ބަންގްލަދޭޝްގައި ހުންނަ އިންޑިއަން ވިސާ އެޕްލިކޭޝަން ސެންޓަރުތައް ގާތްގަނޑަކަށް ދެ އަހަރު ދުވަހު ބަންދުކޮށްފައި ބެހެއްޓުމަށްފަހު، ފަތުރުވެރިކަމުގެ ވިސާ އަލުން ދޭން ފެށުމާއެކު މިއަދު އަލުން ހުޅުވައިފިއެވެ. ވެރިރަށް ޑާކާގެ ޖަމުނާ ފިއުޗަރ ޕާކުގައި ހުންނަ ވިސާ ސެންޓަރު ކުރިމަތީގައި ގިނަ އަދަދެއްގެ ބަންގްލަދޭޝް ރައްޔިތުން ކިއޫ ހަދައިގެން ތިއްބެވެ. އިންޑިއާގެ ވިސާއަށް އެދި ފޯމު ހުށަހަޅަމުންދިޔަ އެ މީހުން ތިބީ ޓޫރިސްޓް ވިސާ އަލުން ލިބެން ފެށުމުން ވަރަށް ހިތްހަމަޖެހިފައެވެ.
ވިސާއަށް އެދި އައިސް ހުރި ޗަންދުރާ ރޯއި، ކިޔައިދިން ގޮތުގައި އޭނާ އެ ތަނަށް އައީ ބޭސްފަރުވާއަށްދާން މެޑިކަލް ވިސާއެއް ހޯދާށެވެ. "އަހަރެންގެ ލިޔެކިޔުންތައް މިހާރު ހުށަހަޅައިފިން. މި ތަނުގެ ޚިދުމަތްތައް ވަރަށް ރަނގަޅު. މީގެ ދެ އަހަރު ކުރިން ބައެއް އުނދަގޫތަކާ ދިމާވި ނަމަވެސް، މިހާރު ހުރިހާ ކަމެއްވެސް ވަރަށް ފުރިހަމަ،" އޭނާ ބުންޏެވެ. މީގެ އިތުރުން ބޭސްފަރުވާއާއި ފަތުރުވެރިކަމަކީ ބަންގްލަދޭޝްގެ ރައްޔިތުންނަށް، ޚާއްޞަކޮށް ބޭސްފަރުވާގެ ޚިދުމަތް ހޯދުމަށް ވަރަށް ބޭނުންތެރި ދެ ކަންތައް ކަމަށް އޭނާ ފާހަގަކުރިއެވެ. "ވަރަށް ގިނަ ދުވަސްތަކަކަށްފަހު ޓޫރިސްޓް ވިސާ މި ހުޅުވުނީ. އެހެންވެ، އެންމެންވެސް ބޭނުންވަނީ ކުރީގެ ދުވަސްތަކެކޭ އެއްގޮތަށް އިންޑިއާއަށް ޒިޔާރަތްކޮށްލަން،" ރޯއި އިތުރަށް ބުންޏެވެ.
ވިސާއަށް އެދިފައިވާ އެހެން މީހެއް ކަމަށްވާ ޝަކީލާ އަޚްތަރ ސީމާ ބުނި ގޮތުގައި އޭނާ އިންޑިއާ ވިސާއަށް އެޕްލައިކުރީ މައިގަނޑު ގޮތެއްގައި ބޭސްފަރުވާއަށެވެ. "އަހަރެން ފަރުވާ ހޯދަނީ ޗެންނާއީއާއި ކޮލްކަޓާގެ މަނީޕާލް ހޮސްޕިޓަލުން. މީގެ ކުރިންވެސް އަހަރެން މެޑިކަލް ވިސާ ނެގިން، އޭރު ދިނީ 6 މަސް ދުވަހުގެ ވިސާއެއް. ޑޮކްޓަރު އަލުން ދެއްކުމަށް އެދުމުން މިހާރު މިއައީ އާ ވިސާއަކަށް އެދެން. އަހަރެމެންގެ ގައުމުގެ ގިނަ މީހުން ޗެންނާއީ ނުވަތަ އެހެން ސިޓީތަކަށް ދަނީ އިންޑިއާގެ ބޭސްފަރުވާގެ ފެންވަރު ރަނގަޅުވީމާ. މީގެ ކުރިން މަނީޕާލް ހޮސްޕިޓަލަށް ދެއްކުމުން ވަރަށް ކަމުދިޔަ، އެހެންވެ އަލުން މިދަނީ،" ސީމާ ކިޔައިދިނެވެ.
