ޕާކިސްތާނާއި އަފްޣާނިސްތާނުގެ ބޯޑަރު ސަރަހައްދުގައި ހަތިޔާރު އެޅި ކުރިމަތިލުންތައް އިތުރުވަމުންދާ ދަނޑިވަޅެއްގައި، އިންޑިއާއިން އަފްޣާނިސްތާނުގެ ތާލިބާން ސަރުކާރާއެކު އޮންނަ ސިޔާސީ އަދި އިގްތިސާދީ ގުޅުންތައް ވަރުގަދަކުރަން ފަށައިފިއެވެ. މިއީ ސަރަހައްދީ ސިޔާސީ މަސްރަހަށް އަންނަމުންދާ ބޮޑު ބަދަލެކެވެ.
ނިކޭ އޭޝިއާއިން ރިޕޯޓްކޮށްފައިވާ ގޮތުގައި، ޕާކިސްތާނާއި ތާލިބާނާ ދެމެދު އޮތް ގުޅުން ވަރަށް ބޮޑަށް ގޯސްވެފައިވާ މި ދަނޑިވަޅުގައި އިންޑިއާއިން ދަނީ ކާބުލްއާއެކު އޮންނަ މުއާމަލާތްތައް ސިއްރިއްޔާތުގައި ފުޅާކުރަމުންނެވެ. މިދިޔަ އޮކްޓޫބަރު މަހުން ފެށިގެން ދެގައުމުގެ ބޯޑަރުގައި ހިނގަމުންދާ ހަމަނުޖެހުންތަކާ ގުޅިގެން، ޕާކިސްތާނުގެ އޮފިޝަލުން ވަނީ މިއީ "ހުޅުވިފައިވާ ހަނގުރާމައެއް" ގެ ގޮތުގައި ސިފަކޮށްފައެވެ.
ތާލިބާނުގެ އިސް އޮފިޝަލުން، އޭގެ ތެރޭގައި ދޯހާގައި ތިއްބަވާ ސިޔާސީ ލީޑަރުން ހިމެނޭހެން، އިސް ބޭފުޅުން ވަނީ އަފްޣާނިސްތާނުގެ ގުދުރަތީ ވަސީލަތްތައް ތަރައްގީކުރުމުގައި އިންޑިއާއާ އެކު ބައިވެރިވުމަށް ބޮޑު ޝައުގުވެރިކަމެއް ފާޅުކޮށްފައެވެ. އަފްޣާނިސްތާނުގެ އިގްތިސާދު ހަމަޖެއްސުމަށްޓަކައި އިންވެސްޓްމަންޓް ބޭނުންވެފައިވާ މި ދަނޑިވަޅުގައި، މިއީ ދެގައުމަށްވެސް ފައިދާހުރި ކަމެއްގެ ގޮތުގައި ތާލިބާނުން ދެކެއެވެ.
އިންޑިއާއަށް ބަލާއިރު، މިއީ އިގްތިސާދީ ފުރުސަތުތަކުގެ އިތުރުން ޕާކިސްތާނާ ދެކޮޅަށް ލިބޭ ސިޔާސީ ބާރެކެވެ. ތާލިބާނުން ވެރިކަމަށް އައި ފަހުން އަފްޣާނިސްތާނުގައި ޕާކިސްތާނުގެ ނުފޫޒު ވަނީ ވަރަށް ބޮޑަށް ކުޑަވެފައެވެ.
އިންޑިއާ އާއި ތާލިބާނުގެ ގުޅުން ބަދަހިވަމުންދާއިރު، ޕާކިސްތާނަށް ދަނީ ސަލާމަތީ އަދި ސިޔާސީ ގޮތުން ބޮޑެތި ފިއްތުންތަކެއް ކުރިމަތިވަމުންނެވެ. ޕާކިސްތާނުން ތުހުމަތުކުރާ ގޮތުގައި ތާލިބާނުން ދަނީ ޕާކިސްތާނަށް ހަމަލާދޭ ހަނގުރާމަވެރި ގްރޫޕްތަކަށް ހިމާޔަތް ދެމުންނެވެ. ނަމަވެސް ކާބުލްއިން މި ތުހުމަތުތައް ދޮގުކޮށް، ޕާކިސްތާނުން އަފްޣާނިސްތާނުގެ ސިޔާދަތަށް އަރައިގަންނަމުންދާ ކަމަށް ބުނެފައިވެއެވެ.
މި ނުތަނަވަސްކަމުގެ ސަބަބުން ވިޔަފާރި ހުއްޓި، ބޯޑަރުތައް ބަންދުކޮށް، ބަދަލުހިފުމުގެ ފިޔަވަޅުތައް ދަނީ އަޅަމުންނެވެ. އޭގެ ތެރޭގައި، އަފްޣާނިސްތާނުގައި ބޭހުގެ ދަތިކަން އިންތިހާއަށް އޮތް ނަމަވެސް، ޕާކިސްތާނުގެ ބޭސް އެގައުމަށް އެތެރެކުރުން ތާލިބާނުން ވަނީ ދާދިފަހުން މަނާކޮށްފައެވެ.
2021 ވަނަ އަހަރަށްފަހު ދެކުނު އޭޝިއާގެ ސިޔާސީ މަސްރަހަށް އައި އެންމެ ބޮޑު އެއް ބަދަލަކީ އިންޑިއާއިން އަފްޣާނިސްތާނާއެކު އަލުން ގުޅުން ގާއިމުކުރުމެވެ. އިންޑިއާއިން ތާލިބާން ސަރުކާރު ރަސްމީކޮށް ގަބޫލުނުކުރި ނަމަވެސް، ކާބުލްގައި ހުންނަ އެގައުމުގެ ޑިޕްލޮމެޓިކް އޮފީސް އަލުން ހުޅުވައި، އިންސާނީ އެހީތެރިކަމާއި ފަންނީ އެއްބާރުލުން ވަނީ ފުޅާކޮށްފައެވެ.
މަސްރަހު ދިރާސާކުރާ ފަރާތްތަކުން ބުނާ ގޮތުގައި، އިންޑިއާ އާއި ތާލިބާނުގެ މި އާ ގުޅުމުގެ ސަބަބުން ސަރަހައްދީ ބާރުގެ މިނިކިރުންތަކަށް ބޮޑެތި ބަދަލުތަކެއް އަންނާނެއެވެ. ހާއްސަކޮށް ޗައިނާ، އީރާން އަދި މެދުތެރޭ އޭޝިއާގެ ގައުމުތަކުންވެސް އަފްޣާނިސްތާނުގައި އެގައުމުތަކުގެ މަސްލަހަތު ހިމާޔަތްކުރަން މަސައްކަތް ކުރަމުންދާ ދަނޑިވަޅެއްގައެވެ.
