ކޯޓު މަރުހަލާ ނިންމާލުމަށްފަހު، ހަމަޖެހިލައިގެން ބާރު ދުވެލީގައި ދުއްވާފައިދިޔަ ޖަލު ވޭނެއްގެ ތެރެއިން ކުއްލިއަކަށް 14 ގައިދީއަކު ފިލައިގެން ދާނީ ކިހިނެއް ހެއްޔެވެ؟ މިއީ ހަމައެކަނި ފިލްމީ މަންޒަރެއް ނޫނެވެ. މިއީ ޕާކިސްތާނުގެ ރާވަލްޕިންޑީގައި ހިނގައިދިޔަ، މުޅި ފުލުހުންގެ މުއައްސަސާ ލަދުގަންނުވާލި ހަގީގީ ހާދިސާއެކެވެ. މި ހާދިސާއާއެކު، ސަލާމަތީ ކަންކަމަށް ޒިންމާވާންޖެހޭ ބޮޑުންގެ ގޮނޑިތައް ހޫނުވެ، އިހުމާލުގެ ކޮޅިގަނޑެއް ވަނީ ވަދެވިފައެވެ.
އިއްޔެ ހަވީރުގެ ވަގުތަކީ ރާވަލްޕިންޑީގެ ކަހޫޓާ ކޯޓުން އަދިއާލާ ޖަލަށް ކުށްވެރިން ގޮވައިގެން ދިޔަ ރޫޓީން ދަތުރެކެވެ. ވޭނުގެ ތެރޭގައި ތިބި ކުށްވެރިން ތިބީ އެނބުރި ގޮޅިތަކަށް ދާން ތައްޔާރުވެގެންނެވެ. ނަމަވެސް، މަގުމަތީގެ ކޮންމެވެސް ހިސާބަކުން، ހީވެސް ނުކުރާ ފަދަ ރޭވުމެއްގެ ދަށުން 14 ކުށްވެރިއަކު ވަނީ ފުލުހުންގެ ލޮލަށް އަޅި ބުރުވާލުމަށްފަހު ފިލާފައެވެ.
މި ހާދިސާއާއެކު މުޅި ސަރަހައްދަށް ސިހުން ލިބުނެވެ. ކުށްވެރިން ހޯދުމަށް ފުލުހުން ވަގުތުން ބޮޑު އޮޕަރޭޝަނެއް ފެށިއެވެ. ނަތީޖާއެއްގެ ގޮތުން، ފިލި މީހުންގެ ތެރެއިން 4 ގައިދީއަކު ފުލުހުން ވަނީ ހަމަ އެ ވަގުތު ކަހަލަ ގޮތަކަށް އަލުން އަތުލައިގަނެ، ގޮޅިއަށް ލާފައެވެ. ނަމަވެސް ބާކީ ތިބި މީހުން ހޯދަން ކުރާ މަސައްކަތުން، ރައްޔިތުންގެ ހިތްތަކުގައި ވަނީ ބިރުވެރިކަން އުފެދިފައެވެ.
އެއްފަހަރާ މިހާ ގިނަ ކުށްވެރިން ފިލުމަކީ ހަމައެކަނި "ނަސީބަކުން" ވީ ކަމެއް ނޫންކަން ފުލުހުންގެ އިސްވެރިންނަށް ވިސްނުނެވެ. މީގެ ފަހަތުގައި އެތެރޭގެ ބައެއްގެ އެހީތެރިކަމާއި ބޮޑު އިހުމާލެއް އޮތްކަމުގެ ވަސް ދުވުމާއެކު، ފުލުހުން ވަނީ ހަރުކަށި ފިޔަވަޅުތަކެއް އަޅަން ފަށާފައެވެ.
އެ ވަގުތު ޑިއުޓީގައި ތިބި އަދިއާލާ ޖަލުގެ ގާޑުންގެ އިންޗާޖާއި، އިތުރު 4 މުވައްޒަފަކު ފުލުހުން ވަނީ ވަގުތުން ހައްޔަރުކޮށްފައެވެ. އެ މީހުން ކުށްވެރިންނާ މުއާމަލާތް ކުރިތޯ ބެލުމަށްޓަކައި، އެންމެންގެ މޮބައިލް ފޯނުތައް ވެސް މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
މި ސީރިއަސް މައްސަލައިގެ ހޫނުގަނޑު ސީދާ ގޮސް ޖެހުނީ މަތީ ފަންތީގެ އޮފިޝަލުންގެ ގޮނޑިތަކުގައެވެ. ކަމާބެހޭ ފަރާތްތަކުން ވަނީ ހެޑްކުއާޓާސްގެ އެސް.ޕީ މަގާމުން ވަކިކޮށް، ލާހޯރަށް ރިޕޯޓްކުރުމަށް އަމުރުކޮށްފައެވެ. މީގެ އިތުރުން، ހެޑްކުއާޓާސްގެ ޑީ.އެސް.ޕީ އިމްތިޔާޒް އަހުމަދު ވަނީ ވަގުތުން ސަސްޕެންޑްކޮށްފައެވެ.
މި ހާދިސާއާ ގުޅިގެން ޕަންޖާބުގެ އައި.ޖީ ވަނީ ރާވަލްޕިންޑީގެ އާރް.ޕީ.އޯ ގެ ކިބައިން މި ހާދިސާގެ ތަފްސީލީ ރިޕޯޓަކަށް އެދިވަޑައިގެންފައެވެ. ޖަލު ބަލަހައްޓާ މީހުންނަށް ކުށްވެރިންގެ މައްޗަށް ބާރު ނުފޮރުވުނު މި ހާދިސާގެ ސަބަބުން، މުޅި ސިސްޓަމްގެ ރައްކާތެރިކަމާމެދު މިހާރު ވަނީ ސުވާލު އުފެދިފައެވެ. ފުލުހުންގެ ޚާއްޞަ ޓީމުތަކުން ރޭގަނޑާއި ދުވާލު ހޯދަމުންދަނީ، ފިލައިގެން އުޅޭ ބާކީ ތިބި 10 ކުށްވެރިންނެވެ.
އަދިޔާލާ ޖަލަކީ ކުރިގެ ބޮޑު ވަޒީރު އިމްރާން ޚާނާއި އަިނބިކަނބަލުން ބުޝްރާ ބީބީ ގައިދުގައި ބަހައްޓާފައިވާ ޖަލެވެ!
