އިންޑިއާގެ ދިފާއީ ބާރުތަކަށް ބޭނުންވާ 5.46 ބިލިއަން ޑޮލަރުގެ އަސްކަރީ އާލާތްތައް ގަތުމަށް އެ ގައުމުގެ ސަރުކާރުން ހުކުރު ދުވަހު ފާސްކޮށްފިއެވެ. މީގެ ތެރޭގައި މިސައިލް، އިލެކްޓްރޯނިކް ވޯފެއާ ސިސްޓަމް، އަދި 'ކަމިކާޒޭ' ޑްރޯންތައް ހިމެނެއެވެ. އިންޑިއާގެ ސަރުކާރުން ނެރުނު ބަޔާނެއްގައި ބުނެފައިވާ ގޮތުގައި، މި މަޝްރޫޢަށް 520 ބިލިއަން އިންޑިއާ ރުޕީސް (5.46 ބިލިއަން ޑޮލަރު) ޚަރަދުވާނެ ކަމަށް ވަނީ ލަފާކޮށްފައެވެ. މި ހަތިޔާރުތައް ގަތުމަށް އިބްތިދާއީ ހުއްދަ ދީފައިވަނީ ދިފާއީ ވަޒީރު އިސްކޮށް ހުންނަވާ، އެންމެ މަތީ ފެންވަރުގެ އަސްކަރީ އޮފިސަރުން ހިމެނޭ 'ޑިފެންސް އެކުއިޒިޝަން ކައުންސިލް' އިންނެވެ. މި ޑީލްގައި ހިމެނޭ މުހިންމު ބައިތައް:
- ދިފާއީ ނިޒާމުތައް: އެންޓި-ޑްރޯން އަދި އިލެކްޓްރޯނިކް ވޯފެއާ ސިސްޓަމްތައް، މީޑިއަމް ރޭންޖް ސަރފޭސް-ޓު-އެއާ މިސައިލް، އަދި އަތުން އުފުލޭ އެންޓި-ޓޭންކް މިސައިލްތައް.
- ޑްރޯން ޓެކްނޮލޮޖީ: އިންޑިއާގެ ސިފައިންނަށް ޚާއްސަ "ޖެޓް ބޭސްޑް ކަމިކާޒޭ ޑްރޯން ސިސްޓަމް" އަދި މަނަވަރުތަކުގައި ބޭނުންކުރާ ޑްރޯންތައް.
- ކަނޑުގެ ސިފައިންނާއި ވައިގެ ސިފައިންނަށް: އާ ނޭވަލް މައިންސް، އުދުހޭ ޖާސޫސީ އުޅަނދުތައް، އަދި ކަނޑުގެ ސަރަހައްދު ބެލެހެއްޓުމަށް ބޭނުންވާ ޓެސްޓިން ފެސިލިޓީތައް.
މި އާލާތްތައް ގަންނާނީ ބޭރު ގައުމުތަކުންތޯ ނުވަތަ އަމިއްލަ ގައުމުގައި އުފައްދާނީތޯ ކަމެއް ނިންމާފައެއް ނުވެއެވެ. އަދި އެކަމަށް މުއްދަތެއް ވެސް ސަރުކާރުން ހާމަކޮށްފައެއް ނުވެއެވެ. ނަމަވެސް، ފާއިތުވި ދިހަ އަހަރު ދުވަހުގެ ތެރޭގައި އިންޑިއާއިން ދަނީ އަސްކަރީ ސާމާނު ހޯދުމަށް ރަޝިއާއަށް ބަރޯސާވާ މިންވަރު ކުޑަކޮށް، އެމެރިކާ، ފްރާންސް ފަދަ ގައުމުތަކާ ގުޅުން ބަދަހިކޮށް، އަމިއްލަ ގައުމުގައި ހަތިޔާރު އުފެއްދުމަށް އިސްކަން ދެމުންނެވެ.
އިންޑިއާގެ މިހާރުގެ ދިފާއީ ބަޖެޓަކީ 85 ބިލިއަން ޑޮލަރެވެ. މީގެ އިތުރުން، ކަނޑުގެ ސިފައިންގެ ބާރުތައް ޒަމާނީ ކުރުމަށްޓަކައި 75 އާ މަނަވަރާއި ސަބްމެރިން ގަތުމުގެ މަސައްކަތް ވެސް އިންޑިއާއިން މިހާރު ދަނީ ކުރަމުންނެވެ. މީގެ ތެރެއިން ގިނަ އުޅަނދުތަކަކީ އިންޑިއާގައި އަމިއްލައަށް ބަނދެފައިވާ އުޅަނދުތަކެވެ. މީގެ ކުރިން މި އަހަރުގެ ތެރޭގައި ފްރާންސްގެ ރަފޭލް ޖެޓްތައް ހިމެނޭހެން 39 ބިލިއަން ޑޮލަރުގެ ހަތިޔާރު ގަތުމަށް ވެސް އިންޑިއާއިން ވަނީ ފާސްކޮށްފައެވެ.
