އީރާނުގެ ސުޕްރީމް ލީޑަރުގެ ސިޔާސީ މުޝީރު އަލީ އަކްބަރު ވިލާޔަތީ ވިދާޅުވަނީ، ގަލްފުގެ ސަރަހައްދުގެ ހަމަޖެހުން ބިނާވެފައިވަނީ ހުރުމުޒު ކަނޑުއޮޅި އީރާނުން މެނޭޖުކުރުމުގެ މައްޗަށް ކަމަށެވެ.
ހުރުމުޒު ކަނޑުއޮޅި އެއް ގަރުނު ވަންދެން އީރާނުން ބަލަހައްޓަމުން އައި ކަމަށާއި، ގަލްފުގެ ގައުމުތަކުގެ ހަމަޖެހުން ގުޅިފައިވަނީ އީރާނުގެ މި ބެލެހެއްޓުމާ ކަމަށް އޭނާ ވިދާޅުވިއެވެ.
ހުޅަނގުގެ ގައުމުތަކުން މި ސަރަހައްދަށް ގެނައީ ހަމައެކަނި "ޖާހިލުކަމާއި މުދާ ފޭރުން" ކަމަށް އޭނާ ތުހުމަތުކުރެއްވިއެވެ.
ސަރަހައްދުގެ "ސިޔާސީ ގޮތުން ކުޑަކުދިންގެ ގޮތުގައި" އޭނާ ސިފަކުރެއްވި ގައުމުތަކަށް އިންޒާރު ދެއްވަމުން ވިދާޅުވީ، އެ ގައުމުތަކުން ބޭރުގެ ފަރާތްތަކުގެ މައްޗަށް އުންމީދުތައް ނުބެހެއްޓުމަށެވެ. އަދި ބޭރު މީހުންނަށް އަމާން ކަމެއް ހޯދައި ނުދެވޭނެ ކަމަށެވެ.
ސަރަހައްދީ އަމާންކަމުގެ ކަންކަން އަލުން ތަރުތީބު ކުރަމުންދާއިރު، "ކުދި ގައުމުތަކަށް" މި އާ މޭޒުދޮށުގައި ޖާގައެއް ނެތް ކަމަށާއި، އެ ގައުމުތަކުގެ ސްޓްރެޓެޖިކް ދިރިއުޅުން ބިނާވެފައިވަނީ "ތެހެރާނަށް ކެތްކުރެވޭ މިންވަރެއްގެ" މައްޗަށް ކަމަށް އޭނާ ވަރަށް ހަރުކަށިކޮށް ވިދާޅުވިއެވެ.
