އިރާނުގެ "ޚާތަމުލް އަންބިޔާ" ހަނގުރާމަވެރި އޮޕަރޭޝަންތަކާ ބެހޭ މަރުކަޒުގެ ތަރުޖަމާނު އިބްރާހީމް ޛުލްފިޤާރީ ބުރާސްފަތި ދުވަހުގެ ރޭ ވިދާޅުވީ، އިރާގުގެ ހުޅަނގުގައި ހަރަކާތްތެރިވާ ބާރުތަކުން ދިން މިސައިލް ހަމަލާތަކެއް އެމެރިކާގެ ތެޔޮ އަޅާ ބޯޓަކަށް އަމާޒުވެ، އެ ބޯޓު ވެއްޓި އޭގައި ތިބި ހުރިހާ ފަޅުވެރިން މަރުވެއްޖެއެވެ.
މިކަމާ ގުޅިގެން އެމެރިކާގެ ސެންޓްރަލް ކޮމާންޑުން ބުނީ، މި ހާދިސާގައި އެހެން ބޯޓެއްވެސް ހިމެނޭ ކަމަށާއި، ނަމަވެސް މިއީ ދުޝްމަނުންގެ ނުވަތަ އަމިއްލަ ބާރުތަކުގެ ހަމަލާއަކުން ހިނގި ކަމެއް ނޫން ކަމަށް ބުނެ އެކަން ދޮގުކޮށްފައެވެ.
ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވަނީ، ކޭ.ސީ-135 މަރުކާގެ ތެޔޮ އަޅާ ބޯޓު ވެއްޓުމާ ގުޅިގެން ސަލާމަތްކުރުމުގެ މަސައްކަތް ކުރަމުންދާ ކަމަށެވެ. އަދި ދެވަނަ ބޯޓު ސަލާމަތުން ޖައްސާފައިވާ ކަމަށްވެސް ބުނެފައިވެއެވެ.
އިރާނާ ދެކޮޅަށް އެމެރިކާއިން ހިންގާ ޓެރަރިސްޓް ހަމަލާތަކުގެ ނަން ބޭނުންކޮށް އެ ބަޔާނުގައި ބުނެފައިވަނީ، "މި ހާދިސާ ހިނގާފައިވަނީ 'އޮޕަރޭޝަން އެޕިކް ފިއުރީ' ގެ ތެރެއިން ރައްކާތެރި ވައިގެ ސަރަހައްދެއްގައި" ކަމަށާއި، މިހާރު ސަލާމަތްކުރުމުގެ މަސައްކަތް ކުރިއަށްދާ ކަމަށެވެ.
ފެބްރުއަރީ 28 ގައި އެމެރިކާއާއި އިސްރާއީލުން އިރާނަށް އުދުވާނީ ޓެރަރިސްޓް ހަމަލާދޭން ފެށި ފަހުން އެމެރިކާގެ އެތައް ސިފައިންނެއް ވަނީ މަރާލެވިފައެވެ. އަދި މި ހަނގުރާމައިގައި އެމެރިކާގެ 150 އެއްހާ ސިފައިން ޒަޚަމްވެފައިވާ ކަމަށް ރޮއިޓާސްއިން އަންގާރަ ދުވަހު ރިޕޯޓުކޮށްފައިވެއެވެ. މިއީ އެމެރިކާއާއި އިސްރާއީލުން އިރާނާ ދެކޮޅަށް ކުރާ ޓެރަރިސްޓް ހަނގުރާމަ ފެށުނު ފަހުން ވައްޓާލާފައިވާ އެމެރިކާގެ އަސްކަރީ 4 ވަނަ ބޯޓެވެ. މީގެ ކުރިން ކުވެއިތު މަތިން ދިން ހަމަލާއެއްގައި އެފް-15 މަރުކާގެ ތިން ބޯޓު ވަނީ ވައްޓާލާފައެވެ.
ހަނގުރާމަ ފެށުނު ދުވަސް ކަމަށްވާ ފެބްރުއަރީ 28 ގައި، ކުވެއިތުގެ ސިފައިން އޮޅިގެން އެމެރިކާގެ އެފް-15އީ މަރުކާގެ ތިން ބޯޓު ވައްޓާލާފައިވާ ކަމަށާއި، އޭގައި ތިބި ހަ ފަޅުވެރިންވެސް ޕެރަޝޫޓުގައި ފުންމާލައިގެން ސަލާމަތްވެފައިވާ ކަމަށް ސެންޓްކޮމްއިން ބުނެފައިވެއެވެ. އެ ވަގުތު އަސްކަރީ ކޮމާންޑުން ބުނެފައިވަނީ، މި ހާދިސާ ހިނގީ އިރާނުގެ ބޯޓުތަކާއި، ބެލިސްޓިކް މިސައިލްތަކާއި ޑްރޯންތަކުން ދެމުންދިޔަ ހަމަލާތަކެއްގެ ތެރޭގައި ކަމަށެވެ.
