ޕާކިސްތާނުގައި ހެޕެޓައިޓިސް ސީގެ ބަލި ފެތުރެމުންދާ މިންވަރު އިންތިހާއަށް އިތުރުވެ، މިހާރު ވަނީ ދުނިޔޭގެ ހެޕެޓައިޓިސް ސީ ގެ ކުއްލި ނުރައްކަލުގެ މަރުކަޒަކަށް ވެފައެވެ. ސަރުކާރުގެ އިސް ވެރިން މަޢުލޫމާތު ދެއްވާ ގޮތުގައި މިވަގުތު ދުނިޔޭގައި އެންމެ ގިނައިން ހެޕެޓައިޓިސް ސީ ޖެހިފައިވާ ޤައުމަކީ ޕާކިސްތާނެވެ.
ޕާކިސްތާނުގައި މިހާރު ގާތްގަނޑަކަށް 10 މިލިއަން މީހުންނަށް ހެޕެޓައިޓިސް ސީ ޖެހިފައިވާއިރު، ކޮންމެ އަހަރަކު އެތައް ހާސް ބަޔަކު މި އަދަދަށް އިތުރުވަމުންދެއެވެ. މި ބަލި ފެތުރޭ މިންވަރު މައްޗަށް ދިއުމުގެ މައިގަނޑު ސަބަބުތަކުގެ ތެރޭގައި މެޑިކަލް ޕްރޮސީޖާތަކުގައި ފަރުވާ ކުޑަވުމާއި ސިރިންޖް ދެވަނަ ފަހަރަށް ބޭނުންކުރުމާއި، ލޭ އެޅުމުގައި ބޭނުން ކުރާ ސްކްރީނިންގ ޕްރޮޓޮކޯލްތައް ދަށްވުމާއި، އާންމުންގެ ހޭލުންތެރިކަން ކުޑަވުން ހިމެނެއެވެ.
ފުރަމޭއަށް އަސަރުކުރާ މި ވައިރަލް އިންފެކްޝަނަކީ ރައްކާތެރިވެވޭނެ އަދި ފަރުވާކުރެވޭނެ ބައްޔެކެވެ. ނަމަވެސް ފަރުވާ ނުލިބިއްޖެނަމަ ފުރަމޭއަށް ބޮޑެތި ގެއްލުންތަކެއް ލިބި، ސިރޯސިސް އަދި ފުރަމޭގެ ކެންސަރު ޖެހުމުގެ ފުރުސަތު އޮންނަ ބައްޔެކެވެ.
މި ބަލީގެ 90 އިންސައްތައަށް ވުރެ ގިނަ ކޭސްތަކުގައި އިންފެކްޝަން ރަނގަޅު ކުރެވޭ ވަރަށް، ޑައިރެކްޓް އެކްޓިން އެންޓިވައިރަލް (ޑީއޭއޭ) ބޭސްތައް ލިބެން ހުރި ނަމަވެސް، ޕާކިސްތާނުގެ ގިނަ ރައްޔިތުންނަށް މި ބޭސްތައް ލިބުމަކީ އަދިވެސް ބޮޑު ގޮންޖެހުމެކެވެ.
މިކަމަކީ ޕާކިސްތާނުގެ ސިއްޙީ ނިޒާމުގެ ނާކާމިޔާބީތަކަށް އަލިއަޅުވާލާ ކަމެކެވެ. ޕާކިސްތާނުގެ ސިއްޙީ ދާއިރާއިން މިވަގުތު ހަނގުރާމަ ކުރަމުންދަނީ ހަމައެކަނި ހެޕެޓައިޓިސް ސީއާ އެކަންޏެއް ނޫނެވެ. ޕޯލިއޯ އަކީވެސް ޕާކިސްތާނު ސަރުކާރުން ކުއްލި ނުރައްކަލުގެ ހާލަތު އިއުލާަން ކޮށްފައިވާ ކަމެކެވެ.
