އީރާނަށް ދެމުންދާ ޓެރަރިސްޓް ހަމަލަތަކުގެ ސަބަބުން، މި މާރިޗު މަހުގެ 31 އިން އޭޕްރީލް 2 އަށް ޗައިނާއަށް ކުރެއްވުމަށް ހަމަޖެހިފައިވާ ޓްރަމްޕްގެ ރަސްމީ ދަތުރުފުޅު ގާތްގަނޑަކަށް މަސްދުވަހަށް ފަސްކޮށްދިނުމަށް އެދިވަޑައިގެންފައިވާ ކަމަށް ޓްރަމްޕް އިއުލާން ކުރައްވައިފިއެވެ. ޓްރަމްޕް މިހެން ވިދާޅުވީ ނައިބު ރައީސް ޖޭ.ޑީ ވެންސްއާއެކު އޯވަލް އޮފީހުގައި ބޭއްވި ރިޔާސީ އަމުރެއްގައި ސޮއިކުރުމުގެ ރަސްމިއްޔާތެއްގައި ނޫސްވެރިން ކުރި ސުވާލުތަކަށް ޖަވާބު ދެއްވަމުންނެވެ.
ކުރިން އިއުލާނުކުރި ތާރީޚުގައި ދަތުރުފުޅު ކުރިއަށްދާނެތޯ ނޫސްވެރިން ސުވާލުކުރުމުން ޓްރަމްޕް ވިދާޅުވީ، "އަޅުގަނޑުމެން މިދަނީ ޗައިނާއާއެކު މަޝްވަރާ ކުރަމުން. އަޅުގަނޑު ވަރަށް ބޮޑަށް ބޭނުންވި މި ދަތުރު ކުރަން، އެކަމަކު ހަނގުރާމައިގެ ސަބަބުން އަޅުގަނޑު ބޭނުންވަނީ އެމެރިކާގައި މަޑުކުރަން. އަޅުގަނޑުގެ ހުރުން މިވަގުތު މިތަނުގައި މުހިންމު ކަމަށް ގަބޫލުކުރެވޭތީ، ދަތުރު މަސްދުވަހަށް ފަސްކޮށްދިނުމަށް އެދިފައިވާނެ،" ކަމަށެވެ.
މިކަމާ ގުޅިގެން ޗައިނާގެ ފޮރިން މިނިސްޓްރީގެ ތަރުޖަމާނު ލިން ޖިއާން އަންގާރަ ދުވަހު ވިދާޅުވީ، ޓްރަމްޕްގެ ދަތުރުފުޅާ ގުޅޭގޮތުން ބެއިޖިންއާއި ވޮޝިންގޓަނާ ދެމެދު މުއާމަލާތްތައް ކުރެވެމުންދާ ކަމަށެވެ. ޓްރަމްޕް ދަތުރުފުޅު ފަސްކުރަން ބޭނުންފުޅުވާކަން ހާމަކުރެއްވުމާ ގުޅިގެން ޗައިނާއިން މިހާރު ދަނީ އެކަމަށް ތައްޔާރުވަމުންނެވެ.
މީގެ އިތުރުން، ހުރުމުޒް ކަނޑުއޮޅިއާ ގުޅޭގޮތުން ވާހަކަ ދައްކަވަމުން ޓްރަމްޕް ވިދާޅުވީ، ޗައިނާއިން އެމެރިކާއަށް ޝުކުރުވެރިވާންޖެހޭ ކަމަށާއި އެ ސަރަހައްދުގެ ކަންކަމުގައި އެހީތެރިކަން ފޯރުކޮށްދޭންޖެހޭ ކަމަށެވެ. އޭނާ ފާހަގަކުރެއްވި ގޮތުގައި ޗައިނާއަށް ބޭނުންވާ ތެލުގެ ގާތްގަނޑަކަށް 90 އިންސައްތަ އެތެރެކުރަނީ އެ ކަނޑުއޮޅި މެދުވެރިކޮށެވެ.
