ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން ފީ ނެގުމުގެ މަޝްރޫޢެއް، އެމެރިކާގެ ފާޅުކަން ބޮޑު ދެކޮޅުހެދުންތަކާ އެކުވެސް، އީރާނާއި އޮމާނުން ކުރިއަށްގެންދާ ކަމަށް 'ދަ ނިއުޔޯކް ޓައިމްސް' އިން ރިޕޯޓްކޮށްފިއެވެ. އެ ނޫހުން މިކަން ހާމަކޮށްފައިވަނީ މި ކަމުގެ މައުލޫމާތު އެނގޭ އީރާނުގެ މުއައްޒަފަކާއި ހަތަރު ޑިޕްލޮމޭޓުންނާ ހަވާލާދީއެވެ.
މި ނިންމުން ތަންފީޒުވެއްޖެނަމަ، މިއީ އެ ސަރަހައްދުގެ އިސްތުރާތީޖީ ކަނޑުގެ މަގުގެ ޙާލަތަށް، ހަނގުރާމައިގެ ކުރިއާ އަޅާބަލާއިރު އަންނާނެ ބޮޑު ބަދަލެކެވެ. މިއީ ފެބުރުއަރީ 28 ގައި އީރާނަށް ޙަމަލާދިނުމަށް އެމެރިކާ އާއި އިސްރާއީލުން ނިންމި ނިންމުމުގެ ސަބަބުން، މެދުއިރުމައްޗަށް ކުރިން އުންމީދު ނުކުރާ ފަދަ ބޮޑެތި އަދި ދުރު ރާސްތާގެ ބަދަލުތަކެއް އަންނަމުންދާކަން ހާމަކޮށްދޭ ކަމެކެވެ.
އީރާނުގެ އޮފިޝަލުން ވަނީ އެ ކަނޑުއޮޅިން މާލީ ފައިދާ ހޯދުމުގެ ވިސްނުން ގެންގުޅޭކަން ތަކުރާރުކޮށް ހާމަކޮށްފައެވެ.
އީރާނުގެ އޮފިޝަލަކާއި އެ ސަރަހައްދުގެ ޑިޕްލޮމޭޓަކު ބުނި ގޮތުގައި، އޮމާނުން ދާދިފަހުން ވަނީ އެމެރިކާ އަދި ހުޅަނގުގެ އެހެން ބައިވެރިންނަށް ރަސްމީ ހުށަހަޅުމެއް ހުށަހަޅާފައެވެ. އެ ހުށަހެޅުމުގައި ބަޔާންކޮށްފައިވަނީ ކަނޑުއޮޅި ބޭނުންކުރާ ޝިޕިންގ ކުންފުނިތަކުން ޚިދުމަތުގެ ފީއެއް ދައްކަންޖެހޭ ގޮތް ހެދުމަށެވެ.
އެމެރިކާގެ މަޤާމާ ބެހޭ މަޢުލޫމާތު އެނގޭ ފަރާތަކުން ކަށަވަރުކޮށްދީފައިވާ ގޮތުގައި، އެމެރިކާގެ މަޝްވަރާވެރިންނަށް އޮމާނުގެ މި ހުށަހެޅުން ލިބިފައިވާ ކަމަށާއި، މިކަމާ ގުޅޭގޮތުން އޮމާނުގެ އޮފިޝަލުންނާ އެކު މަޝްވަރާކުރަން ގަސްތުކުރާ ކަންބޮޑުވުންތަކެއް އެބަހުރި ކަމަށެވެ. މި ޚަބަރު ދީފައިވާ ހުރިހާ އޮފިޝަލުންނާއި ޑިޕްލޮމޭޓުންވެސް މަޢުލޫމާތު ހިއްސާކޮށްފައިވަނީ، މިއީ ނާޒުކު ޑިޕްލޮމެޓިކް މައްސަލައަކަށް ވުމުން، އެމީހުންގެ ނަން ހާމަނުކުރުމުގެ ޝަރުޠުގެ މަތީގައެވެ.
