މިއީ އެމެރިކާއަށް 250 އަހަރު ފުރުމުގެ މުނާސަބާއާ ދިމާކޮށް ތައްޔާރުކޮށްފައިވާ 18 ސިލްސިލާ އެވެ. މި ސިލްސިލާގައި އެމެރިކާގެ ސިޔާސަތާއި ކަން ކުރާ ގޮތަށް ބަލާފައި ވާނެއެވެ.
ދުނިޔޭގެ އެކި ކަންކޮޅުތަކުގައި އެމެރިކާގެ އަސްކަރީ ހާޒިރީއަކީ ހަމަޖެހުން ގެނުވާ ކަމެއްގެ ގޮތުގައި އެމެރިކާއިން ސިފަކުރި ނަމަވެސް، އެމްޕަޔަރެއްގެ ގޮތުގައި ދެމިއޮތުމަށް ކުރާ އިގްތިސާދީ، އިޖްތިމާއީ، އަދި އަޚްލާޤީ ހޭދަ ވަރަށް ބޮޑެވެ. ފާއިތުވި ސަތޭކަ އަހަރަށް ވުރެ ގިނަ ދުވަހު އެމެރިކާގެ ޚާރިޖީ ސިޔާސަތު ބައްޓަންވެފައި ވަނީ، ދުނިޔޭގެ މައްޗަށް ބާރު ފޯރުވުމަކީ ކޮންމެހެން ބޭނުން އަދި ހުއްޓުވޭނެ ކަމެއް ނޫން ކަމަށް ދެކޭ ވިސްނުމުގެ މައްޗަށެވެ.
މި ޔަގީންކަމުގެ ސަބަބުން ހަނގުރާމަތަކާއި، އެހެން ގައުމުތަކުގެ ދާހިލީ ކަންކަމުގެ ތެރެއަށް ވަނުމާއި، ސިއްރު އޮޕަރޭޝަންތަކާއި، އަދި އަސްކަރީ ބާރުތައް އިތުރުކުރުމުގެ މަސައްކަތްތައް ހިންގާފައިވެއެވެ. މީގެ ސަބަބުން ގައުމުގެ ވަސީލަތްތައް ހުސްވެ، ދާހިލީ އިސްކަންދޭ ކަންކަން ވަނީ ބަދަލުވެފައެވެ. މި އަގު ހަމައެކަނި ދައްކަން ޖެހުނީ އެމެރިކާގެ ހަމަލާތައް އަމާޒުވި ގައުމުތަކަކަށް ނޫނެވެ. އަމިއްލަ އެމެރިކާ ރައްޔިތުންނަށް ވެސް މެއެވެ.
އިގްތިސާދީ ގޮތުން ބަލާއިރު، މި ބުރަ އިންތިހާއެވެ. 2001 ވަނަ އަހަރުން ފެށިގެން، 9/11 އަށް ފަހު ކުރި ހަނގުރާމަތަކަށް އެކަނި ވެސް 6 ޓްރިލިއަން ޑޮލަރަށް ވުރެ ގިނައިން ޚަރަދުވެފައިވެއެވެ.
މީގެ ތެރޭގައި ހަނގުރާމައިގެ ޚަރަދުތަކާއި، ކުރީގެ ސިފައިންގެ ފަރުވާއާއި، ހަނގުރާމައިގެ ދަރަނީގެ އިންޓަރެސްޓާއި، އަދި ދިގު މުއްދަތުގެ ބޭސްފަރުވާގެ ޚަރަދުތައް ހިމެނެއެވެ. މި އަދަދަކީ ފިނި ހަނގުރާމައިގެ ޚަރަދުތަކާއި، ނިއުކްލިއަރ ހަތިޔާރުގެ ޕްރޮގްރާމްތަކާއި، އަދި 80 ގައުމެއްގައި ހުރި 750 އަށް ވުރެ ގިނަ އަސްކަރީ މަރުކަޒުތައް ބެލެހެއްޓުމުގެ ޚަރަދުތައް ހިމެނޭ އަދަދެއް ނޫނެވެ.
ލޮކްހީޑް މާޓިން، ރޭތިއޮން، ބޮއިންގ، އަދި ނޯތުރޮޕް ގްރޫމަން ފަދަ ޑިފެންސް ކޮންޓްރެކްޓަރުން ވަނީ ދުނިޔޭގެ އެންމެ ބާރުގަދަ ކުންފުނިތަކަށް ވެފައެވެ. ސިޔާސީ ނުފޫޒާއި ފައިސާގެ އެހީތެރިކަމާއެކު އެމެރިކާގެ ސިޔާސަތުތައް ބައްޓަން ކުރާ ބަޔަކަށް ވެފައެވެ.
1961 ވަނަ އަހަރު ރައީސް އައިޒަންހަވަރ އިންޒާރު ދެއްވި "މިލިޓަރީ-އިންޑަސްޓްރިއަލް ކޮމްޕްލެކްސް" މިހާރު ވަނީ ނުފޫޒު ގަދަ ދާއިމީ އިގްތިސާދީ ބާރަކަށް ވެފައެވެ. މިއީ އެމެރިކާގެ ވުޖޫދު ދެމެހެއްޓުމަށްޓަކައި އަބަދުވެސް ހަނގުރާމައެއް ބޭނުންވާ ނިޒާމެކެވެ.
