ޤަޠަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އާލަސާނީ ވިދާޅުވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަކީ "ހަނގުރާމައިގެ މުޖުރިމެއް" ކަމަށެވެ. އަދި މެދުއިރުމަތީގެ މަސްރަހު ނާޒުކު ހާލަތެއްގައި އޮތް ނަމަވެސް ސުލްޙައަށްޓަކައި ޑިޕްލޮމެޓިކް މެދުވެރިއެއްގެ ދައުރު އަދާކުރުމުގައި ޤަޠަރު ސާބިތުކަމާއެކު ދެމިއޮންނާނެ ކަމަށް ވިދާޅުވެއެވެ.
އިނގިރޭސިވިލާތުގެ ނޫސްވެރިޔާ ޕިއާސް މޯގަންއަށް ދެއްވި ޚާއްސަ އިންޓަވިއުއެއްގައި ޤަޠަރުގެ ބޮޑުވަޒީރު ވިދާޅުވީ، ޣައްޒާ ގައި އިސްރާއީލުން ހިންގަމުން ދަނީ ހަނގުރާމައިގެ ޖިނާއީ ކުށްތަކެއް ކަމަށެވެ. އަދި މި އުދުވާންތަކުގެ ފުރިހަމަ ޒިންމާ ނަގަންޖެހޭ ފަރާތަކީ ނަތަންޔާހޫ ކަމަށާއި، އޭނާއަކީ ހަނގުރާމައިގެ ކުށްވެރިއެއް ކަމަށް ސަރީޙަ އިބާރާތުން ވިދާޅުވިއެވެ. އިސްރާއީލުގެ ބޮޑުވަޒީރު ޤަޠަރަށް ފާޑު ކިޔަނީ އާންމުންގެ ޚިޔާލު ބަދަލުކޮށް، ޙަޤީޤަތް އޮޅުވާލުމުގެ ނިޔަތުގައި ކަމަށާއި، އަމިއްލަ ސަރުކާރުގެ ނާކާމިޔާބީގެ އިލްޒާމް އެހެން ފަރާތްތަކުގެ ބޮލުގައި އަޅުވަން މަސައްކަތް ކުރާ ކަމަށްވެސް ޝައިޚ މުހައްމަދު ފާހަގަކުރެއްވިއެވެ.
ފާއިތުވި އަހަރުގެ ތެރޭގައި ޤަޠަރުގެ ވެރިރަށް ދޯޙާއަށް އަމާޒުކޮށް އިސްރާއީލުން ދިން ހަމަލާ ކުށްވެރިކުރައްވަމުން ބޮޑުވަޒީރު ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް ސުލްޙަވެރި ޙައްލަކަށް މަސައްކަތް ކުރަމުންދަނިކޮށް ޔަހޫދީ ގައުމުން ދިން އެ ހަމަލާއަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށެވެ. ސުލްޙައިގެ މެދުވެރިންނަށް ހަމަލާދިނުމަކީ ތާރީޚުގައިވެސް ހިނގާފައިވާ ކަމެއް ނޫން ކަމަށާއި، މިއީ ނަތަންޔާހޫ ރަތް ރޮނގު ފަހަނައަޅައި ދިޔުން ކަމަށްވެސް އޭނާ ވިދާޅުވިއެވެ.
މެދުއިރުމަތީގެ ހަނގުރާމައިގެ އަސަރު އީރާން އާއި ސަރަޙައްދީ އިމުން ބޭރަށް ފެތުރި، ދުނިޔޭގެ އިޤްތިޞާދަށް އޭގެ ނޭދެވޭ އަސަރު ކުރާނެ ކަމުގެ އިންޒާރު ޤަޠަރުން މީގެ ކުރިންވެސް ވަނީ އެތައް ފަހަރަކު ދީފައެވެ. އެމެރިކާގެ އިދާރާތަކާއެކު ގުޅިގެން އީރާނާއެކު އެއްބަސްވުމަކަށް އައުމަށް ޑިޕްލޮމެޓިކް ގޮތުން ކުރެވުނު މަސައްކަތްތައް ކާމިޔާބުނުވި ނަމަވެސް، ފަރުދާގެ ފުރަގަހުން ކުރެވޭ މަޝްވަރާތަކަކީ ނަތީޖާ ނެރުމަށް އެންމެ އެކަށީގެންވާ ސްޓްރެޓެޖީ ކަމަށް ބޮޑުވަޒީރު ވިދާޅުވިއެވެ.
މިހާރުގެ ނުތަނަވަސް މަސްރަހު ފިނިކުރުމަށްޓަކައި މުހިންމު ތިން މައިދާނަކުން ޙައްލު ހޯދަންޖެހޭ ކަމަށް ޤަޠަރުން ދެކެއެވެ.
- ފުރަތަމަ ކަމަކީ، އީރާނުގެ ނިއުކްލިއާ މައްސަލައިގައި އިންޓަނޭޝަނަލް އެޓޮމިކް އެނާޖީ އޭޖެންސީއާއި އެމެރިކާއަށް ގަބޫލުކުރެވޭ، އަދި އީރާނަށް ސުލްޙަވެރި ކަންކަމުގައި ހަކަތަ ބޭނުންކުރުމުގެ ޙައްޤު ލިބިދޭ އެއްބަސްވުމަކަށް އައިސް ދަތިކުރުމުގެ ފިޔަވަޅުތައް އުވާލުމެވެ.
- ދެވަނަ ކަމަކީ، ހުރުމުޒު ކަނޑުއޮޅީގައި އުޅަންދުފަހަރަށް މިނިވަންކަމާއެކު ދަތުރުފަތުރު ކުރެވޭނެ އިންތިޒާމު ބައިނަލްއަޤްވާމީ ޤާނޫނުތަކުގެ ތެރެއިން ކަށަވަރުކުރުމެވެ.
- ތިންވަނަ ކަމަކީ، ގަލްފު އިއްތިހާދީ ކައުންސިލްގެ ޤައުމުތަކާއި އީރާނާ ދެމެދު އޮންނަ ސަލާމަތީ ގުޅުންތައް އިޞްލާޙުކޮށް، އެކަކު އަނެކަކުގެ ދާޚިލީ ކަންކަމާ ނުބެހުމުގެ އުޞޫލުގެ މައްޗަށް ބިނާވެގެންވާ އަވައްޓެރިކަމުގެ ގުޅުމެއް ޤާއިމުކުރުމެވެ.
އީރާނާއެކު ކުރެވޭ މަޝްވަރާތަކާ ބެހޭގޮތުން ވާހަކަދައްކަވަމުން ބޮޑުވަޒީރު ވިދާޅުވީ، އީރާނުގެ ރައީސާއި ޚާރިޖީ ވަޒީރު އަދި ޤައުމީ ސަލާމަތާ ބެހޭ ކައުންސިލް މެދުވެރިކޮށް ރަސްމީ މަގުތަކުން މަޝްވަރާތައް ކުރިއަށްދާ ކަމަށެވެ. އަދި އެމެރިކާގެ ރައީސް ޑޮނަލްޑް ޓްރަމްޕްގެ ފަރާތްޕުޅުން ޑިޕްލޮމެޓިކް ޙައްލުތަކަށް އެއްބާރުލުން ލިބެމުންދާ ކަމަށްވިދާޅުވެ، މިފަހަރުގެ މަސައްކަތްތައް ކާމިޔާބުވާނެ ކަމަށް އުއްމީދު ކުރައްވާ ކަމަށްވެސް ވިދާޅުވިއެވެ.
