަށް މަސައްކަތްކުރާ ފަރާތްތަކުން ބުނެއެވެ.