އިންސާނީ ގޮތުން ލިބުނު ގެއްލުން ވެސް އެހާމެ ބޮޑެވެ. އެމެރިކާގެ އައްސޭރިފަށާ ދުރުގައި ކުރި ހަނގުރާމަތަކުގައި މިލިއަނުން މީހުން މަރުވެފައިވެއެވެ.
ކޮރެއާ، ވިއެޓްނާމް، ކެމްބޯޑިއާ، ލާއޯސް، އިރާގު، އަފްޣާނިސްތާން، ސޯމާލިއާ، ލީބިޔާ، ސޫރިޔާ، އަދި އެހެނިހެން ގައުމުތަކުގެ ރައްޔިތުންނެވެ. މުޅި މުޖުތަމައުތައް ހަލާކުވެ، އިގްތިސާދުތައް ބިމާ ހަމަވެ، އެތައް ޖީލެއްގެ މީހުންނަށް ނަފްސާނީ ގޮތުން ބޮޑެތި ގެއްލުންތައް އެމެރިކާއިން ދީފައިވެއެވެ.
މެދުއިރުމައްޗާއި އެފްރިކާގައި ދިމާވި ރެފިއުޖީންގެ ކާރިސާތަކަކީ އެމެރިކާގެ ހަމަލާތަކާ ސީދާ ގުޅުންހުރި ކަންކަމެވެ. އެމެރިކާގެ އެތެރޭގައި ވެސް މިކަމުގެ އަސަރު ވަރަށް ބޮޑެވެ. ކުރީގެ ސިފައިން އެނބުރި އަންނަނީ ޖިސްމާނީ ޒަޚަމްތަކާއި، ޕީޓީއެސްޑީ ފަދަ ނަފްސާނީ ބަލިތަކާއި ދިގު މުއްދަތުގެ ސިއްހީ މައްސަލަތަކާއެކުގައެވެ. އެމެރިކާގެ ކުރީގެ ސިފައިންގެ ތެރޭގައި އަމިއްލައަށް މަރުވާ މީހުންގެ ނިސްބަތް ގައުމީ އެވްރެޖަށް ވުރެ މާ މަތީއެވެ. މިއީ ނިމުމެއް ނެތް ހަނގުރާމަތަކުގެ ސިއްރު ނަތީޖާއެކެވެ.
ސިޔާސީ ގޮތުން، އެމްޕަޔަރެއްގެ އަގަކީ ޑިމޮކްރަސީގެ ޒިންމާދާރުކަން ކުޑަވުމެވެ. ކޮންގްރެސްގެ ހުއްދަ ނެތި ހަނގުރާމަ ކުރުމަށް ރައީސުން ވެރިކަމުގެ ބާރުތައް އިތުރަށް ބޭނުންކުރަމުން ދެއެވެ.
ޓެރަރިޒަމާ ދެކޮޅަށް ކުރި ހަނގުރާމައިގެ ތެރޭގައި ފުޅާކުރި ފާރަލުމުގެ ބާރުތައް މިހާރު ވަނީ އެމެރިކާގެ ވެރިކަމުގެ ދާއިމީ ބަޔަކަށް ވެފައެވެ. ސަލާމަތުގެ ނަމުގައި މަދަނީ ހައްގުތައް ހަނިކޮށް، ބިރުވެރިކަމުން ހާއްސަ ފިޔަވަޅުތައް ދިފާއުކުރާ މުޖުތަމައެއް ވަނީ އުފެދިފައެވެ.
އަޚްލާޤީ އަގަކީ ވަޒަންކުރަން އެންމެ އުނދަގޫ ކަމެވެ. އެމެރިކާއިން އިންސާނީ ހައްގުތަކާއި ބައިނަލްއަގްވާމީ ގާނޫނުތަކުގެ ވާހަކަ ދެއްކި ނަމަވެސް، އެމެރިކާގެ އަމަލުތައް ގިނަ ފަހަރަށް އެ އުސޫލުތަކާ ޚިލާފެވެ. އަނިޔާކުރުމާއި، ޑްރޯން ހަމަލާތަކާއި، އާންމުން މަރުވުމާއި، އަދި އަނިޔާވެރި ވެރިންނަށް ތާއީދު ކުރުމުގެ ސަބަބުން އެމެރިކާގެ އިތުބާރު ވަނީ ގެއްލިފައެވެ. ބުނާ ބަހާއި އަމަލާ ދެމެދު އޮތް ފަރަގު ބޮޑުވެ، ނަމޫނާއަކަށް ވުމުގެ ގާބިލުކަން ކުޑަވެއްޖެއެވެ.
އެމްޕަޔަރެއްގެ އަގަކީ ހަމައެކަނި ޑޮލަރަކުން ނުވަތަ މަރުވި މީހުންގެ އަދަދަކުން ވަޒަންކުރެވޭނެ އެއްޗެއް ނޫނެވެ. އެއީ އަގުތައް ފަނޑުވެ، އިސްކަންދޭ ކަންކަން އޮޅުންބޮޅުންވެ، އަދި ސިޔާސީ ގޮންޖެހުންތަކަށް ޖަވާބަކަށް އަސްކަރީ ބާރުވެރިކަން ވެގެންދާ ދުނިޔެއެއް އުފެދުމެވެ. ދުނިޔޭގެ މައްޗަށް ބާރު ފޯރުވުމަށްޓަކައި އެމެރިކާއިން ވަނީ ބޮޑު އަގެއް ދައްކާފައެވެ. އަދި މުޅި އިންސާނިއްޔަތަށްވެސް މެއެވެ.
