ޕާކިސްތާނުން ވަނީ ސަލާމަތީ ކަންބޮޑުވުންތަކާ ގުޅިގެން އައު ގްވާޑާރް އިންޓަނޭޝަނަލް އެއާޕޯޓް އިފްތިތާހުކުރުން ތިން ވަނަ ފަހަރަށް ފަސްކޮށްފައި ކަމަށް ޕާކިސްތާން އޮފިޝަލުން ވަނީ ކަށަވަރުކޮށްދީފަ އެވެ.
ޗައިނާއިން 250 މިލިއަން ޑޮލަރު ޚަރަދުކޮށްގެން ހަދާފައިވާ އެއާޕޯޓު ހުޅުވަން އޮތީ 2025 ވަނަ އަހަރުގެ ޖެނުއަރީ މަހުގެ އެއްވަނަ ދުވަހު އެވެ. އަދި އެ އެއާޕޯޓުގެ މަސައްކަތް އެދުވަހަށް ފެށުމަށް ނިންމި ނަމަވެސް އޭވިއޭޝަން މިނިސްޓްރީން ވަނީ އެ އެއާޕޯޓް ހުޅުވުމުގެ ރަސްމިއްޔާތު ކެންސަލްކޮށް ފައެވެ. އަދި ޕާކިސްތާން އިންޓަނޭޝަނަލް އެއާލައިންސް އިން ވަނީ ޝެޑިއުލް ކުރި ފުރަތަމަ ކޮމާޝަލް ފްލައިޓް ދަތުރުވެސް ކެންސަލް ކޮށްފައެވެ.
ޗައިނާ-ޕާކިސްތާން އިކޮނޮމިކް ކޮރިޑޯ (ސީޕީއީސީ) ގެ ދަށުން ހިންގާ މުހިންމު މަޝްރޫއެއް ކަމަށްވާ ގަވްދާރް އެއާޕޯޓު ފަރުމާކޮށްފައިވަނީ އެއާބަސް އޭ380 ފަދަ ބޮޑެތި މަތިންދާބޯޓުތައް ޖެއްސޭ ގޮތަށެވެ.
ކުރިން މި އެއަޕޯޓު ހުޅުވަން ހަމަޖެއްސި ތާރީހަކީ 2024ގެ އޮގަސްޓް 14 ގައި ޕާކިސްތާނުގެ މިނިވަން ދުވަސް ފާހަގަކުރުމާ ދިމާކޮށެވެ. ނަމަވެސް ބަލޫޗް ޔަކްޖެހްތީ ކޮމިޓީ (ބީވައިސީ) އިން އިންތިޒާމްކޮށްގެން ކުރި މުޒާހަރާތަކުގެ ސަބަބުން އެދުވަހަށްވެސް އެއާޕޯޓު ނުހުޅުވި ދިޔައީއެވެ.
ދެވަނަ ފަހަރަށް އެއާޕޯޓު ހުޅުވުން ލަސްވީ ބަލޮޗް ލިބަރޭޝަން އާމީ އިން “އޮޕަރޭޝަން ހެރޯފް” ގެ ދަށުން މުހިއްމު ހައިވޭތަކާއި ރޭލު ބްރިޖްތަކާއި މަދަނީ ދަތުރުފަތުރުގެ އުޅަނދުތަކާއި ސެކިއުރިޓީ ކޭމްޕްތަކަށް އަމާޒުކޮށްގެން ދީފައިވާ ޖާނު ގޮއްވާލުމުގެ ހަމަލާތަކަކާ ގުޅިގެންނެވެ.
ސިވިލް އޭވިއޭޝަން އޮތޯރިޓީ އާއި ބަލޫޗިސްތާން ސަރުކާރުގެ އޮފިޝަލުން ބުނީ އެއާޕޯޓު ހުޅވުން ލަސްކޮށްފައި ބަނީ އެ ސަރަހައްދުގެ ސަލާމަތީ ފިޔަވަޅުތައް މުރާޖައާ ކުރުމަށް ކަމަށް ބުނެފައެވެ.
