އެމެރިކާގެ ހަނގުރާމައިގެ ވަޒީރު ޕީޓް ހެގްސެތް، ސިފައިންގެ އިސް އޮފިސަރުންނާ ދެކޮޅަށް ކުރިއަށް ގެންދާ މަގާމުން ވަކި ކުރުމުގެ ކެމްޕޭންގެ ދަށުން، ޔޫރަޕްގައި ހުންނަ އެމެރިކާގެ އެއްގަމު ސިފައިންގެ އެންމެ އިސް ކޮމާންޑަރު، ޖެނެރަލް ސީ. ޑީ. ޑޮނަހިއޫ މަޤާމުން ވަކިވެ، ކުރިން ރިޓަޔާ ކުރަން މަޖުބޫރުކޮށްފިއެވެ.
ފައިނޭންޝަލް ޓައިމްސް އިން ރިޕޯޓުކުރާ ގޮތުގައި، ޖެނެރަލް ޑޮނަހިއޫ އަކީ ޚާއްސަ ސިފައިންގެ ތެރޭގައި ވަރަށް ބޮޑު އިޙްތިރާމެއް އޮންނަ، އަދި ޔުކްރެއިން ހަނގުރާމައިގައި އެމެރިކާއިން ދޭ އެހީތެރިކަމުގައި މުހިންމު ދައުރެއް އަދާކުރެއްވި ބޭފުޅެކެވެ. އޭނާ ރަސްމީކޮށް ރިޓަޔާ ކުރާކަން ބުދަ ދުވަހު އިއުލާނު ކުރާނެއެވެ. ޑޮނަހިއޫ އަކީ 2021 ވަނަ އަހަރު އެމެރިކާގެ ސިފައިން އަފްޣާނިސްތާނުން ފޭބިއިރު އެ ޤައުމުން ނުކުތް އެންމެ ފަހުގެ އެމެރިކާ ސިފައިންގެ މީހާއެވެ.
ހެގްސެތް ސިފައިންނާ ދެކޮޅަށް އަޅާ ފިޔަވަޅުތައް:
-
މީގެ ދެ މަސް ކުރިން ޖެނެރަލް ރޭންޑީ ޖޯޖް (އާރމީ ޗީފް އޮފް ސްޓާފް) ވަނީ މަޤާމުން ވަކިކޮށްފައެވެ.
-
ފާއިތުވި 18 މަސް ދުވަހުގެ ތެރޭގައި ހެގްސެތް ވަނީ އެތައް ބޭފުޅުންނެއް މަޤާމުން ވަކިކޮށްފައެވެ. އޭގެ ތެރޭގައި ޖޮއިންޓް ޗީފްސް އޮފް ސްޓާފްގެ ރައީސް ޖެނެރަލް ސީ. ކިއު. ބްރައުން އާއި، އެމެރިކާގެ ކަނޑުގެ ސިފައިންގެ ވެރިޔާ އެޑްމިރަލް ލީޒާ ފްރަންޗެޓީ ހިމެނެއެވެ.
-
މި ކަމުގެ ސަބަބުން އެމެރިކާގެ ސިފައިންގެ ތެރޭގައި "ބިރުވެރި މާހައުލެއް" އުފެދިފައިވާ ކަމަށް ކުރީގެ އިސް އޮފިސަރުން ފާހަގަކުރެއެވެ.
މި ބަދަލުތަކުގެ ސަބަބުން އެމެރިކާގެ އަސްކަރީ ލީޑަޝިޕްގެ މެދުގައި ބޮޑެތި ހަމަނުޖެހުންތަކެއް އުފެދިފައިވާއިރު، މިއީ ޕެންޓަގަންގެ ކޮންޓްރޯލް ހެގްސެތްގެ އަތްމައްޗަށް ވަރުގަދަކުރަމުންދާ ކަމުގެ ނިޝާނެއް ކަމަށް މާހިރުން ދެކެއެވެ. ހެގްސެތް މިފަދަ ފިޔަވަޅުތައް އަޅަމުންދަނީ ކީއްވެކަން ސާފު ނޫން ނަމަވެސް، އަފްޣާނިސްތާނުން ފޭބުމުގައި ޖޯ ބައިޑަންގެ އިދާރާއިން ގެންގުޅުނު ގޮތަށް ހެގްސެތް ވަރަށް ބޮޑަށް ފާޑުވިދާޅުވެފައިވެއެވެ. އަދި ރައީސް ޑޮނަލްޑް ޓްރަމްޕް މިހާރު ގެންދަވަނީ ޔޫރަޕްގެ ޤައުމުތަކުން އެމީހުންގެ ދިފާއީ ކަންކަމަށް އިތުރަށް ޒިންމާ ނެގުމަށް ބާރުއަޅަމުންނެވެ.
