ޕާކިސްތާނުގެ ބަލޫޗިސްތާން ޕްރޮވިންސްގެ ހޮސްޕިޓަލެއްގައި މަސައްކަތްކުރާ އަންހެން ޑޮކްޓަރަކަށް އެސިޑް ހަމަލާދިން މައްސަލައާ ގުޅިގެން، އެ ޤައުމުގެ ޞިއްޙީ ދާއިރާގެ މަސައްކަތްތެރިން ބޮޑެތި އިހުތިޖާޖުތަކެއް ފަށައިފިއެވެ. ޖޫން 5 ވަނަ ދުވަހު ކުއެޓާގެ ސަންޑަމަން ސިވިލް ހޮސްޕިޓަލުގައި ހިނގި މި ހިތާމަވެރި ހާދިސާގައި 29 އަހަރުގެ ޑރ. މަހްނޫރު ނާސިރަށް ހަމަލާދީފައިވަނީ އެ ހޮސްޕިޓަލުގެ ލިފްޓް އޮޕަރޭޓަރެކެވެ.
މި ހަމަލާގައި ޑރ. މަހްނޫރުގެ މޫނަށާއި ހަށިގަނޑަށް 13 އިންސައްތަ ފިހިފައިވާއިރު، އޭނާއަށް މިހާރު ދަނީ ކަރާޗީގެ އާގާ ޚާން ޔުނިވާސިޓީ ހޮސްޕިޓަލުގައި ފަރުވާދެމުންނެވެ. ހަމަލާދިން މީހާ، ހުމާޔޫން ޝާހް، ފުލުހުންނާ ދެމެދު ބަދަލުކުރެވުނު ހަމަލާތަކެއްގައި ވަނީ މަރުވެފައެވެ.
ޕްރޮވިންޝަލް ހެލްތު މިނިސްޓަރު ބަޚްތު ކަކަރު ވިދާޅުވި ގޮތުގައި، ހަމަލާދިން މީހާ މަސްތަކެއް ވަންދެން ޑރ. މަހްނޫރަށް ގޯނާކުރަމުން ދިޔަކަން އޭނާގެ ފޯނުން ފެނުނު މެސެޖުތަކުން ހާމަވެފައިވެއެވެ.
މި މައްސަލައާ ގުޅިގެން ޑޮކްޓަރުންގެ ޖަމިއްޔާއިން ގޮވާލަމުންދަނީ ޞިއްޙީ ދާއިރާގައި މަސައްކަތްކުރާ ފަރާތްތަކަށް ރައްކާތެރިކަން ކަށަވަރުކުރުމަށާއި، ބަލޫޗިސްތާންގެ ހެލްތު ސެކްރެޓަރީ މުޖީބު އައްރަހްމާން ޕަނޭޒާއި އިސްތިއުފާ ދިނުމަށެވެ.
އިހުތިޖާޖުތައް ފެށުމުން، ސަރުކާރުން ވަނީ 23 ޑޮކްޓަރަކާއި ހަތަރު ޓްރެއިނީއަކު ސަސްޕެންޑްކޮށްފައެވެ. ނަމަވެސް، އިސް ޑޮކްޓަރުން ބުނަނީ ޑޮކްޓަރުންގެ ޝަރަފަށް ދެވުނު މިފަދަ ހަމަލާއަކީ ކުޑަކަމެއްގެ ގޮތުގައި ދޫކޮށްލެވެން ނެތް ކަމަށެވެ. އަދި މި ހާދިސާއަކީ ޕާކިސްތާނުގައި އަންހެނުންނާ ދެކޮޅަށް ހިންގާ ހަމަނުޖެހުންތަކާއި މުޖުތަމައުގައި އޮތް ހަމަހަމަކަން ނެތުމުގެ ނުރައްކާތެރި މިސާލެއް ކަމަށް ޔޫއެން ވިމެން އިން ވެސް ވަނީ ފާހަގަކޮށްފައެވެ.
މި ހާދިސާގެ ސަބަބުން ޕާކިސްތާނުގެ ޞިއްޙީ ދާއިރާގައި މަސައްކަތްކުރާ އަންހެން ޑޮކްޓަރުންގެ ރައްކާތެރިކަމާމެދު ބޮޑެތި ކަންބޮޑުވުންތަކެއް ވަނީ އުފެދިފައެވެ. ޕާކިސްތާނުގެ ޞިއްޙީ ދާއިރާގައި ރަޖިސްޓްރީކޮށްފައިވާ 370،000 ޑޮކްޓަރުންގެ ތެރެއިން ގާތްގަނޑަކަށް 70،000 އަންހެން ޑޮކްޓަރުން މަސައްކަތް ނުކުރާކަން ފާހަގަކުރެވޭއިރު، އޭގެ ތެރެއިން ގިނަ ފަރާތްތަކަކީ ރައްކާތެރިކަން ނެތުމުގެ ސަބަބުން ދާއިރާއާ ދުރަށް ދާން މަޖުބޫރުވެފައިވާ ފަރާތްތަކެވެ.
