ފުޓްބޯޅައިގެ ދުނިޔެ މިހާރު މި އޮތީ ވިޔަފާރީގެ ޝިކާރައަކަށް ވެފައެވެ. 13 ބިލިއަން ޑޮލަރުގެ އާމްދަނީއެއް ހޯދުމުގެ ހުވަފެނުގައި، ފީފާ އިން މިވަނީ ފުޓްބޯޅައިގެ އަސްލު ރޫހު ވިއްކާލައިފައެވެ. 2026 ގެ ވޯލްކަޕުން ފެންނަމުންދާ މަންޒަރުތަކަކީ ހަމައެކަނި ކުޅިވަރުގެ ފޯރިއެއް ނޫނެވެ. މިއީ އެމެރިކާގެ ސިޔާސީ ނުފޫޒާއި ފީފާގެ ކޮރަޕްޓް ވެރިންގެ ދަހިވެތިކަން އެކުވެފައިވާ ނުރައްކާތެރި ގުޅުމެކެވެ.
ފީފާގެ ކުރީގެ ރައީސް ސެޕް ބްލެޓާ ދެކެވަޑައިގަންނަވާ ގޮތުގައި، 48 ޓީމު ބައިވެރިކޮށް 104 މެޗު ކުޅޭ ގޮތަށް މުބާރާތް ފުޅާކުރުމަކީ ފުޓްބޯޅައިގެ ހަމަތައް ފުނޑުފުނޑުކޮށްލުން ފަދަ ކަމެކެވެ. ނަމަވެސް މިއަށްވުރެ ބޮޑު ކަންބޮޑުވުމަކީ، ފީފާގެ މިހާރުގެ ވެރިޔާ ޖިއާނީ އިންފަންޓީނޯ އާއި އެމެރިކާގެ ރައީސް ޑޮނަލްޑް ޓްރަމްޕާ ދެމެދު އޮތް "ސިޔާސީ ލޯބީގެ ގުޅުން" އެވެ. މިއީ ފީފާގެ އަމިއްލަ ގާނޫނުތަކާ ޚިލާފަށް، އެ ޖަމިއްޔާ އިން އަމަލުކުރަންޖެހޭ ވަކި ފަރާތަކަށް ނުޖެހުމުގެ އުސޫލުތައް ފައިދަށުލައި، އެމެރިކާގެ ސިޔާސީ ބޭނުންތަކަށް ފުޓްބޯޅަ ހަތިޔާރަކަށް ހެދުމުގެ އަމަލީ ސިފައެކެވެ.
މި ހުރިހާ ކަމެއްގެ ފެށުމަކީ 2010 ވަނަ އަހަރު ގަތަރަށް ވޯލްޑް ކަޕް ލިބުނު ދުވަހެވެ. އެމެރިކާގެ ޑެލިގޭޝަނުން އެ ނިންމުން ސިފަކުރީ "ބޭވަފާތެރިކަމެއް"ގެ ގޮތުގައެވެ. ޔޫއެސް ސޮކާ ފެޑެރޭޝަންގެ ކުރީގެ ރައީސް ސުނިލް ގުލާޓީ ފްރާންސްގެ ތަހުގީގު ޓީމުތަކުގެ ކުރިމަތީގައި އެއްބަސްވެވަޑައިގެންނެވި ގޮތުގައި، ގަތަރުން ވަނީ "ވޯޓު ގަނެފައެވެ." ނަމަވެސް އެމެރިކާގެ މި ގާނޫނީ ހަމަލާތަކަކީ ވެސް އިންސާފު ހޯދަން ކުރި ކަމެއް ނޫނެވެ. މިއީ ފީފާގެ ތެރެއަށް އެމެރިކާގެ ސިޔާސީ ބާރުވެރިކަން ވަދެގަނެ، އެ މީހުން ބޭނުންވާ ގޮތަށް ކުޅިވަރުގެ އޮއިވަރު ބަދަލުކުރުމަށް ރޭވި ރޭވުމެކެވެ.
މިއަދު ވޯލްޑް ކަޕް މިވަނީ ހަމައެކަނި ކުޅިވަރުގެ މައިދާނަކަށް ނޫނެވެ. އެމެރިކާގެ ސިޔާސީ ނުފޫޒު ދުނިޔޭގެ ކަންކޮޅުތަކަށް ފެތުރުމުގެ ޕްލެޓްފޯމަކަށް ވެފައެވެ. ފީފާގެ ތެރޭގައި އޮތް މި ނުބައި ގުޅުމުން ދައްކުވައިދެނީ، ފުޓްބޯޅައިގެ އެންމެ މަތީ ފަންތީގައި މިއަދު އޮތީ ހަމައެކަނި ފައިސާ އާއި ބާރު ކަމެވެ. ދަނޑުމަތީގައި ކުޅޭ ކުޅިވަރަށްވުރެ ބޮޑަށް، ފީފާ އާއި އެމެރިކާގެ މި ނާޖާއިޒު ގުޅުމުން ފުޓްބޯޅައިގެ އަގު ހެޔޮވެ، އެ މުބާރާތުގެ ހައިބަތު ދަނީ ގެއްލެމުންނެވެ.
