އީރާނަށް އުފަން މެހްރާން ކަރީމީ ނާސިރީ، ގާނޫނީ ލިޔެކިޔުންތަކުގެ މައްސަލައެއްގައި ޕެރިހުގެ ޗާލްސް ޑި ގޯލް އެއާޕޯޓުގައި 18 އަހަރު ދުވަހު ދިރިއުޅުނު ހާދިސާއަކީ ޒަމާނީ ތާރީޚުގައި ހިނގި އެންމެ އާދަޔާޚިލާފު އެއް ވާހަކައެވެ. 1945 ވަނަ އަހަރު އީރާނަށް އުފަންވި ނާސިރީ، 1980 ގެ އަހަރުތަކުގައި ޔޫރަޕްގެ އެކި ގައުމުތަކުގައި ދިރިއުޅުނެވެ. އޭނާގެ ރެފިއުޖީ ސްޓޭޓަސްއާ ގުޅޭ ލިޔެކިޔުންތައް 1988 ވަނަ އަހަރު ގެއްލުމުން، ގާނޫނީ ގޮތުން އޭނާއަކީ ކާކުކަން ސާބިތުކޮށްދޭނެ އެއްވެސް ލިޔުމެއް ނެތި ޕެރިހުގެ އެއާޕޯޓުގެ ޓާމިނަލް 1 ގައި ތާށިވިއެވެ. ގައުމަކުން އޭނާ ބަލައިގަންނަން ދެކޮޅު ހެދުމުން، އެއާޕޯޓަކީ އޭނާގެ ދާއިމީ އެޑްރެހަށް ބަދަލުވިއެވެ.
އެތައް އަހަރެއް ވަންދެން ނާސިރީ ދިރިއުޅުނީ އެއާޕޯޓުގެ ގޮނޑިތަކުގައެވެ. އޭނާގެ މުދާތައް ދެ ލަގެޖް ޓްރޮލީއަކަށް ފައްތައިގެން އުޅުނުއިރު، އެއާޕޯޓުގެ މުވައްޒަފުންނާއި ދަތުރުވެރިންގެ އެހީތެރިކަމާއެކު އޭނާ ދިރިއުޅުން ކުރިއަށް ގެންދިޔައެވެ. އޭނާ ވަގުތު ހޭދަކުރީ ފޮތް ކިޔުމާއި، ދުވަސްީ ލިއުމާއި، ދަތުރުވެރިންނާ ވާހަކަ ދެއްކުމުގައެވެ. މި ދުވަސްވަރު އޭނާ އަމިއްލައަށް ނަން "ސަރ އަލްފްރެޑް" އަށް ބަދަލުކުރިއެވެ.
މި ހާދިސާގެ މައްޗަށް ބިނާކޮށް 2004 ވަނަ އަހަރު ސްޓީވަން ސްޕީލްބާގް "ދަ ޓާމިނަލް" ގެ ނަމުގައި ފިލްމެއް އުފެއްދިއެވެ. މި ފިލްމުގެ ހައްގުތައް ގަތުމަށް ސްޕީލްބާގްގެ ކުންފުނިން ނާސިރީއަށް 250،000 އާއި 300،000 ޑޮލަރާ ދެމެދުގެ އަދަދެއް ދިން ކަމަށް ވެއެވެ. ނަމަވެސް އެ ފައިސާ ލިބުނު ފަހުން ވެސް އޭނާ ދިރިއުޅުނީ ވަރަށް ސާދާކޮށެވެ.
ސިއްހީ ހާލަތު ދެރަވުމުގެ ސަބަބުން 2006 ވަނަ އަހަރު އޭނާ އެއާޕޯޓުން ނުކުމެ ހޮސްޕިޓަލަށް ދިޔައެވެ. އޭގެ ފަހުން ޕެރިހުގެ އެކި ތަންތަނުގައި ދިރިއުޅުމަށްފަހު، 2022 ވަނަ އަހަރު ނާސިރީ އަލުން ޗާލްސް ޑި ގޯލް އެއާޕޯޓަށް އެނބުރި ދިޔައެވެ. އެތަނަށް ދިޔަތާ މަދު ހަފުތާތަކެއްގެ ތެރޭގައި އުމުރުން 76 އަހަރުގައި ހާޓް އެޓޭކެއް ޖެހި އޭނާ މަރުވީ، އޭނާގެ ހަޔާތުގެ އެންމެ ބޮޑު ބައި ހޭދަކުރި އެއާޕޯޓުގެ ތެރޭގައެވެ.
