ޓެކްނޮލޮޖީގެ ދުނިޔޭގެ ބާރުގަދަ ގޫގްލްގެ ބާރުވެރިކަމަށް، ޔޫރަޕްގެ ކޯޓަކުން މިވަނީ ބޮޑު ހުއްޓުމެއް ގެނެސްފައެވެ. ސްވިޑްންގެ ފިންޓެކް ކުންފުންޏެއް ކަމަށްވާ ކްލާނާ އަށް 1.7 ބިލިއަން ޔޫރޯގެ ބަދަލެއް ދިނުމަށް ސްޓޮކްހޯމްގެ ކޯޓަކުން ކުރި އަމުރުން ހާމަކޮށްދެނީ، ގޫގްލް ފަދަ ކުންފުނިތަކުން އަމިއްލަ މަންފާއަށްޓަކައި މުޅި އިންޓަނެޓްގެ އިންސާފުވެރިކަން ފައިދަށުލަމުންދާ މިންވަރެވެ.
ގޫގްލްގެ މައްސަލައަކީ ހަމައެކަނި ވިޔަފާރީގެ ވާދަވެރިކަމެއް ނޫނެވެ. މިއީ ޑިޖިޓަލް މާކެޓުގައި އެމީހުންގެ ބާރުގަދަކަން ނަހަމަ ގޮތުގައި ބޭނުންކޮށް، އެހެން ކުންފުނިތައް ފުނޑުފުނޑުކޮށްލުމުގެ ނުބައި އަމަލެކެވެ. ގޫގްލްގެ ސާރޗް އިންޖީނުގެ ތެރޭގައި އެމީހުންގެ އަމިއްލަ ޕްރައިސް ކޮމްޕެރިސަން ޓޫލްތައް ޕްރޮމޯޓްކޮށް، ވާދަވެރި އެހެން ކުންފުނިތަކުގެ ވިޔަފާރިތައް އަޑިއަޅުވާލުމަކީ، މި ޓެކް މޮންސްޓަރުން އިންޓަނެޓް ކޮންޓްރޯލް ކުރާ ގޮތުގެ ނުރައްކާތެރި މިސާލެކެވެ.
2017 ވަނަ އަހަރު ޔޫރަޕިއަން ކޮމިޝަނުން ގޫގްލް 2.4 ބިލިއަން ޔޫރޯއިން ޖޫރިމަނާ ކުރީ ވެސް ހަމަ މިފަދަ އަޚްލާގީ ވެއްޓުމެއްގެ ސަބަބުންނެވެ. އެހެންނަމަވެސް، އެހާ ބޮޑު ޖޫރިމަނާއަކުން ވެސް މި ކުންފުންޏަށް ފިލާވަޅެއް ނުލިބުނެވެ. ގޫގްލްގެ އުކުޅަކީ ވާދަވެރި ކުންފުނިތަކުގެ ޓްރެފިކްތައް ބަލިކަށިކޮށް، އެމީހުންގެ އަމިއްލަ ޚިދުމަތްތައް މަތިކުރުމެވެ. މިއީ ޑިޖިޓަލް ޒަމާނުގައި ހިންގާ ސައިބަރ ޑިކްޓޭޓަރޝިޕެކެވެ.
"ކްލާނާ" އިން ކުރި މި ދައުވާއަކީ، ޑިޖިޓަލް ބާރުތަކުގެ ކުރިމަތީގައި ނިކަމެތިވަމުންދާ ވިޔަފާރިތަކަށް ލިބުނު ކާމިޔާބީއެކެވެ. އެހެންނަމަވެސް، 1.7 ބިލިއަން ޔޫރޯއަކީ ގޫގްލް ފަދަ ކުންފުންޏަކަށް މާބޮޑު އަދަދަކަށް ނުވެދާނެއެވެ. އެމީހުން މިހާރު ވެސް އުޅެނީ މި ހުކުމް އިސްތިއުނާފު ކުރުމަށްޓަކައި ގާނޫނީ ގޮތުން ހަނގުރާމަ ކުރުމަށެވެ.
