ކުޅުދުއްފުށި ސިޓީގެ މޭޔަރު މުޙައްމަދު އާތިފް، ރަމަޟާން މަހުގެ 29 ވިލޭރޭ ހިލޭ އަންހެން ކުއްޖަކާއެކު އެކަހެރި ސަރަޙައްދެއްގައި ބަދުއަޚުލާޤީ އަމަލެއް ހިންގަން އޮއްވައި ރައްޔިތުންނަށް ފެނި، މުޅި ސިޓީގައި ބޮޑު ހަމަނުޖެހުމެއް އުފެދިއްޖެއެވެ. ދަންވަރު 3:00 ހާއިރު، ގިނަ ބަޔަކު ދަމުނަމާދަށް ދިއުމަށް ތައްޔާރުވަމުންދިޔަ ވަގުތު ހިނގި މި ހާދިސާގެ މަންޒަރުތައް ސޯޝަލް މީޑިއާގައި ވަނީ ވަގުތުން ލައިވްކޮށްފައެވެ.
މި ހާދިސާ ހިނގާފައިވަނީ ކުޅުދުއްފުށީ އެއާޕޯޓް ސަރަޙައްދުގެ އެކަހެރި ދިމާލެއްގައި މޭޔަރު އާތިފްގެ ކާރުގެ ތެރޭގައެވެ. އެތަނަށް އެ އަންހެން ކުއްޖާގެ ބައްޕަ ގޮސް ދަރިފުޅު ސަލާމަތްކުރުމަށް އެދި އާދޭސްކުރުމުންވެސް، މޭޔަރު ވަނީ ކާރުގެ ދޮރުތައް ތަޅުލައިގެން އިނދެ އެކަމަށް ގޮންޖަހާފައެވެ. އަދި އޭގެ ފަހުން ބާރު މިނުގައި ކާރު ދުއްވާފައި އެ ސަރަޙައްދު ދޫކޮށް ގޮސްފައިވާ ކަމަށް މައުލޫމާތު ލިބެއެވެ.
މި ހާދިސާއާ ގުޅިގެން ހިނގި ހަމަނުޖެހުންތަކުގައި، މޭޔަރުގެ ދިފާއުގައި ނުކުތް ބަޔަކު ވަނީ ކާރު ފަހަތުން ދިޔަ އާންމުންގެ ސައިކަލުތަކުގައި ޖައްސައި ނުރައްކާތެރި ހަމަލާތަކެއް ދީފައެވެ. މަސްލަހަތު ބެލެހެއްޓުމަށް ފުލުހުން އެ ސަރަޙައްދަށް ހާޒިރުވި ނަމަވެސް، މޭޔަރު ވަނީ ފުލުހުންގެ އަމުރަށް ނުކިޔަމަންތެރިވެ ކާރު ދުއްވާފައި ގޮސް ޕޮލިސް ސްޓޭޝަން ތެރެއަށް ވަދެގަނެފައެވެ.
ޕޮލިސް ސްޓޭޝަން ކައިރިއަށް އެތައް ސަތޭކަ ރައްޔިތުންނެއް އެއްވެ ނުރުހުން ފާޅުކުރަމުން ދަނިކޮށް، އެތަނަށް އެއްވި ބައެއް އެކްޓިވިސްޓުން ވަނީ ރައްޔިތުންނަށް މަރުގެ އިންޒާރުދީ ހަޑިހުތުރު ބަހުން މުއާމަލާތްކޮށްފައެވެ. މި ހަލަބޮލިކަމުގެ ތެރެއިން ފުލުހުންގެ އެހީތެރިކަމާއެކު އެ އަންހެން ކުއްޖާ ވަނީ ސިއްރުން ގެއަށް ފޮނުވާލާފައެވެ.
ކުޅުދުއްފުށީގެ ގިނަ ރައްޔިތުން ދަނީ މި އަމަލަކީ އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމަށް ބުނަމުންނެވެ. ޚާއްޞަކޮށް ރަމަޟާން މަހުގެ ފަހު ދިހައިގެ ބަރަކާތްތެރި ވަގުތެއްގައި ސިޓީގެ އެންމެ އިސްވެރިޔާގެ ފަރާތުން ފެނިގެންދިޔަ މި ފާހިޝް އަމަލަކީ މުޅި ސިޓީއަށް ލިބުނު ހުތުރެއްގެ ގޮތުގައި ރައްޔިތުން ސިފަކުރެއެވެ.
ކުރިއަށް އޮތް އިންތިޚާބުގައި ދެވަނަ ދައުރަކަށް ކުރިމަތިލައްވަން ތައްޔާރުވަމުންދާ އާތިފްގެ އިތުބާރު ގެއްލިފައިވާ ކަމަށް ބުނެ، އޭނާ ވަގުތުން މަޤާމުން އިސްތިއުފާ ދިނުމަށް ގިނަ ބަޔަކު ދަނީ ބާރު އަޅަމުންނެވެ. މި ހާދިސާއާއެކު މުޅި ކުޅުދުއްފުށި ސިޓީގައި ވަނީ ނުތަނަވަސްކަން އުފެދިފައެވެ.
