ބްރަސަލްސްގެ ސިޔާސަތު އެކުލަވައިލާ ފަރާތްތަކުން މިހާރު އެންމެ ބޮޑަށް ކަންބޮޑުވަނީ އެމެރިކާގެ ރައީސް ޑޮނަލްޑް ޓްރަމްޕް، ޗައިނާގެ ރައީސް ޝީ ޖިންޕިންއާއެކު ގާތް ގުޅުމެއް ބާއްވަވަން މަސައްކަތް ކުރެއްވުމުން ޓައިވާންގެ މައްސަލަ ފަނޑުވެދާނެތީއެވެ. މިފަދަ ޑިޕްލޮމެޓިކް ބަދަލެއްގެ ސަބަބުން ޓައިވާން މައްސަލައިގައި އެމެރިކާގެ ސާބިތުކަން ކުޑަވެ، ޗައިނާއަށް ހިތްވަރު ލިބިގެން ހަރުކަށި ފިޔަވަޅުތަކެއް އަޅަން މަގުފަހިވެދާނެ ކަމުގެ ބިރު ވިލާތުގެ އިއްތިހާދަށް އެބައޮތެވެ.
މިއީ ހަމައެކަނި ޖިއޯޕޮލިޓިކަލް މައްސަލައެއް ނޫނެވެ. މިއީ ވިލާތުގެ އިގްތިސާދާ ސީދާ ގުޅިފައިވާ ބޮޑު ނާޒުކުކަމެކެވެ. ޓައިވާން ކަނޑުއޮޅީގައި އަސްކަރީ ކުރިމަތިލުމެއް ހިނގައިފިނަމަ، އޭގެ ސަބަބުން ލިބޭނެ މާލީ ގެއްލުން އެންމެ ބޮޑަށް އުފުލަން ޖެހޭނެ އެއް ސަރަހައްދަކީ ވިލާތެވެ.
"ބްލޫމްބާގް އިކޮނޮމިކްސް" ގެ އަންދާޒާތަކުން ދައްކާގޮތުގައި، ޓައިވާން މައްސަލައިގައި އެމެރިކާ އާއި ޗައިނާއާ ދެމެދު ހަނގުރާމައެއް ފެށިއްޖެނަމަ، ފުރަތަމަ އަހަރުގެ ތެރޭގައި އެކަނިވެސް އީޔޫގެ އިގްތިސާދުން 2 ޓްރިލިއަން ޑޮލަރު ގެއްލިގެންދާނެއެވެ.
މި ހީނަރުކަމުގެ އަސަރު އެންމެ ބޮޑަށް ކުރާނީ ޖަރުމަނަށެވެ. ޖަރުމަނުގެ ގައުމީ އުފެއްދުންތެރިކަމުގެ 14 އިންސައްތައަށް ދަށަށް ދާނެ ކަމަށް ލަފާކުރެވެއެވެ. މިއީ ހަނގުރާމައިގައި ސީދާ ބައިވެރިވާ އެމެރިކާ ނުވަތަ ޗައިނާއަށް ލިބޭނެ އިގްތިސާދީ ގެއްލުމަށްވުރެ ދެގުނަ ބޮޑު މިންވަރެކެވެ. މި ހިސާބުތަކުން ހާމަވަނީ ހަކަތަ އާއި ދިފާއީ ދާއިރާގެ އިތުރުން، ވިލާތުގެ ސިނާއަތްތައް ޓައިވާނުގެ ސަޕްލައި ޗެއިންތަކަށް ބަރާވެފައި އޮތް މިންވަރެވެ.
ދުނިޔޭގެ އިގްތިސާދު ގުޅިލާމެހިފައިވާލެއް ބޮޑުކަމުން، ޖިއޮގްރަފީގެ ގޮތުން ދުރުގައި އޮތުމަކީ ރައްކާތެރިކަން ލިބޭނެ ކަމެއް ނޫނެވެ. ޓައިވާނާއި ވިއެޓްނާމް އަދި ސައުތު ކޮރެއާއަށް ފަހު، މި ހަނގުރާމައިގެ ސަބަބުން އެންމެ ބޮޑު އިގްތިސާދީ ގެއްލުމެއް ލިބޭނެ ގައުމަކީ ޖަރުމަނެވެ. ވިލާތުގެ ގައުމުތަކަކީ މިފަދަ ބޮޑު ބާރުތަކުގެ ކުރިމަތިލުމެއްގައި ސީދާ ބައިވެރިންނަށް ނުވި ނަމަވެސް، އިގްތިސާދީ ގޮތުން އެންމެ ބޮޑު "ގުރުބާނީއެއް" ވާންޖެހޭ ފަރާތްތަކަށް ވުމުގެ ފުރުސަތު ބޮޑެވެ.
