އިންޑިއާ އާއި ޔޫރަޕިއަން ޔޫނިއަން (އީޔޫ) އާ ދެމެދު ގާއިމުކުރި ވިޔަފާރީގެ ތާރީޚީ އެއްބަސްވުމަކީ "ހުރިހާ މިނިވަން ވިޔަފާރި އެއްބަސްވުންތަކެއްގެ މަންމަ" އެއްބަސްވުން ކަމަށް ސިފަކުރައްވައި، އީޔޫގެ އިސްވެރިޔާ އުރުސުލާ ފޮން ޑަރ ލޭން އެކަމަށް ތައުރީފު ކުރައްވައިފިއެވެ. އިންޑިއާގެ 77 ވަނަ ޖުމްހޫރީ ދުވަހުގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގަންނަވަމުން އޭނާ ވިދާޅުވީ، މިއީ ދެ ފަރާތުގެ ގުޅުމުގައި ފެށުނު އާ ބާބެއް ކަމަށެވެ.
"ބޮޑުވަޒީރު، އިއްޒަތްތެރި އެކުވެރިޔާ، އަޅުގަނޑުމެން އެކަން ކޮށްފިން. ހުރިހާ ޑީލްތަކެއްގެ މަންމަ ޑީލް މި ވަނީ ޑެލިވަރީ ކުރެވިފަ،" ބޮޑުވަޒީރު ނަރެންދުރަ މޯދީ އާއި ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާއާ އެކު ޖޮއިންޓް ބަޔާނެއް ދެއްވަމުން އުރުސުލާ ވިދާޅުވި އެވެ.
އުރުސުލާ ވިދާޅުވި ގޮތުގައި އިންޑިއާ އާއި އީޔޫ އަކީ ދެފަރާތަށް ވެސް ފައިދާހުރި ގުޅުމެއް އިޚްތިޔާރުކުރި ދުނިޔޭގެ ބޮޑު ދެ ބާރެވެ. މި އެއްބަސްވުމުގެ ސަބަބުން ގާތްގަނޑަކަށް 4 ބިލިއަން ޔޫރޯގެ ޓެރިފް ކުޑަވެ، ވިޔަފާރިތަކަށް ކުރިއެރުން ލިބި، މުދާ ފޯރުކޮށްދިނުމުގެ ނިޒާމު އިތުރަށް ހަރުދަނާވާނެއެވެ. މީގެ އިތުރުން، އިގްތިސާދީ ގުޅުން ބަދަހިވެ ވިޔަފާރީގެ ހުރަސްތައް ނެތިގެންދާނެ ކަމަށް ވެސް އޭނާ ފާހަގަކުރެއްވިއެވެ.
މި އެއްބަސްވުމުގެ ދަށުން އީޔޫއިން ކުރިއަށް އޮތް ހަތް އަހަރުގެ ތެރޭގައި %99.5 މުދަލުން އިމްޕޯޓް ޑިއުޓީ ކަނޑާލާނެއެވެ. މީގެ ތެރޭގައި އިންޑިއާގެ ކަނޑުގެ އުފެއްދުންތަކާއި، ހަމުގެ ބާވަތްތަކާއި، ފޭރާމާއި، ކެމިކަލް އަދި ގަހަނާ ފަދަ ތަކެތިން ނަގާ ޓެރިފް އެއްކޮށް އުނިކުރުން ހިމެނެއެވެ. އުރުސުލާ ވިދާޅުވީ މިއީ ދެ ފަރާތުގެ ވަރުގަދަ ސިފަތައް އެއްކޮށްލައިގެން ވެވުނު މުހިންމު އެއްބަސްވުމެއް ކަމަށެވެ.
