ސައޫދީ އަރަބިއްޔާގެ މާލީ ތަނަވަސްކަމާއި، ތުރުކީގެ ކުރިއަރާފައިވާ ދިފާއީ ޓެކްނޮލޮޖީ އަދި ޕާކިސްތާނުގެ އަސްކަރީ ބާރު ގުޅުވައިލައިގެން އެކުލަވާލި ދިފާއީ އާ އިއްތިހާދާއެކު މެދުއިރުމަތީގެ އިސްތިރާޖީ އަދި ސަލާމަތީ މަސްރަހުގެ ބެލެންސް ބަދަލުވާން ފަށައިފިއެވެ.
މިއީ އިސްލާމީ ބޮޑު ތިން ގައުމަކުން ގުޅިގެން، ސަރަހައްދީ ރައްކާތެރިކަން ދެމެހެއްޓުމަށްޓަކައި އެކުވި ދިފާއީ ސިޔާސަތެއްގެ ދަށުން ގާއިމުކުރި ތާރީޚީ އެއްބަސްވުމެކެވެ. މެދުއިރުމަތީގައި ހަނގުރާމަތަކާއި މިސައިލް އަދި ޑްރޯން ހަމަލާތައް އިތުރުވެ، އެމެރިކާގެ ދިފާއީ ރައްކާތެރިކަމަށް އޮތް އިތުބާރު ކުޑަވަމުންދާ ދަނޑިވަޅެއްގައި، މި އިއްތިހާދުގެ ސަބަބުން ސަރަހައްދީ ސިޔާސަތަށް ބޮޑެތި ބަދަލުތަކެއް އަންނާނެ ކަމަށް ލަފާ ކުރެވެއެވެ.
ޕާކިސްތާނާއި ސައޫދީ އަރަބިއްޔާއާ ދެމެދު ކުރިންވެސް ދިފާއީ ގުޅުންތަކެއް އޮތް ނަމަވެސް، ނޭޓޯގެ މުހިންމު ބައިވެރިއެއް ކަމަށްވާ ތުރުކީ މި އިއްތިހާދުގައި ބައިވެރިވުމުން ދެކުނު އޭޝިއާއާއި ގަލްފުގެ ސަރަހައްދު ވަނީ އަސްކަރީ ގޮތުން ގުޅުވާލެވިފައެވެ. މި އެއްބަސްވުމުގެ ދަށުން ތުރުކީގެ ޒަމާނީ ޑްރޯން، މިސައިލް އަދި ކަނޑުގެ އަސްކަރީ ޓެކްނޮލޮޖީއާއެކު، ޕާކިސްތާނުގެ ސިފައިންގެ ބާރާއި ސައޫދީގެ މާލީ ވަސީލަތްތައް އެއްކޮށްލައިގެން އުފެއްދުންތެރި ދިފާއީ އުފެއްދުންތައް ގުޅިގެން އުފެއްދުމަށް ވަނީ ހަމަޖެހިފައެވެ.
އިސްލާމީ ގައުމުތަކުގެ އިއްތިހާދެއްގެ ގޮތުގައި މިއީ ބައެއް ފަރާތްތަކުން މުސްލިމް ނޭޓޯ އެއްގެ ގޮތުގައި ސިފަކުރި ނަމަވެސް، އިއްތިހާދުގެ ބައިވެރިން ބުނަނީ މިއީ ވަކި ގައުމަކާ ދެކޮޅަށް އުފެއްދި އިއްތިހާދެއް ނޫން ކަމަށެވެ. ޚާއްސަކޮށް ޕާކިސްތާނާ ބޯޑަރު ހިއްސާކުރާ އިރާނާއެކު އޮންނަ ގުޅުމަށް ބުރޫނުއަރާނެ ގޮތަށް ކަންކަން ބައްޓަންކުރުމަށް އިސްކަންދިނުމެއް ނެތެވެ.
މި އާ އިއްތިހާދާމެދު އެމެރިކާއާއި އިސްރާއީލުން ފާރަވެރިވަމުންދާއިރު، މެދުއިރުމަތީގެ ސަލާމަތީ ކަންކަން ބޭރުގެ ބޮޑެތި ބާރުތަކަށް އެކަނި ބަރޯސާކުރުމުގެ ބަދަލުގައި، ސަރަހައްދީ ބާރުތަކުން އަމިއްލައަށް ދިފާއީ ނިޒާމު ބައްޓަންކުރުމަށް ފަށާފައިވާ މި މަސައްކަތަކީ ސަރަހައްދީ ހަމަޖެހުމަށް އެޅުނު މުހިންމު ފިޔަވަޅެކެވެ.