ޖޫން 25 ގައި އިންޑިއާއިން ބަންގްލަދޭޝްއަށް ކަނޑައެޅުއްވި އާ ހައިކޮމިޝަނަރު ދިނޭޝް ޓްރިވެދީ ވަނީ، 2026 ޖޫން 28 އިން ފެށިގެން ބަންގްލަދޭޝްގެ ވެރިރަށް ޑާކާ ހިމެނޭ ގޮތަށް ޖުމްލަ 5 ވިސާ ސެންޓަރަކުން ޓޫރިސްޓް ވިސާ ދޫކުރަން ފަށާނެކަން އިއުލާނުކުރައްވާފައެވެ. އެނާ މިކަން އިއުލާނުކުރެއްވީ ބަންގްލަދޭޝްގެ ރައީސަށް ސަފީރުކަމުގެ ފަތުރު އަރުއްވުމަށްފަހުގައެވެ.
މީގެ ކުރިން، 2024 އޮގަސްޓް 5 ގައި ބަންގްލަދޭޝްގައި ހިނގި ހަމަނުޖެހުންތަކުގައި، ދަނމޮންޑީގައި ހުންނަ އިންދިރާ ގާންދީ ކަލްޗަރަލް ސެންޓަރުގައި، ރޯކޮށްލިއެވެ. އަދި ބަންގްލަދޭޝްގެ އެކި ސިޓީތަކުގައި ހުރި އިންޑިއާގެ 5 ވިސާ ސެންޓަރަކަށް ހަމަލާދީ، ތަރައްގީގެ މަޝްރޫއުތަކުގައި އުޅޭ އިންޑިއާގެ މުވައްޒަފުންނަށް ބިރުދެއްކިއެވެ. މި ސަލާމަތީ ނުރައްކާތަކާ ހުރެ އިންޑިއާ ހައިކޮމިޝަނަށް މަޖުބޫރުވީ ބަންގްލަދޭޝްގައި ދެމުންދިޔަ ވިސާގެ ޚިދުމަތްތައް ވަރަށް ބޮޑަށް މަދުކޮށްލާށެވެ.
ނަމަވެސް، ސީރިއަސް ބަލިތަކަށް ފަރުވާ ހޯދުމަށް އިންޑިއާއަށް ދާންޖެހޭ މީހުންގެ އިންސާނީ ބޭނުންތަކަށް އިސްކަންދީގެން، 2024 އޮގަސްޓް 5 ގެ ސަލާމަތީ ގޮންޖެހުންތަކާއެކުވެސް އިންޑިއާ ހައިކޮމިޝަނުން ދިޔައީ ޑާކާ، ޗިޓަގޮންގް، ޚުލްނާ، ސިލްހެޓް އަދި ރާޖްޝާހީގައި ހުންނަ ވިސާ ސެންޓަރުތައް ހިންގަމުންނެވެ. އިންޑިއާއިން ދިޔައީ ކޮންމެ ދުވަހަކުވެސް ޓޫރިސްޓް ވިސާ ފިޔަވައި އެހެން ކެޓަގަރީތަކުން 1،500 އަށްވުރެ ގިނަ ވިސާ ދޫކުރަމުންނެވެ. އެގޮތުން މެޑިކަލް ވިސާއާއި ކުއްލި ޙާލަތްތަކުގައި ބޭނުންވާ ވިސާތަކަށް އެންމެ އިސްކަމެއް ދިނެވެ.
އިންޑިއާއިން ބަންގްލަދޭޝްއަށް ކަނޑައެޅުއްވި އާ ހައިކޮމިޝަނަރު ދިނޭޝް ޓްރިވެދީ ޑާކާއަށް ވަޑައިގަތީ މިދިޔަ ޖޫން 12 ގައި އެއްގަމު މަގުން، ޕެޓްރަޕޯލް-ބެނަޕޯލް ބޯޑަރު ހުރަސްކުރައްވައެވެ. ޓްރިވެދީ މި މަގާމާ ހަވާލުވެވަޑައިގަތީ، މިދިޔަ މޭ މަހާ ހަމައަށް 4 އަހަރު ދުވަހު ބަންގްލަދޭޝްގައި އިންޑިއާގެ ހައިކޮމިޝަނަރުކަން ކުރެއްވި ޕްރަނޭ ކުމާރު ވަރްމާގެ ދައުރު ހަމަވުމުންނެވެ.
