2024 ވަނަ އަހަރުގެ އޮގަސްޓް މަހު ބަނގްލަދޭޝަށް އައި ސިޔާސީ ބަދަލުތަކާ ގުޅިގެން ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އާއި ޖަމާޢަތޭ އިސްލާމީ (ޖޭއީ) އާއި ދެމެދު އޮތް ކޯޅުންތައް އިތުރު ވާން ފަށައިފިއެވެ.
ބަނގްލަދޭޝްގެ ސިޔާސީ މަސްރަޙުން އަވާމީ ލީގު އެއްފަރާތްވުމާއެކު ކުރިއަށް އޮތް އިންތިޚާބުގެ ކުރިން ދެ ޕާޓީން ވެސް ދަނީ ސިޔާސީ މައިދާންގައި ބޮޑު ރޯލު އަދާކުރުމަށް ވާދަވެރި ވަމުންނެވެ.
ސެކިއުލަރ އަދި ބައިނަލްއަޤްވާމީ މުޖުތަމަޢުތަކަށް އިލްތިމާސް ކުރުމަށްޓަކައި ބީއެންޕީން ދަނީ ޖަމާއަތޭ އިސްލާމީއާ ދުރުހެލިވަމުންނެވެ. ނަމަވެސް މިކަމުގެ ސަބަބުން އެތެރޭގެ ހަމަނުޖެހުންތަކެއް އުފެދިފައިވެއެވެ.
މީގެ އިތުރުން ޖަމާއަތޭ އިސްލާމީން ދަނީ ރަށްފުށުގެ ވޯޓަރުންނާއި އަދި ކޮންޒަވޭޓިވް ވޯޓަރުންނަށް ފޯކަސްކޮށް، ހަރަކާތްތައް ހިންގަމުންނެވެ. އަދި ސްޓޫޑެންޓް ވިންގާއި އިޖުތިމާއީ ހަރަކާތްތައް ބޭނުންކޮށްގެން އެމީހުންގެ ނުފޫޒު ފުޅާކުރަމުންނެވެ.
ދެ ޕާޓީންވެސް ދަނީ، ޕްރޮޕެގެންޑާ އާއި، އިންތިޚާބުގެ ތަފާތު ސްޓްރެޓެޖީތައް ބޭނުން ކުރުމުގެ ސަބަބުން ބައިބައިވުން އިތުރުވުމަކާ ދިމާއަށެވެ.
ބީއެންޕީގެ ލީޑަރުން ވަނީ 1971 ވަނަ އަހަރުގެ މިނިވަން ހަނގުރާމައާ ގުޅޭ ގޮތުން ޖަމާއަތޭ އިސްލާމީއަށް ފާޑުކިޔާފައެވެ. އަދި ޖަމާއަތޭ އިސްލާމީން ބީއެންޕީއާ ދެކޮޅު ވާހަކަތަކެއް ދެއްކި ކަމަށް ވެސް ބީއެންޕީން ތުހުމަތު ކުރެ އެވެ.
ދެ ޕާޓީން ވެސް ވެރިކަން ކަށަވަރު ކުރަން މަސައްކަތް ކުރާއިރު، މީގެ ކުރިން ނުފެންނަ ކޯޅުންތަކާއި ހަމަނުޖެހުންތައް ތަހުލީލު ކުރާ ފަރާތްތަކުން ދަނީ ފާހަގަ ކުރަމުންނެވެ.