"އެއީ އިންޑިއާގެ ހުނަރާއި ހިދުމަތްތަކުގެ ފެންވަރު އެއްކޮށްލާ، ޔޫރަޕްގެ ޓެކްނޮލޮޖީއާއި ރައުސުލްމާލާއި އިނޮވޭޝަންއާ އެކު. މިއީ އެއްވެސް ފަރާތަކަށް އެކަނި ހާސިލް ނުކުރެވޭނެ ކުރިއެރުމުގެ ފެންވަރުތަކެއް އުފެދިގެންދާނެ ކަމެއް،" އުރުސުލާ
އެއްބަސްވުމުގެ ސްޓްރެޓެޖިކް މުހިންމުކަމަށް އަލިއަޅުވާލައްވަމުން އުރުސުލާ އިތުރަށް ވިދާޅުވީ، "އަޅުގަނޑުމެންގެ ބަދަހި ގުޅުންތައް އެއްކޮށްލައިގެން، ވިޔަފާރި ހަނގުރާމަ އިތުރުވަމުންދާ ދަނޑިވަޅެއްގައި ސްޓްރެޓެޖިކް ޑިޕެންޑެންސީތައް މަދުކުރަން" އުރުސުލާ
އިންޑިއާއިން ލިބުނު ހޫނު މަރުހަބާއަށް ޝުކުރު އަދާކުރައްވަމުން، ޖުމްހޫރީ ދުވަހުގެ ރަސްމިއްޔާތުގެ ތަޖުރިބާއަކީ ވަރަށް އަސަރުގަދަ ކަމެއްގެ ގޮތުގައި އުރުސުލާ ސިފަކުރެއްވިއެވެ. ބޮޑުވަޒީރު ނަރެންދުރަ މޯދީ ވެސް ވަނީ މިއީ ދުނިޔޭގެ އެންމެ ބޮޑު ދެ އިގްތިސާދުގެ އެއްބާރުލުމުގެ ނަމޫނާއެއް ކަމަށް ވިދާޅުވެފައެވެ.
ގުޅިފައިވާ ނޫސްކޮންފަރެންސްގެ ބަޔާނުގައި ވާހަކަ ދައްކަވަމުން މޯދީ ވަނީ މި ޑީލަކީ "އިންޑިއާގެ ތާރީހުގައި ވެސް އެންމެ ބޮޑު މިނިވަން ވިޔަފާރި އެއްބަސްވުން" ކަމަށް ވިދާޅުވެ، މިއީ ތަނަވަސްކަމުގެ ބްލޫޕްރިންޓެއް ކަމަށް ވިދާޅުވެފަ އެވެ.
"މިއަދު އިންޑިއާއިން ވަނީ ތާރީޚުގައި ފެންނަ ވެސް އެންމެ ބޮޑު މިނިވަން ވިޔަފާރީގެ އެއްބަސްވުން ނިންމާފައި. ޖެނުއަރީ މަހުގެ 27 ވަނަ ދުވަހު އިންޑިއާއިން ވަނީ ޔޫރަޕްގެ 27 ގައުމަކާއެކު މި އެފްޓީއޭގައި ސޮއިކޮށްފަ…މިއީ އިންވެސްޓްމަންޓް އިތުރުވެ، އާ އިނޮވޭޝަން ގެ ޕާޓްނަޝިޕްތައް އުފައްދައި، ދުނިޔޭގެ ފެންވަރުގައި ސަޕްލައި ޗޭންތައް ހަރުދަނާވާނެ ކަމެއް…މިއީ ހަމައެކަނި ވިޔަފާރީގެ އެއްބަސްވުމެއް ނޫން، މިއީ ހިއްސާވާ ތަނަވަސްކަމުގެ ބްލޫޕްރިންޓެއް،" މޮދީ އިތުރަށް ވިދާޅުވި އެވެ.
- މި އެއްބަސްވުމަކީ ދުނިޔޭގެ ޖީޑީޕީގެ %25 އަދި ދުނިޔޭގެ ވިޔަފާރީގެ ތިންބައިކުޅަ އެއްބައި ހިއްސާކުރާ ބޮޑު މުއާމަލާތެކެވެ.
2024-25 ވަނަ އަހަރު ދެ ފަރާތުގެ ވިޔަފާރި ވަނީ 190 ބިލިއަން ޑޮލަރަށް ވުރެ މައްޗަށް ގޮސްފައެވެ. މީގެ ތެރޭގައި އިންޑިއާއިން އީޔޫއަށް ކުރި އެކްސްޕޯޓާއި އީޔޫއިން އިންޑިއާއަށް އެތެރެކުރި މުދަލާއި ޚިދުމަތް ހިމެނެއެވެ. ގާނޫނީ މަރުހަލާތަކަށް ފަހު މި އެއްބަސްވުމުގައި ސޮއިކުރަން ގާތްގަނޑަކަށް ހަ މަސް ދުވަސް ނަގާނެ ކަމަށް ބެލެވެއެވެ. 2007 ގައި ފެށި މި މަޝްވަރާތައް މެދުކެނޑުމަކަށް ފަހު އަލުން ފަށާފައިވަނީ 2022 ވަނަ އަހަރުގެ ޖޫން މަހުގައެވެ.
