އުމުރުން އެންމެ 9 އަހަރުގައި ޔުނިވަރސިޓީގައި ކިޔެވުން ފަށައި، 13 އަހަރުގައި ބެޗްލާސް ޑިގްރީ ހާސިލުކުރި އެލިއަޓް ޓެނަރ، އުމުރުން 18 އަހަރުގައި މިހާރު ދަނީ "ތިއޮރެޓިކަލް ފިޒިކްސް" އިން ޕީއެޗްޑީ ނިންމުމަށް މަސައްކަތް ކުރަމުންނެވެ. އެމެރިކާގެ މިނެސޯޓާއަށް ނިސްބަތްވާ އެލިއަޓްގެ ތަޢުލީމީ ދަތުރު އެހެން ކުދިންނާ މުޅިން ތަފާތުއިރު، އޭނާގެ މައިންބަފައިންނަށް ދަނީ ސޯޝަލް މީޑިއާގައި ބޮޑެތި ފާޑުކިޔުންތަކެއް އަމާޒުވަމުންނެވެ.
ކުޑައިރުގެ ތަފާތުކަމާއި ހޯމްސްކޫލިންގ
އެލިއަޓްގެ މަންމަ، މިޝެލް ޓެނަރ، ޕީޕަލް މެގަޒިންއަށް ދިން އިންޓަވިއުއެއްގައި ބުނެފައިވަނީ، އެލިއަޓް ޕްރީސްކޫލަށް ދާން ފެށުމުގެ ކުރިން އަމިއްލައަށް ފޮތް ކިޔައި ހިސާބު ހަދަން ދަސްކުރި ކަމަށެވެ. އަދި ނާސަރީއަށް ވަނުމާއެކު އޭނާގެ ގާބިލުކަން އެހެން ކުދިންނަށްވުރެ މާ ކުރީގައި އުޅޭކަން ފާހަގަކުރެވުނެވެ. އެގޮތުން ނާސަރީގައި އުޅުނުއިރުވެސް އޭނާގެ ހިސާބު އިލްމު ހުރީ ގްރޭޑް 4 ގެ ފެންވަރުގައެވެ.
އާދައިގެ ސުކޫލު މާހައުލުގައި އެހެން ކުދިންނާ ގުޅެން އުނދަގޫވުމުގެ ސަބަބުން، މައިންބަފައިން ނިންމީ ސުކޫލުން އޭނާ ވަކިކޮށް ގޭގައި ކިޔަވައިދިނުމަށެވެ
އުމުރުން 8 އަހަރުގައި ހައިސްކޫލް ނިންމުން
ގޭގައި ކިޔަވަން ފެށުމާއެކު އެލިއަޓްގެ ކުރިއެރުން މާ އަވަސްވިއެވެ. އުމުރުން އެންމެ 6 އަހަރުގައި ހައިސްކޫލް ފެންވަރުގެ 20 އަށްވުރެ ގިނަ ފޮތް ކިޔައި ނިންމި ކަމަށް މަންމަ ބުންޏެވެ. އަދި އުމުރުން 8 އަހަރުގައި އޭނާ ވަނީ ހައިސްކޫލްގެ ތައުލީމު ފުރިހަމަކޮށްފައެވެ.
-
އުމުރުން 9 އަހަރު: ކޮލެޖުގައި ކިޔަވަން ފެށުން
-
އުމުރުން 11 އަހަރު: ދެ އަހަރުގެ އެސޯސިއޭޓް ޑިގްރީ ނިންމުން
-
އުމުރުން 13 އަހަރު: މިނެސޯޓާ ޔުނިވާސިޓީން ބެޗްލާސް ޑިގްރީ ހާސިލުކުރުން
-
އުމުރުން 18 އަހަރު (މިހާރު): ފިޒިކްސް އިން ޕީއެޗްޑީ ފުރިހަމަކުރަމުން ދުއުން
ސޯޝަލް މީޑިއާގައި ގިނަ ބަޔަކު ވަނީ އެލިއަޓްގެ މައިންބަފައިން އޭނާއަށް މަޖުބޫރުކޮށްގެން އަވަސް އަރުވާލައިގެން ކިޔަވައިދީ، އޭނާގެ ކުޑަކުއްޖެއްގެ އުމުރުގެ އުފާތަކުން މަހުރޫމުކުރި ކަމަށް ބުނެ ފާޑުކިޔާފައެވެ. ނަމަވެސް، މިޝެލް މި ފާޑުކިޔުންތައް ދޮގުކުރެއެވެ. އޭނާ ބުނި ގޮތުގައި އެލިއަޓްއަށް ކިޔެވުމަކީ ބުރައަކަށް ވިޔަނުދިނުމަށް އަބަދުވެސް ސަމާލުކަން ދިނެވެ. އަދި އޭނާ ބޭނުންނަމަ ކިޔެވުން ހުއްޓާލުމުގެ އިޚްތިޔާރު އަބަދުވެސް އޮތް ކަމަށް ބުންޏެވެ.
