ޔޫކްރެއިނުން ރަޝިޔާގެ ތެޔޮ ސާފުކުރާ ކާރުޚާނާތަކަށް ދެމުންދާ ވަރުގަދަ ޑްރޯން ހަމަލާތަކުގެ ސަބަބުން ރަޝިޔާގެ އެތެރޭގެ ބާޒާރުން ޕެޓްރޯލް މަދުވެ، އެ ޤައުމުން އިންޑިއާއިން ޕެޓްރޯލް އެތެރެކުރުމަށް ބޮޑެތި ތައްޔާރީތަކެއް ފަށައިފިއެވެ. ރިޕޯޓްތައް ބުނާގޮތުން މި ހަމަލާތަކުގެ ސަބަބުން ރަޝިޔާގެ ތެޔޮ ސާފުކުރާ މިންވަރު ފާއިތުވި ވިހި އަހަރު ތެރޭގައި ނުދާ ވަރަށް ދަށަށް ގޮސް، ޕެޓްރޯލް އުފައްދާ މިންވަރު ވަނީ %25 ދަށަށް ގޮސްފައެވެ. މީގެ ސަބަބުން އެޤައުމުގެ އެތެރޭގެ ޑިމާންޑް ފުއްދުމަށް %20 ގެ ތަފާތެއް ވަނީ އުފެދިފައެވެ.
މި ޕެޓްރޯލްގެ ދަތިކަމުން ސަލާމަތްވުމަށްޓަކައި، ބޭރު ޤައުމުތަކުން ޕެޓްރޯލް އެތެރެކުރާ ތެޔޮ ކުންފުނިތަކަށް ސަރުކާރުން ސަބްސިޑީ ދެވޭނެ ގޮތަށް ރަޝިޔާގެ ޓެކްސް ޤާނޫނަށް އިސްލާހު ގެނައުމުގެ މަސައްކަތް ދަނީ ކުރަމުންނެވެ. މި ސަބްސިޑީ ކަނޑައެޅުމުގައި ބަލާނީ އިންޑިއާގެ ބާޒާރުގައި ޕެޓްރޯލް ހުރި އަގަށާއި އިންޑިއާގެ ބަނދަރުތަކުން ރަޝިޔާއަށް ތެޔޮ އުފުލުމަށް ހިނގާ ޚަރަދަށެވެ. މީގެ ކުރިން ބެލަރޫސްއިން އެތެރެކުރި ތެލުން މި ދަތިކަން ހައްލުނުވުމުން، ރަޝިޔާގެ އެންމެ ބޮޑު ސާފުނުކުރާ ތެޔޮ ގަންނަ އިންޑިއާއަށް ބަރޯސާވާން ރަޝިޔާއަށް ވަނީ މަޖުބޫރުވެފައެވެ.
ތަފާސްހިސާބުތައް ދައްކާގޮތުން، 2026 ވަނަ އަހަރުގެ ޖޫން މަހު އިންޑިއާއިން ވަނީ ރަޝިޔާއިން ދުވާލަކު 2.66 މިލިއަން ފީފާގެ ސާފުނުކުރާ ތެޔޮ ގަނެފައެވެ. އިންޑިއާއިން މި ތެޔޮ ގަނެ، އެޤައުމުގެ ކާރުޚާނާތަކުގައި ސާފުކުރުމަށްފަހު އަލުން ރަޝިޔާއަށް ޕެޓްރޯލްގެ ގޮތުގައި ބޭރުކުރަނީއެވެ. ނަމަވެސް، އިންޑިއާގެ ޕެޓްރޯލްގައި %20 އެތަނޯލް ހުންނައިރު، މިއީ ރަޝިޔާގެ ސްޓޭންޑަޑަށްވުރެ ދެގުނަ މަތީ އަދަދެކެވެ. މި ތެލުގެ ދަތިކަމުގެ އަސަރު ރަޝިޔާގެ ވައިގެ ދަތުރުފަތުރަށްވެސް ދަނީ ކުރަމުންނެވެ. ކުދި މަތިންދާބޯޓު ދުއްވާ ފަރާތްތަކުން މިހާރު ދަނީ އޭވިއޭޝަން ފިއުލްގެ ބަދަލުގައި އާދައިގެ ޕެޓްރޯލް ބޭނުންކުރަމުންނެވެ. މޮސްކޯ އަދި ސެންޓް ޕީޓަރސްބާގް ފަދަ ބޮޑެތި ސިޓީތަކުގައި ޕެޓްރޯލް ވިއްކާ މިންވަރު މިހާރު ދަނީ ލިމިޓް ކުރަމުންނެވެ.
